ᐊᒥᓱᓄᑦ ᓄᓇᓕᓐᓄᑦ
ᐃᓄᑐᖃᖅ ᐅᑎᕐᕕᒋᓗᒋᑦ ᐃᓄᒻᒪᕇᑦ, ᑲᒃᑲᓛᔭᐱᐊᕃᑦ ᓄᑕᕋᓛᓪᓗ X

ᑰᒃᔪᐊᖅ

ᐃᓄᖃᕐᓱᓂ 2000-ᓂᑦ ᐊᒥᓲᓂᕐᓴᐅᒪᔪᐊᐱᑐᐃᓐᓇᓂᒃ, ᑰᒃᔪᐊᖅ ᓄᓇᕕᐅᑉ ᓄᓇᓕᓕᒫᖏᓐᓂᑦ ᐃᓄᒋᐊᓐᓂᐹᖑᕗᖅ, ᓄᓇᓕᒃ ᐃᓂᓪᓚᑕᐅᒪᑦᓱᓂ ᓯᕿᓂᐅᑉ ᓂᐱᕝᕕᐊᓂᐅᓂᕐᓴᖅ ᑰᒃᓱᐊᑉ ᑰᖓᓂᑦ 50 ᑭᓚᒦᑕᓂᑦ ᐅᖓᕙᐅᑉ ᑲᖏᕐᓱᖓᓂᑦ ᐃᓗᕙᓯᓐᓂᖃᕐᓱᓂ. ᑰᒃᔪᐊᒥᐅᑦ ᐅᓪᓗᑕᒫᑦ ᐃᓅᓯᖏᑦ ᐊᐅᓚᑕᐅᕗᑦ ᑰᒃᓱᐊᑉ ᑎᓂᑦᑕᓂᖓᓄᑦ ᐅᓕᑦᑕᓂᖓᓄᓪᓗ ᑕᒪᑐᒪ ᐃᒪᐅᑉ ᐃᖏᕐᕋᓂᖓ ᓄᓇᑕᒥᓂ ᑌᒫᑦᓭᓇᓕᖏᓐᓇᑎᑦᓯᓲᖑᖕᖏᒪᑦ ᓱᕐᕃᒪᔪᐹᓗᕙᑦᓱᓂᓗ ᐊᐅᔭᒥ ᐱᓂᐊᕐᓂᐅᒍᓐᓇᑐᓂᒃ. ᑰᒃᔪᐊᖅ ᐊᕙᓗᔭᐅᒪᔪᖅ ᓇᐹᕐᑐᓕᒻᒧᑦ ᓄᓇᒧᑦ, ᐃᒪᕐᓱᔮᒥᓗ ᓇᐹᕐᑐᐃᑦ ᐱᕈᕐᓱᑎᒃ.

ᓯᓚᕐᔪᐊᒥᐅᓄᑦ ᖃᐅᑦᔨᑕᐅᒍᑎᖃᕐᖄᓯᒪᔪᖅ ‘ᕘᑦ ᓭᒨ-ᒥᒃ’ (‘ᓭᒨ’ ᐅᖃᕐᑕᐅᑲᓗᑦᑐᕕᓂᐅᒻᒪᑦ ᐅᖃᐅᓯᕐᒥᒃ ᓭᒧᕐᑖ!-ᒥᑦ ᐱᒋᐊᕐᕕᓕᕕᓂᐅᑦᓱᓂ’), ᐆᒪᔪᐃᑦ ᐊᒥᖏᓐᓂᒃ ᓂᐅᕐᕈᓭᓂᕐᒥᒃ ᐱᓂᐊᕐᓂᖃᕐᑐᑦ ᑐᖕᖓᓱᑦᑎᑕᐅᖏᓐᓇᖃᑦᑕᓯᒪᔪᑦ ᑖᒃᑯᓂᖓ ᐅᖃᐅᓯᕐᓂᒃ ᓂᓪᓕᐅᔭᐅᒍᑎᖃᕐᐸᓱᑎᒃ, ᑭᖑᓂᐊᒍᑦ ᐊᑦᓯᕋᐅᑎᑖᕆᑐᐃᓐᓇᕋᑕᕐᓂᐊᓕᕋᒥᒃ.

ᑌᒪᓕ ᐱᑦᔪᑎᖃᕐᓱᑎᒃ ᐊᑕᓂᐊᓘᑉ ᓄᓇᖓᓂᒥᐅᔭᓂᒃ ᖃᓪᓗᓈᑐᐃᓐᓇᓂᒃ ᒍᐃᒍᐃᒻᒪᕆᓐᓂᓗ ᑕᕆᐅᑉ ᐊᑭᐊᓂᑦ ᐱᓯᒪᔪᓂᒃ ‘ᑕᑯᔨᖃᕐᖄᓯᒪᓂᕐᒥᓂᒃ’ ᑕᒪᓐᓇ ᓄᓇ ᓄᓇᕕᒻᒥᒃ ᓇᓗᓀᕐᑕᐅᒍᑎᖃᓯᓚᐅᕐᑐᕕᓂᖅ, ᓱᖏᐅᓐᓀᑑᒐᓗᐊᖅ ᔮᒪᓃᑦ ᓄᓇᕕᐅᑉ ᐱᕙᓪᓕᐊᓯᒪᓂᖓᓄᑦ ᐃᓚᐅᓂᖏᑦ. ᑕᕆᐅᑉ ᐊᑭᐊᓂᑦ ᐱᔪᑦ ᐃᓄᑐᐃᓐᓇᐅᖏᑦᑐᑦ ᐃᓄᑐᐃᓐᓇᓂᒃ ᑲᑎᓯᒋᐊᖕᖓᓯᒪᓪᓚᕆᑦᑐᑦ ᑕᒃᒐᓂ ᓄᓇᓕᒻᒥ ᑰᒃᔪᐊᒥᒃ ᖃᐅᑦᔨᑕᐅᒍᑎᖃᓕᕐᑐᒥ, ᓱᕐᖁᐃᑐᑦ, ᒧᕇᕕᐊᓐᑯᑦ ᐊᔪᕿᕐᑐᐃᔨᕕᓂᕆᒋᐊᖏᑦ, ᐊᔪᕿᕐᑐᐃᔨᐅᖃᑎᒌᒃ ᐱᐊᓐᔭᒪᓐ ᑰᓪᒣᔅᑕᓗ ᔪᐊᑦᓯ ᑭᒪᒃᓗ, ᑎᑭᓚᐅᕐᑐᕕᓃᒃ ᑰᒃᔪᐊᑉ ᐹᖓᓄᑦ ᓯᕗᓂᖃᕐᓱᑎᒃ ‘ᐄᔅᑭᒨᓂᒃ’ ×ᔅᑑᓯᒥᐅᕈᕐᑎᓯᒋᐊᕐᑐᓇᓱᑦᓱᑎᒃ.

1830 ᐊᕐᕌᒍᖓᓂ, ᖃᑦᓴᓐ ᐯ ᑲᒻᐸᓂᒃᑯᑦ ᐱᕙᓪᓕᐊᑎᑦᓯᒍᑎᖃᓯᓚᐅᕐᓯᒪᓐᓂᖁᑦ ᐆᒪᔪᐃᑦ ᐊᒥᖏᓐᓂᒃ ᒥᕐᖁᓕᓐᓂᒃ ᐊᖁᕕᕋᐅᑎᖃᕐᓂᒥᒃ ᐱᓂᐊᕐᓂᖃᓕᕐᑎᓯᓂᒃᑯᑦ ᑕᒫᓂ ᓄᓇᒥ, ᑕᒪᓐᓇᓗ ᐱᐅᓯᐅᓯᒪᕗᖅ ᑎᑭᑦᓱᒍ ᐊᕐᕌᒍᖅ 1866. (ᐊᔪᒉᑦᑐᒐᓚᐅᔮᕐᑐᖅ, ᐊᓪᓓᑦ ᐄᓐᓄᐃᑦ ᐊᓪᓓᓗ ᓈᔅᑲᐲᑦ ᓂᐅᕐᕈᓯᐅᕆᐊᖃᑕᐅᖃᑦᑕᑐᕕᓂᐅᓂᖏᑦ ᐃᓚᐅᑦᓱᑎᒃ ᑰᒃᔪᐊᑉ ᐃᓄᑐᐃᓐᓇᖏᓐᓄᑦ.) ᓯᓚᕐᔪᐊᒥ ᐅᓇᑕᕐᓇᔪᐊᑉ ᑐᖓᓕᐊᓂ, ᐊᒥᕆᑲᒥᐅᑦ ᒥᕝᕕᓕᐅᓕᓚᐅᕐᓂᒥᔪᑦ ᑯᒐᓘᑉ ᓯᓈᓂ ᓯᕿᓂᐅᑉ ᓂᐱᕝᕕᐊᓂᐅᓂᕐᓴᖅ, ᑐᖕᖓᕕᓕᐅᕆᓪᓚᕆᓕᕐᓱᑎᒃ ᓄᓇᓕᖃᕐᕕᐅᓛᕐᑐᒧᑦ ᑲᓇᑕᐅᑉ ᓄᓇᓕᕐᔪᐊᖓᓄᑦ ᒥᕝᕕᓕᐊᕕᓂᕐᒥᓂᒃ ᐅᑎᕐᑎᓯᓂᖃᓛᕐᓱᑎᒃ ᐅᓇᑕᕐᓂᔪᐊᖅ ᐃᓱᓕᓯᒪᓕᑐᐊᕐᐸᑦ.

1948-ᖑᓕᕐᑎᓗᒍ ᑲᑐᓕᒃᑯᑦ ᑐᑦᓯᐊᕕᖁᑎᒥᓐᓂᒃ ᓇᑉᐯᓕᕐᓂᒥᔪᑦ ᑭᖑᓂᐊᒍᓪᓗ ᐋᓐᓂᐊᓯᕐᕕᓗ, ᐃᓕᓐᓂᐊᑎᑦᓯᕕᓪᓗ, ᓯᓚᓐᓂᐊᕕᓪᓗ ᓇᑉᐸᑕᐅᖃᑦᑕᓕᕐᓂᒥᔪᑦ. ᐊᕐᕌᒍᖅ 1958 ᐊᑐᓕᕐᑎᓗᒍ, ᖃᑦᓴᓐ ᐯ ᑲᒻᐸᓂᒃᑯᑦ ᓄᑦᑎᓕᓚᐅᕐᓯᒪᒻᒥᔪᑦ ᑰᖕᒥᒃ ᐳᓚᒋᐊᕐᓱᑎᒃ ᖃᓂᓪᓕᑎᕐᓱᑎᒃ ᖃᖓᑦᑕᔫᑦ ᒥᕝᕕᖓᓐᓄᑦ ᐊᒥᕆᑲᒥᐅᓄᑦ ᕿᒪᑦᑕᐅᒪᓕᕐᑎᓗᒍ, ᓄᑦᑎᑲᒥᒃ ᒪᓕᑦᑕᐅᓕᓚᐅᕐᑐᕕᓃᑦ ᐃᓚᒌᓄᑦ ᕘᑦ ᓭᒨᒧᑦ ᐅᖓᓯᖕᖏᑐᒥᒃ ᓄᓇᓯᒪᕕᓕᕕᓂᓕᒫᓄᑦ.

ᑕᒐᑕᒐᐅᓕᕐᑐᖅ ᒪᕐᕉᓂᒃ ᖃᖓᑦᑕᔫᓄᑦ/ᑎᒻᒥᔫᓄᑦ ᒥᕝᕕᖃᓕᕐᓱᓂ, ᑰᒃᔪᐊᖅ ᓄᓇᓕᓕᒫᒧᓕᖓᑦᓱᓂ ᖃᖓᑦᑕᔫᓂᒃ/ᑎᒻᒥᔫᓂᒃ ᐊᐅᓚᒍᑎᖃᕐᓂᒧᑦ ᑐᑦᑕᕕᓪᓚᕆᐅᓕᕐᖁᖅ ᓄᓇᓕᒃ ᐱᑕᖃᓕᕐᓱᓂ ᐊᑕᐅᓯᑐᐃᓐᓇᐅᖏᑦᑐᒥᒃ ᑐᔪᕐᒥᐅᕕᒻᒥᒃ, ᓂᕆᕕᓐᓂᒃ, ᓂᐅᕕᕐᓂᐊᕕᓐᓂᓗ, ᐃᓄᐃᓪᓗ ᐱᓕᐊᕕᓂᖏᓐᓂᒃ ᓂᐅᕕᕐᓂᐊᕕᐊᐱᖃᕐᓱᓂ ᑮᓇᐅᔭᒃᑯᕕᑦᑕᖃᕐᓱᓂᓗ.

ᑕᑯᔭᑦᓭᓗ ᖃᓄᐃᓘᕈᑎᑦᓴᐅᔪᓪᓗ

ᐱᑕᓕᒻᒪᕆᐊᓗᒃ ᐊᑦᓛᓐᑎᒃ ᐃᒪᕐᐱᐊᓗᐊᑕ ᓵᒪᖏᓐᓂᒃ ᐃᖃᓗᑉᐱᓂᓪᓗ ᑕᒫᓂ ᓄᓇᒥ. ᑰᒃᔪᐊᑐᖃᕐᓗ ᑕᑯᔭᕐᑐᕋᑦᓴᓯᐊᖑᑦᓱᓂ ᐃᓄᓐᓄᑦ ᐱᕙᓪᓕᐊᓯᒪᓂᕐᓂᒃ ᑐᑭᓯᒪᒍᒪᓂᖃᓲᓄᑦ.

ᑐᑭᖓ

ᑰᖕᒪᕆᐊᓗᒃ

ᐃᓄᖏᑕ ᐅᓄᕐᓂᖏᑦ

2,375

ᓯᓚᖓ

Today 5°C
Sat 1°C
Sun 1°C