ᐊᐅᓪᓚᑎᑕᐅᓚᖓᔪᓂᒃ ᐊᑐᐃᓐᓇᕈᕐᑎᕆᒍᓰᑦ ᐊᑭᓕᐅᕆᒍᓰᓪᓗ

ᐅᑯᐊᑕᒐ ᐊᑑᑎᔭᐅᑦᓯᐊᕆᐊᓖᑦ ᐊᐅᓪᓚᑎᒐᓱᐊᕐᑕᑎᑦ ᑎᑭᐅᑎᒍᓐᓇᓯᐊᖁᓪᓗᒋᑦ ᑐᕌᕐᑕᒥᓄᑦ ᓱᕐᕋᓯᒪᒍᓐᓀᓗᑎᒃ ᑭᖑᕙᕐᓯᒪᒍᓐᓀᓗᑎᓗ.

• ᐊᐅᓪᓚᑎᑦᓯᔪᖅ ᐊᓪᓚᒋᐊᓕᒃ ᐃᓘᓐᓇᖏᓐᓂᒃ ᐊᑎᕐᒥᓂᒃ ᑐᕌᒍᑎᒥᓂᓪᓗ ᐊᒻᒪᓗ ᑐᔪᕐᑕᒥᑕ ᐊᑎᖏᓐᓂᒃ ᑐᕌᒍᑎᖏᓐᓂᓗ ᐊᑐᓂ ᐊᓪᓚᕕᐅᒋᐊᓕᓐᓂ ᓯᒃᑭᑖᐱᓐᓂ ᐊᓪᓚᕕᒋᑦᓯᐊᓗᒋᑦ.
• ᓇᓗᓀᑦᓯᐊᓗᒋᑦ ᐊᐅᓚᑕᐅᒍᓯᒋᑦᓯᐊᕆᐊᖃᕐᓂᖏᑦ (ᓂᓪᓕᒪᔪᖃᐅᑎᐅᑉᐸᑦ, ᖁᐊᖃᐅᑎᐅᑉᐸᑦ, ᓯᖁᑦᓯᕈᐊᕐᑐᐸᑦ, ᐊᓯᖏᓪᓘᓃᑦ ᓱᓇᑐᐃᓐᓇᐅᒐᓗᐊᕐᐸᑕ ᑲᒪᒋᔭᐅᑦᓯᐊᕈᑎᒋᒋᐊᓕᖏᑦ) ᐊᑐᓂ ᐊᓪᓚᕕᐅᒋᐊᓖᑦ ᓯᒃᑭᑖᐲᑦ ᐊᓪᓚᕕᒋᑦᓯᐊᓗᒋᑦ.
• ᐊᐅᓪᓚᑎᒍᒪᔭᑎᑦ ᐃᓗᐊᒍᑦ ᓯᓚᑖᒍᓪᓗ ᐴᕐᑐᓯᒪᑦᓯᐊᓗᒋᑦ ᐃᓗᐊᓂᑦᑐᐃᑦ ᓱᒃᑯᕈᓀᑦᑑᑎᓪᓗᒋᑦ.
• ᓱᔪᒍᐊᕐᑐᓕᒫᑦ ᐴᕐᑐᓯᒪᑦᓯᐊᕆᐊᓖᑦ ᐅᕐᖂᔪᓗᐊᕐᑌᓕᔪᓂᒃ ᖁᐊᕆᒃᑯᓂᑎᓘᓐᓃᑦ ᓱᒃᑯᕆᒃᑯᑎᑦᓴᖏᓐᓂᒃ ᑌᒪᖕᖓᓕᒫᑦ ᐴᕐᑐᑕᐅᓯᒪᒋᐊᓖᑦ; ᐃᖃᓗᐃᑦ, ᑕᕆᐅᕐᒥᐅᑌᑦ ᓂᖀᑦ, ᐅᕕᓗᐃᓪᓗ, ᑕᓪᓗᕈᓐᓀᑦ ᐊᓯᖏᓪᓗ ᐴᑦᓴᔭᖏᓐᓂᒃ ᐴᕐᑐᓯᒪᒋᐊᓖᑦ ᓂᓪᓕᒪᔪᖃᐅᑎᒦᒋᐊᖃᕐᒪᑕ.

ᐅᓐᓂᑑᑎᖃᓪᓚᕆᑉᐳᒍᑦ ᐊᑐᕐᑕᐅᖁᓪᓚᕆᑦᑕᑎᓐᓂᒃ ᖃᓄᐃᑦᑐᑐᐃᓐᓀᑦ ᓱᔪᒍᐊᕐᑐᐃᑦ ᐴᕐᑐᑕᐅᓯᒪᑦᓯᐊᖁᑦᓱᒋᑦ ᖁᐊᕐᓇᑐᒦᓪᓗᐊᑌᓕᑎᓪᓗᒋᑦ ᓂᕈᒥᐊᓗᕐᑐᒥᓘᓐᓃᑦ ᑎᑭᒐᓱᐊᕐᑕᖏᓐᓄᑦ ᑎᑭᐅᑎᖕᖏᓂᓕᒫᖏᓐᓂ. ᖃᖓᓪᓗᐊᖅ ᑐᕌᕐᑕᒥᓄᑦ ᑎᑭᐅᑎᒐᓱᐊᕈᓇᐅᒻᒪᖔᑕ ᐃᓱᒪᒋᑦᓯᐊᓗᒋᑦ ᐊᐅᓪᓚᑎᑕᐅᒋᐊᕐᑐᕕᖏᓐᓄᑦ, ᐅᓯᓕᕐᑎᑕᐅᒋᐊᖃᕐᓂᖏᓪᓗ ᐊᒻᒪᓗ ᐅᓯᒋᐊᕐᑕᐅᒋᐊᖃᕐᓂᖏᑦ ᐃᓱᒪᒋᑦᓯᐊᓗᒋᑦ, ᐊᒻᒪᓗ ᖃᖓᓪᓗᐊᖅ ᖃᖓᑕᒋᐊᖃᕈᓇᐅᒻᒪᖔᑕ, ᓄᕐᖃᕕᒋᖃᑦᑕᓚᖓᔭᖏᓪᓗ ᓄᓇᓖᑦ ᐃᓱᒪᒋᒻᒥᓗᒋᑦ ᐊᒻᒪᓗ ᖃᖓ ᐁᔭᐅᒍᓇᐅᒻᒪᖔᑕ ᐃᓱᒪᒋᒻᒥᓗᒋᑦ ᓄᑕᖑᒍᓐᓇᕕᓕᒫᖏᑦᑎᒍᑦ ᑎᑭᐅᑎᒐᓱᐊᕐᑕᒥᓄᑦ ᑎᑭᖁᔨᒧᑦ ᑕᒪᒃᑯᐊ ᐃᓱᒪᒋᔭᐅᖁᔭᕗᑦ.

ᐊᐅᓪᓚᑎᑕᐅᔪᐃᑦ ᐊᑭᖏᑦ ᐊᑦᔨᒌᖕᖏᓚᕆᑉᐳᑦ ᐊᖏᓂᖏᑦᑎᒎᓱᒍᒻᒪᑕ ᐅᖁᒣᓐᓂᖏᑦᑎᒍᓪᓗ ᐊᐅᓪᓚᑎᑕᐅᔪᐃᑦ. ᑐᑭᒧᐊᒍᑎᑦᓴᐅᓱᑎᒃ ᒪᓕᒐᓕᐊᒍᓯᒪᔪᐃᑦ ᒪᓕᑦᑕᐅᒋᐊᓖᑦ ᐊᐅᓪᓚᑎᑕᐅᔪᐃᑦ ᖃᑦᓯᕌᒍᓇᐅᒻᒪᖔᑕ ᒥᑦᓴᐅᓵᕈᑎᐅᒍᓐᓇᑐᓂᒃ ᖃᐅᔨᒐᓱᐊᕈᑏᑦ ᐊᐅᓪᓚᑎᒍᒪᔭᕐᓄᑦ ᐃᓕᖓᔪᑦ ᑕᑯᒐᓱᐊᕈᓐᓇᒥᔪᑦ.

ᐃᓄᐃᑦ ᖃᖓᑦᑕᔫᖏᑦ/ᑎᒻᒥᔫᖏᑦ ᑕᒣᓐᓂᒃ ᐅᖁᒣᓐᓂᖏᓐᓂᒃ ᐊᖏᓂᖏᓐᓂᓗ ᐊᑭᓕᐅᕈᑎᖃᓲᒍᕗᑦ ᐊᑭᓕᐅᕆᓕᑐᐊᕋᒥᒃ; ᐱᕕᓕᒫᖏᑦᑎᒍᑦ ᐅᖁᒣᓐᓂᖏᑦ ᐊᖏᓂᖏᓪᓗ ᑐᖕᖓᕕᒋᑦᓱᒋᑦ ᐊᑭᓕᕐᑕᐅᓲᑦ.

ᐅᖁᒣᓐᓂᖏᑦᑎᒍᑦ ᐊᑭᓕᕐᑕᐅᓲᑦ ᑭᓗᑯᔮᒻᑎᒍᕐᑎᓗᒋᑦ, ᐳᕐᑐᓂᖏᑦᑎᒍᑦ, ᓯᓕᓐᓂᖏᑦᑎᒍᑦ ᑕᑭᓂᖏᑦᑎᒍᓪᓗ (ᓯᐊᓐᑕᒦᑕᑎᒍᕐᑎᓗᒋᑦ) ᐊᒻᒪᓗ ᐊᖏᓂᖓᑕ ᖃᑦᓯᐅᓂᖓ ᑐᖕᖓᕕᒋᑦᓱᒍ ᐊᕕᑦᑕᐅᓲᑦ 6,000-ᒧᑦ, ᑌᒪ ᖃᑦᓯᕌᒋᐊᖃᕐᓂᖓ ᖃᐅᔨᔭᐅᓂᐊᓕᕐᒪᑦ.

• ᖃᖓᑦᑕᔫᒃᑰᓚᖓᔪᐃᑦ ᖃᓄᓪᓗᐊᑎᒋᒃ ᐊᑭᖃᕐᓯᒪᒻᒪᖔᑕ ᓇᓗᓀᕐᓯᒍᑎᓂ ᐊᓪᓚᑕᐅᒋᐊᓖᑦ, $100 ᖃᑦᑕᕌᕐᑐᑕᒪᑦ $1.00-ᑖᓚᕌᕐᑎᓗᒋᑦ ᐊᑭᓕᕐᑕᐅᒋᐊᓖᑦ ᐊᓯᐅᔨᔭᐅᒐᔭᕐᓂᕈᑎᒃ ᓱᒃᑯᑕᐅᒐᔭᕐᓂᕈᑎᓘᓐᓃᑦ ᐃᒻᒪᖃᐅᑎᑦᓴᖏᓐᓂᒃ ᐊᑭᓖᒍᑎᐅᓂᐊᕐᓗᑎᒃ. ᐃᓚᖏᑦ ᒪᓕᑦᑕᐅᒋᐊᓖᑦ ᐊᑑᑎᔭᐅᒋᐊᖃᕈᑎᒃ ᐊᑑᑎᔭᐅᒋᐊᖃᕐᒥᔪᑦ.
• ᐅᖓᒻᒧᐊᕆᕐᕕᑕᖃᕐᒥᔪᑦ ᐊᑭᓕᕋᑦᓴᖑᑐᐃᓐᓇᕆᐊᓖᑦ ᐊᑐᓂ ᑭᓗᑯᔮᒻᑎᒎᕐᑎᓗᒋᑦ ᐅᖁᒣᓐᓂᖏᑦ ᑐᖕᖓᕕᒋᓗᒋᑦ ᐊᐅᓪᓚᑎᑕᐅᔪᐃᑦ ᐊᒻᒪᓗ ᖃᑦᓯᕌᓪᓗᐊᓂᕃᒍᑏᑦ ᑐᖕᖓᕕᒋᓗᒋᑦ.
• ᐊᓯᖏᑦ ᒪᓕᑦᑕᐅᒋᐊᓕᓐᓄᑦ ᓯᓚᑖᒍᕐᑎᑕᐅᒍᓐᓇᒥᔪᑦ ᐃᓚᖏᑦ ᐅᑦᑑᑎᒋᓗᒋᑦ ᐅᑯᐊ; ᓂᖀᑦ, ᑐᐹᑮ, ᐃᒥᐊᓗᐃᑦ ᐊᒻᒪᓗ ᖁᓪᓕᓴᔦᑦ ᓴᓇᖕᖑᐊᓯᒪᔪᐃᑦ. ᖃᐅᔨᒋᐊᑦᓯᐊᕈᒪᔪᑦ ᑕᒪᒃᑯᐊ ᐊᑭᓖᒍᑎᑦᓴᓄᑦ ᒪᓕᒉᑦ ᐅᕝᕙᓘᓐᓃᑦ ᐱᒍᓐᓇᕕᖃᕐᑎᓯᒍᑏᑦ ᒥᑦᓵᓄᑦ, ᖃᐅᔨᒋᐊᕐᕕᐅᒍᓐᓇᑐᑦ ᐃᓄᐃᑦ ᖃᖓᑦᑕᔫᖏᑦᑕ/ᑎᒻᒥᔫᖏᑦᑕ ᐅᓯᒐᑦᓴᓕᕆᓂᕐᒧᑦ ᐱᒍᑦᔨᕖᑦ ᐅᕝᕙᓘᓐᓃᑦ ᐅᓯᒐᑦᓴᓂᒃ ᐊᑭᓕᐅᕆᒍᓰᑦ ᐊᒻᒪᓗ ᐊᑭᖃᕐᑎᓯᒍᑏᑦ.
• ᐊᓯᐅᔨᔭᕕᓂᕐᓄᑦ ᓱᒃᑯᑕᐅᔪᕕᓂᕐᓄᓘᓐᓃᑦ ᐊᑭᓕᕐᑕᐅᒍᒪᐅᑏᑦ ᖃᑦᓯᓂᒃ ᐊᑭᓕᕐᑕᐅᒍᑎᐅᒋᐊᖃᕐᒪᖔᑕ ᓇᓗᓀᕐᑕᐅᓲᑦ ᐅᖁᒣᓐᓂᖏᑦᑎᒍᑦ ᖃᑦᓯᓂᒃ ᐅᑎᕐᑎᓯᕕᐅᒐᔭᕐᒪᖔᑕ ᐅᕝᕙᓘᓐᓃᑦ ᐊᓯᐅᔨᔭᐅᔪᕕᓂᐅᑐᐊᕐᐸᑕ ᓱᒃᑯᑕᐅᔪᕕᓂᐅᑐᐊᕐᐸᑕᓘᓐᓃᑦ.
• ᓇᓗᓀᕐᑕᐅᓯᒪᖕᖏᑐᐊᕐᐸᑕ ᖃᓄᐃᓪᓗᐊᑐᓂᒃ ᐊᑭᖃᕐᓯᒪᒻᒪᖔᑕ ᐊᐅᓪᓚᑎᑕᐅᔪᕕᓃᑦ ᖃᖓᑦᑕᔫᒃᑯᑦ ᐃᑭᑎᑕᐅᓂᕕᓂᖏᓐᓂᒃ ᐊᓪᓚᓯᒪᒍᑎᓂ, ᐊᑭᓕᕋᑦᓴᖑᕋᔭᕐᓂᖏᑦ $1.10-ᕌᕐᑎᓗᒋᑦ ᑭᓛᒥᑕᐅᒋᐊᑕᒫᑦ ᐅᖓᑖᓄᕐᖃᔭᖕᖏᑐᑦ ᓱᒃᑯᓯᒪᓕᕐᓗᑎᒃ ᑎᑭᕝᕕᒋᔭᒥᓄᑦ ᐊᓯᐅᔨᔭᐅᔪᕕᓂᐅᒍᑎᓪᓘᓃᑦ.

ᐃᓘᓐᓇᖏᓐᓂᒃ ᑐᑭᖏᓐᓂᒃ ᒪᓕᑦᑕᐅᒋᐊᓕᓐᓂᓗ ᐊᐅᓪᓚᑎᑦᓯᒍᑦᔭᐅᓂᕐᒧᑦ ᑐᑭᓯᒋᐊᑦᓯᐊᕈᑏᑦ ᑕᑯᒐᓱᐊᕐᑕᐅᒍᓐᓇᑐᑦ, ᖃᕆᑕᐅᔭᕐᓄᑦ ᐃᓕᓗᒋᑦ ᐊᑦᔨᖏᑦ ᐅᓯᔭᐅᔪᐃᑦ ᐊᑭᖏᑦ ᐊᒻᒪᓗ ᐊᑭᖃᕐᑎᑕᐅᒍᑎᖏᑦ. ᖃᐅᔨᒪᔭᐅᒋᐊᖃᕐᒥᔪᑦ ᐊᓪᓚᓯᒪᔪᐃᑦ ᖃᓪᓗᓈᑎᑐᑦ ᑭᓯᐊᓂ ᐊᓪᓚᓯᒪᒻᒪᑕ.