ᐊᒥᓱᓄᑦ ᓄᓇᓕᓐᓄᑦ
ᐃᓄᑐᖃᖅ ᐅᑎᕐᕕᒋᓗᒋᑦ ᐃᓄᒻᒪᕇᑦ, ᑲᒃᑲᓛᔭᐱᐊᕃᑦ ᓄᑕᕋᓛᓪᓗ X

ᑲᖏᕐᓱᔪᐊᖅ

ᑲᖏᕐᓱᔪᐊᑉ ᓄᓇᓕᖓ ᓇᑉᐸᑕᐅᒪᕗᖅ ᓄᓇᒥ ᑕᑕᒥᓐᓂᐊᓇᕇᔭᕐᓱᓂ-ᑕᑯᒥᓇᕐᑐᒪᕆᐊᓗᒻᒥ, ᐃᓂᓪᓚᑕᐅᒪᑦᓱᓂ ᓲᕐᓗ ᖂᕐᖑᐊᓘᑉ ᖃᒪᓂᖓᓂ ᐊᕙᓗᔭᐅᒪᑦᓱᓂ ᖃᕐᖃᕐᔪᐊᓄᑦ, 10 ᑭᓚᒦᑕᐱᑐᐃᓐᓇᓂᑦ ᐅᖓᓯᓐᓂᖃᕐᓱᓂ ᓄᕗᐊᓘᑉ ᐃᒪᕐᐱᖓᓂᑦ.

ᑕᒫᓂ ᓄᓇᓖᑦ ᐃᓱᒪᓇᕋᔭᖕᖑᐊᖏᑦᑐᒥᒃ ᐱᒍᓐᓇᓯᓯᒪᒍᑎᖃᕐᒥᔪᑦ ᓄᓇᒥ ᐊᓯᐊᓂ ᐱᓂᐊᕐᓂᐅᓲᖑᖕᖏᑐᒥᒃ ᐊᔪᒉᑦᑑᒍᑎᒋᑦᓱᓂᒍ ᐅᑭᐅᒃᑯᑦ ᐅᕕᓗᕐᑕᓲᖑᓂᖓᑦ. ᐃᖏᕐᕋᓂᕐᑐᒧᑦ ᓈᒻᒪᓈᕆᐊᕐᑕᓯᒪᑦᓱᑎᒃ, ᑲᖏᕐᓱᔪᐊᕐᒥᐅᑦ ᑎᓂᑐᐊᕐᒪᑦ ᙯᖕᖑᑉ ᐊᑎᐊᐱᐊᓂ ᑐᕙᕐᒥᒃ ᑐᒐᕐᓱᑎᒃ ᑭᓓᓲᑦ, ᖁᓪᓗᓂᐅᑉ ᐃᓗᐊᓄᑦ ᐳᓚᓂᐊᓕᕋᒥᒃ ᑎᓂᓐᓂᑯᑦ ᐊᓱᐃᓛᒃ ᐹᕐᖑᓱᑎᒃ ᐅᕕᓗᕐᑕᓂᐊᓕᕋᒥᒃ.

1884 ᐊᕐᕌᒍᖓᓂ, ᖃᑦᓴᓐ ᐯ ᑲᒻᐸᓂᒃᑯᑦ ᐱᓇᓱᑦᑎᖏᓐᓄᑦ ᑎᑭᑕᐅᓚᐅᕐᑐᕕᓃᑦ ᑕᒫᓂ ᓄᓇᒥᓐᓂ, ᐃᓂᓪᓓᒍᑎᖃᕈᒪᔪᓄᑦ ᓄᕗᐊᓗᒻᒥᒃ ᐊᕐᖁᑎᖃᕐᐸᓂᐊᕐᓂᒥᒃ ᑕᕆᐅᑉ ᐊᑭᐊᓄᑦ ᓂᐅᕕᐊᑦᓴᑕᕐᑐᑦ ᐊᕐᖁᑎᑦᓴᖓᓐᓂᒃ. ᑌᒣᑦᓱᑎᒃ ᓯᓚᓐᓂᐊᕕᒻᒥᒃ ᓇᑉᐯᓚᐅᕐᑐᕕᓃᑦ ᑲᖏᕐᓱᐃᑦ ᐃᓚᖓᓐᓂ ᖃᓪᓗᓈᕐᑎᑐᑦ ᐊᑦᓯᕋᐅᑎᖃᕐᑎᑕᒥᓐᓂ ᓯᑐᐹᑦ ᑲᖏᕐᓱᖓᓂ, ᑲᔪᖏᕐᓭᒍᑎᒋᓕᕐᓱᒍ ᑲᖏᕐᓱᔪᐊᑉ ᐃᓄᑐᐃᓐᓇᖏᓐᓂᒃ ᐃᓚᐅᖃᑦᑕᓕᕐᑎᓱᒋᑦ ᐊᖁᕕᕋᐅᑎᓂᕐᑎᒍᑦ ᓂᐅᕐᕈᓯᐅᖃᑎᒌᓐᓂᓄᑦ, ᐃᓄᐃᑦ ᕿᓯᔭᓂᒃ ᐳᐊᓗᓕᐊᕆᕙᑦᑕᖏᓐᓂᒃ ᑲᒥᑐᐃᓐᓇᓕᐊᕆᕙᑦᑕᖏᓐᓂᓗ ᓂᐅᕕᕐᐸᓕᕐᓱᑎᒃ ᑕᐅᕐᑎᖃᕐᑎᓗᒋᑦ ᑐᐹᑭᓂᓪᓗ ᖁᑭᐅᑏᓪᓗ ᐊᕐᔭᖏᓐᓂᒃ.

ᐊᕐᕌᒍᖅ 1910-ᖑᓕᕐᑎᓗᒍ, ᒍᐃᒍᐃᒃᑯᑦ ᐱᓇᓱᒐᖃᕐᕕᖁᑎᖓᑦ ᕆᕓᔮᓐ ᕕᕇᕆᒃᑯᑦ ᓇᑉᐯᓕᓚᐅᕐᑐᕕᓂᖅ ᓂᐅᕐᕈᓭᕕᖁᑎᑦᓴᒥᒃ ᑕᒫᓂ, ᐊᕐᕌᒍᐃᓪᓗ ᓯᑕᒪᑦ ᐊᓂᒍᕐᒪᑕ ᖃᑦᓴᓐ ᐯ ᑲᒻᐸᓂᒃᑯᑦ ᓂᐅᕐᕈᓭᕕᒋᕙᓐᓂᐊᑕᒥᓐᓂᒃ ᓇᑉᐯᓕᕐᓂᒥᑦᓱᑎᒃ. ᐊᑯᓂᐊᓘᓪᓗᐊᖏᑦᑐᖅ ᑲᑐᓕᒃᑯᑦ ᑐᑦᓯᐊᕕᖁᑎᒥᓐᓂᒃ ᐃᓂᓪᓓᓕᕐᓂᒥᔪᑦ, ᒪᓕᑦᑕᐅᓴᐅᑎᒋᓚᐅᕐᓯᒪᓐᓂᒥᔪᒥᒃ ᑲᖏᕐᓱᔪᐊᕐᒥᐅᑦ ᐃᓕᓐᓂᐊᕕᑦᑖᕆᐅᕈᑎᖓᓐᓄᑦ, ᑭᖑᓂᐊᒍᓪᓗ ᐋᓐᓂᐊᕕᑦᑖᓕᕐᓂᒥᑦᓱᑎᒃ. ᐋᖕᓕᑲᒃᑯᑦ ᑐᑦᓯᐊᕕᖁᑎᒥᓐᓂᒃ ᓇᑉᐯᓕᕐᓂᒥᔪᑦ 1963-ᖑᓕᕐᑎᓗᒍ ᐊᒻᒪᓗ ᑲᖏᕐᓱᔪᐊᕐᒥᐅᑦ ᓄᓇᓕᖓᑦ ᑯᐊᐸᒥᒃ ᓂᐅᕕᕐᕕᑖᓕᕐᓂᒥᑦᓱᓂ
1970-ᒥ.

1961 ᑎᑭᕋᑕᕐᓱᒍ ᓄᓇᓕᒃ ᑲᕙᒪᒃᑯᓄᑦ ᓇᓗᓀᕐᑕᐅᓯᒪᕋᑕᕐᓂᖏᑦᑐᖅ ᑕᒃᒐᓂ ᐊᕐᕌᒍᒥ ᓇᓗᓀᕐᑕᐅᒐᒥ ᐊᑦᓯᕋᐅᑎᑖᕐᑕᐅᓕᕐᑐᕕᓂᖅ ᒍᐃᒍᐃᑎᑐᑦ ᓰᓐ-ᐋᓐ-ᑕ-ᒪᕆᑰᕐᒥ, ᐃᓄᒃᑎᑐᑦ ᐊᑦᓯᕋᐅᑎᑐᖃᖓ, ᑲᖏᕐᓱᔪᐊᖅ ᐅᑎᑦᓴᕋᑕᓕᓚᐅᕐᓯᒪᔪᖅ ᓄᓇᓕᐅᑦᓱᓂ ᑲᕙᒫᐱᖃᕐᓂᑯᑦ ᓇᓗᓀᕐᑕᐅᓂᖃᓚᐅᕐᓱᓂ ᑭᓯᐊᓂ ᐊᕐᕌᒍᑦ ᐊᒥᓱᑲᓪᓓᑦ ᐊᓂᒍᕐᒥᒪᑕ ᑭᓯᐊᓂ.

ᑲᖏᕐᓱᔪᐊᑉ ᓄᓇᓕᖓ ᐃᓂᓪᓚᑕᐅᒪᔪᖅ ᐅᔭᕋᓐᓂᐊᕋᑦᓴᓕᒻᒪᕆᐊᓘᑉ ᑕᕐᕋᖓᓂ ᖃᓪᓗᓈᕐᑎᑐᑦ ᑭᑉ ᓯᒥᑦᒥᒃ ᖃᐅᑦᔨᑕᐅᒍᑎᖃᕐᑑᑉ. ᐅᔭᕋᓐᓂᐊᓂᕐᓂᒃ ᑕᒫᓂ ᓄᓇᒥ ᐱᓂᐊᕐᓂᖃᖏᓐᓇᒐᓚᓲᑐᖃᐅᔪᑦ ᐊᕐᕌᒍᐃᑦ 1950-ᓃᑦᑐᑦ ᐊᑐᓯᓚᐅᕐᓂᒪᑕᓂᑦ. ᐅᓪᓗᒥᓕ, ᑕᒪᓐᓇ ᓄᓇ ᓴᕐᕿᔮᕐᕕᐳᓄᖅ ᕃᒃᓚᓐ ᐅᔭᕋᓐᓂᐊᓄᑦ, ᓯᓚᕐᔪᐊᓕᒫᒥ ᑮᓇᐅᔭᑦᓴᔭᕐᑕᖃᕐᓱᑎᒃ ᐅᔭᕋᓐᓂᐊᕖᑦ ᐊᑦᓱᐃᓂᕐᐹᖏᓐᓄᑦ ᐃᓚᒋᔭᐅᑦᓱᓂ ᐱᑕᖃᕐᑎᓯᒍᑎᖃᕐᐸᓱᓂ ᐱᓇᓱᒐᕐᓂᒃ ᑲᖏᕐᓱᔪᐊᕐᒥᐅᓄᑦ ᐊᒥᓱᓄᑦ.

ᑕᑯᔭᑦᓭᓗ ᖃᓄᐃᓘᕈᑎᑦᓴᐅᔪᓪᓗ

ᑲᖏᕐᓱᔪᐊᑉ ᓄᓇᓕᖓᑕ ᐊᕙᑖᓂ ᐊᒥᓱᓂᒃ ᓱᓇᓐᓂᐊᕋᑦᓴᑕᖃᕐᑐᖅ ᑕᑯᔭᑦᓴᓕᒻᒪᕆᐅᕐᓱᓂᓗ, ᐃᓚᐅᑎᓪᓗᒋᑦ ᑕᑯᔭᕐᑐᓃᑦ ᐃᓄᐃᑦ ᖃᓇᑦᑕᓕᐅᓂᕋᕐᑕᖓᓐᓄᑦ – ᒪᕐᕈᐃᓕᖓᑦᓱᓂ ᑲᖏᕐᓱᑯᑖᓐᓄᑦ ᖃᕐᖃᔪᐊᕌᓗᖃᕐᓱᓂ. ᖃᓂᖕᖏᑑᖕᖏᑐᒥᓗ ᕿᑭᕐᑖᓗᒻᒥ ᖃᔭᕐᑕᓕᒻᒥᓗ ᐃᑦᓴᓂᑕᖃᕐᓱᓂ ᐃᓄᕐᖃᕕᓃᑦ ᓯᕗᓪᓕᕕᓂᖏᓐᓄᑦ ᐅᔭᕋᓐᓂ ᑮᓇᖕᖑᐊᓂᒃ ᓴᓇᖕᖑᐊᕕᐅᓚᐅᕐᑐᕕᓂᕐᓂᒃ, 1200-ᓂᒃ ᐅᓄᕐᓂᓖᑦ ᐊᕐᕌᒍᐃᑦ ᐊᓂᒍᕐᓯᒪᔪᑦᓴᐅᓕᕐᑐᑦ ᑖᒃᑯᐊ ᓴᓇᔭᐅᓚᐅᕐᑐᕕᓂᐅᑎᓪᓗᒋᑦ. ᑕᑯᑦᓴᐅᒥᔪᑦᑕᐅᖅ ᖃᕐᒪᕕᓃᑦ ᐃᓄᕐᖄᕕᓃᑦ ᑭᖑᓪᓕᕕᓂᖏᓐᓄᑦ ᓴᓇᔭᐅᓯᒪᔪᓂᒃ, ᐊᕐᕌᒍᐃᑦ 800 ᒥᑦᓯᑎᓐᓃᑐᑦ ᐊᓂᒍᕐᓯᒪᓕᕐᑐᑦ ᑖᒃᑯᐊ ᓴᓇᔭᐅᓚᐅᕐᑐᕕᓂᐅᑎᓪᓗᒋᑦ. ᑲᖏᕐᓱᔪᐊᑉ ᓄᓇᓕᖓ ᐃᓂᓪᓚᑕᐅᓯᒪᕗᖅ ᐅᑭᐅᕐᑕᑑᑉ ᓂᕐᔪᑎᖏᓐᓂᒃ ᑕᑯᓐᓇᐅᔮᕐᕕᓯᐊᒻᒪᕆᒻᒥ.

ᑐᑭᖓ

ᑲᖏᕐᓱᒪᕆᐊᓗᒃ

ᐃᓄᖏᑕ ᐅᓄᕐᓂᖏᑦ

605

ᓯᓚᖓ

Today 15°C
Sun 14°C
Mon 14°C