ᐊᒥᓱᓄᑦ ᓄᓇᓕᓐᓄᑦ
ᐃᓄᑐᖃᖅ ᐅᑎᕐᕕᒋᓗᒋᑦ ᐃᓄᒻᒪᕇᑦ, ᑲᒃᑲᓛᔭᐱᐊᕃᑦ ᓄᑕᕋᓛᓪᓗ X
ᕐᑲᕆᑕᐅᔭᒃᑯᑦ ᑐᑦᑕᕕᒃ

ᐳᕕᕐᓂᑐᒥ ᓄᑖᒥᒃ ᐊᖏᓂᕐᓴᐅᓱᓂᓘᕐᑐᒥᒃ ᒥᕝᕕᒥ ᐅᑕᕐᕿᕕᑦᑖᐳᖅ.

ᐅᓪᓗᓴᓕᐅᕐᑕᐅᓯᒪᑦᓱᓂ ᐅᒃᑯᐃᑕᐅᔪᑦᓴᐅᑎᓪᓗᒍ 2012 ᐅᑭᐊᖓᓂ, ᓄᑖᓪᓚᕆᐅᑦᓱᓂ ᐊᖏᓂᕐᓴᐅᓱᓂᓗ ᐳᕕᕐᓂᑑᑉ ᒥᕝᕕᖓᓂ ᐅᑕᕐᕿᕕᑦᑖᖃᒻᒥᖅ ᐃᓚᒋᔭᐅᕗᖅ ᑲᕙᒪᐅᔪᑦ ᑯᐯᒃ ᑕᕐᕋᖓᓂ ᒥᕝᕕᓂᒃ ᓄᑕᐅᓯᓕᑎᕆᕐᒥᒃ ᐱᕙᓪᓕᐊᑎᑦᓯᒍᑎᒋᓇᓱᑦᑕᖏᓐᓄᑦ ᑮᓇᐅᔭᑎᒍᑦ ᒪᑭᑕᒐᓱᐊᕈᑎᐅᒍᓐᓇᑐᓂᒃ ᐱᕙᓪᓕᐊᑎᑦᓯᓂᕐᒥᒃ ᐱᔭᖃᕈᒪᑦᓱᑎᒃ ᓄᓇᒥ ᐱᑦᓴᑕᕐᕕᓴᓕᒻᒪᕆᐅᑦᓱᓂ ᓄᓇᓕᕐᔪᐊᖁᑎᒥᓐᓂ.

ᓴᓇᒻᒪᓴᖓ ᐋᕐᕿᓱᕐᑕᐅᓯᒪᑦᓱᓂ ᐃᓪᓗᔪᐊᑦ ᓴᓇᒻᒪᓴᖏᓐᓂᒃ ᐊᓪᓚᖑᐊᕐᑎᓄᑦ ᐊᓓᓐ ᕘᕐᓃᒧᑦ ᐱᓯᒪᔪᒧᑦ ᕘᕐᓃ, ᑰᓱᕕᔾ, ᒫᔅ ᐱᓇᓱᖃᑎᖏᓐᓄᓗ, ᑖᓐᓇ ᓄᑖᖅ ᓇᑉᐸᑕᐅᑦᓱᓂ ᑮᓇᐅᔭᕐᑐᕈᑕᐅᒪᔪᖅ $6.5-ᒥᓕᐊᓐᓂᒃ ᒥᕝᕕᒥ ᐅᑕᕐᕿᕕᓕᐊᖑᓯᒪᔫᑉ ᐃᓪᓗᔪᐊᕐᑕᖓᑕ ᓴᓇᒻᒪᖓ ᑌᒣᑦᑐᒥᒃ ᓴᓇᒻᒪᑖᕐᑕᐅᓚᐅᔪᕗᖅ ᓄᓇᓖᑦ ᐃᒣᓕᖓᓗᓂᓖᕈᑎᖏᑦ ᑐᖕᖓᕕᐅᑎᓪᓗᒋᑦ ᖃᒧᑎᐅᔮᕐᑐᒥᒃ, ᓇᑉᐸᑕᐅᖁᔨᑦᓱᑎᒃ ᐃᓱᒪᒋᑦᓱᒋᒃ ᖃᒧᑏᓐᓂᒃ ᑕᒫᓂ ᓄᓇᒥ ᐃᓄᐃᑦ ᐃᓗᕐᖁᓯᕐᒥᒍᑦ ᕿᒻᒪᕆᐅᓯᐊᕐᓯᒪᒍᑎᒋᐊᓪᓚᖃᕐᓂᖏᑦ.

ᐃᓗᐊᓂ, ᖃᒧᑎᐅᔭᕐᑐᒥᒃ ᓴᓇᒻᒪᒋᔭᐅᖁᔨᓯᒪᓂᖅ ᓱᓕ ᑲᔪᓯᑎᑕᐅᓂᖃᕐᓯᒪᒋᕗᖅ ᐃᓪᓗᔪᐊᑉ ᐃᓗᐊᓂ ᐃᓪᓘᑉ ᖁᓛ ᐳᒃᑭᓕᕇᓂᒃ ᖁᓛᓕᐅᕐᑕᐅᒪᓂᖃᕐᒪᑦ ᓲᕐᓗ ᖃᒧᑏᒃ ᐃᖏᕐᕌᕕᑐᐊᓕᕋᒥᒃ ᖃᖓᑦᑕᐅᓛᓂᕆᓲᖏᒃ ᐃᓱᒪᒋᑦᓱᒋᒃ ᐋᕐᕿᑕᐅᒪᔪᓂᒃ. ᐊᑕᖏᑦᓯᐊᑐᒥᒃ ᐳᕕᕐᓂᑐᒥᐅᑦ ᓴᓇᐅᒐᕐᑏᑦ ᐃᓚᐅᑎᑕᐅᓂᖃᕐᑎᓗᒋᑦ ᑌᕕᑎᐊᓗᒃ ᐊᒥᑦᑑᓗ ᐊᑭᓐᓇᒥᐅᑕᓕᐊᕕᓂᖓ ᐊᖏᓪᓕᑎᕆᐊᓪᓚᓯᒪᑦᓱᓂ ᐃᓚᒋᔭᐅᕗᖅ ᑕᒃᒐᓂ ᒥᕝᕕᐅᖕ ᐅᑕᕐᕿᕕᑦᑖᖃᒻᒥᖓᓂ, ᐃᓚᖃᓛᕐᓱᓂᓗ ᐃᑭᒍᑎᑦᓴᑖᕐᕕᓂᒃ, ᐃᕐᓯᕕᖃᐅᑎᒥᒃ, ᓂᐅᕕᕐᕕᖃᐅᑎᒥᓪᓗ ᐱᓂᕐᓗᓂᕐᓂᓗ ᓱᔪᖃᓪᓗᐊᑎᑦᓯᑌᓕᕕᒻᒥᒃ ᓯᕗᓂᑦᓴᒥ ᑭᖕᖒᒪᓇᓛᕐᑐᓄᑦ ᐃᓚᒋᔭᐅᔪᓂᒃ.

ᓯᒃᑭᑕᐅᓕᖓᑦᓱᑎᒃ ᐃᑎᒐᓐᓂ 10,000-ᓂᒃ ᓱᕐᖄᑎᕈᑎᑎᒍᑦ ᐊᖏᓂᓕᒻᒥ, ᓄᑖᖑᑦᓱᓂ ᐊᖏᓕᒋᐊᕐᓯᒪᔪᖅ ᒥᕝᕕᒥ ᐅᑕᕐᕿᕕᒃ ᓯᑕᒪᕕᓪᓗᐊᑐᒥᒃ ᐊᖏᓂᕐᓴᐅᓂᖃᓚᖓᕗᖅ ᑕᒐᑕᒐ ᒥᕝᕕᒥ ᐅᑕᕐᕿᕕᐅᕙᑦᑐᒥᑦ. ᓯᓚᑖᖓ ᓴᕕᕋᔭᓐᓂᒃ/ᑭᑭᐊᓐᓂᒃ ᓯᓚᑉᐱᐊᓯᒪᓛᕐᓱᓂ ᐊᑭᓐᓇᖃᕐᓗᓂ ᐊᓄᕆᒧᑦ ᐃᑎᕐᑕᐅᔪᓐᓇᖏᑦᑐᓂᒃ, ᐊᑐᓂᓪᓗ ᑲᑕᖏᑦ ᐅᖓᓪᓕᕇᓂᒃ ᑐᕐᓲᓕᐅᕐᑕᐅᒪᓛᕐᓱᑎᒃ ᐅᑭᐅᒥ ᓂᓪᓚᑲᓪᓚᒍᐊᕐᑑᖁᖕᖏᒧᑦ, ᐃᓱᕐᕆᓂᕐᓴᐅᕕᐅᒍᓐᓇᖁᒧᓪᓗ ᖃᖓᑦᑕᔫᑎᒍᑦ ᐊᐅᓚᓂᓕᓐᓄᓗ ᒥᕝᕕᐅᓗ ᐱᓇᓱᑦᑎᖏᓐᓄᑦ.

ᐳᕕᕐᓂᑑᑉ ᓄᓇᒥ ᓱᑯᑦᓯᒦᓐᓂᖓ ᐊᕐᖁᑎᑦᓴᓯᐊᕈᒍᑎᒋᓯᒪᕙᐅᒃ ᐱᓇᓱᒐᐅᔪᑎᒍᑦ ᐊᐅᓚᑦᓯᒍᑎᐅᒋᐊᓕᓐᓄᑦ ᓄᓇᕕᓕᒫᒥ. ᐅᓪᓗᒥ ᐳᕕᕐᓂᑐᖅ ᐱᑐᑦᑕᕕᐅᓕᕐᒪᑦ ᑕᕐᕋᐅᑉ ᓄᓇᓕᖏᓐᓂᑦ ᐱᑦᓱᑎᒃ ᑕᓯᐅᔭᕐᔪᐊᒥᐅᑦ ᐃᓪᓗᒐᓴᓄᑦ ᐅᐸᐅᑎᒍᒪᓂᕆᓲᖏᓐᓄᑦ ᒪᓐᑐᔨᐊᒧᑦ, ᑯᐯᒃ ᓯᑎᒧᑦ ᐊᓯᖏᓐᓄᓗ ᓯᕿᓂᐅᑉ ᓂᐱᕝᕕᐊᓂᐅᓂᕐᓴᓗ ᓯᕿᓂᐅᓂᕐᓴᒥᓗ ᓄᓇᓄᑦ.

ᐊᕐᕌᒍᐃᑦ 20 ᐅᖓᑖᓄᑦ ᐊᓂᒍᕐᓯᒪᓕᕐᖁᑦ ᓴᓇᔭᐅᖃᑦᑕᕆᐊᖕᖓᓯᓚᐅᕐᓯᒪᑎᓪᓗᒋᓂᑦ ᓄᓇᕕᐅᑉ ᓄᓇᓕᖏᓐᓂ, ᑌᒪᖕᖓᒥᑐᖄᓗᒃ ᐅᓪᓗᒥᐅᓕᕐᑐᖅ ᓄᓇᕕᐅᑉ ᒥᕝᕕᖏᑦ ᓇᐅᒃᑯᑐᐃᓐᓇᖅ ᓄᑕᐅᓯᓕᔭᐅᒋᐊᓕᑐᖃᐅᓕᕐᑐᑦ. ᓄᑖᖑᑦᓱᓂ ᐅᑕᕐᕿᕕᑦᑖᖃᒻᒥᖅ, ᖃᖓᑦᑕᔫᓄᓪᓗ ᕿᑲᕐᕕᒃ ᐊᖏᓕᒋᐊᕐᓯᒪᔪᖅ ᐳᕕᕐᓂᑐᒥᓗ ᓄᑖᑉ ᒥᕝᕕᐊᓘᑉ ᐊᕙᑖᓂᑦᑐᑦ ᐃᑯᒣᑦ ᐃᑦᔭᑕᐅᓂᖃᓛᕐᑐᓴᐅᕗᑦ ᐱᐅᓯᒋᐊᕆᒍᑎᓄᑦ ᓴᓪᓗᐃᓗ ᑲᖏᕐᓱᔪᐊᓪᓗ ᒥᕝᕕᖏᓐᓂᒃ, ᑖᒃᑯᐊ ᑕᒪᕐᒥᒃ ᓂᕆᐅᓇᕐᒪᓃᒃ ᐊᖏᓂᕐᓴᒥᒃ ᒥᕝᕕᖃᕐᑐᓴᐅᒐᔭᕆᐊᒋᒃ ᐃᓕᖓᑎᓪᓗᒋᑦ ᖃᖓᑦᑕᔫᑎᒍᑦ ᐱᑦᔪᔨᒍᑎᐅᕙᑦᑐᑦ ᐊᑯᑦᑐᕆᐊᕐᓂᓴᖏᓐᓄᑦ ᐱᒃᑲᑕᐅᓗᑎᒃ ᐅᔭᕋᓐᓂᐊᓂᕐᒥᒃ ᐃᖏᕐᕋᒍᑎᖃᕐᑎᓯᓂᕐᓄᓗ ᓂᐅᕈᑐᓕᕆᓂᒃᑯᓗ ᐃᖏᕐᕋᑎᑦᓯᒍᑎᐅᔪᑦ ᐊᑯᓓᓕᒋᐊᕐᓂᖏᓐᓄᑦ.