ᐊᒥᓱᓄᑦ ᓄᓇᓕᓐᓄᑦ
ᐃᓄᑐᖃᖅ ᐅᑎᕐᕕᒋᓗᒋᑦ ᐃᓄᒻᒪᕇᑦ, ᑲᒃᑲᓛᔭᐱᐊᕃᑦ ᓄᑕᕋᓛᓪᓗ X

ᖁᐊᕐᑕᖅ

ᖁᐊᕐᑕᒥᐅᑦ ᓄᓇᓕᖓᑦ ᐃᓂᖃᕐᐳᖅ ᕿᑭᕐᑖᓗᐃᑦ ᑌᐋᓇᒥᒃ ᖃᓪᓗᓈᕐᑎᑐᑦ ᐊᑦᓯᕋᐅᑎᖃᕐᑎᑕᐅᔪᑦ ᓯᕿᓂᖓᑕ ᓄᐃᕕᐊᓃᓐᓂᓴᐅᑦᓱᓂ ᓄᕗᑯᑖᒻᒥ ᓄᕗᐊᓘᑉ ᐃᒪᕐᐱᖓᓂ ᑲᓱᕐᕕᐅᓱᓂᓗ ᐅᖓᕙᐅᓪᓗ ᓄᕗᐊᓘᓪᓗ ᐃᒪᕐᐱᖏᓐᓄᑦ. ᖃᕐᖄᓗᓕᒃ ᑕᒪᑐᒪ ᑕᕐᕋᖓᓂ; ᑕᒪᑐᒪᓗ ᓯᕿᓂᐊ ᖃᕐᖃᓂᒃ ᒥᑭᔪᖑᐊᖑᓂᕐᓴᓂᒃ ᒪᓃᑦᑐᒪᕆᐊᓗᓐᓂᒃ ᖃᕐᖃᖃᕐᓱᓂ. ᑕᒪᓐᓇ ᓄᓇ ᐆᒪᔪᓕᒻᒪᕆᐊᓗᒃ ᓄᓇᒥᓗ ᐱᓱᑦᑎᓂᒃ ᐃᒪᕐᐱᐅᓗ ᓂᕐᔪᑎᖏᓐᓂᒃ, ᐃᖃᓗᓕᐊᓗᑦᓱᓂᓗ ᑕᕆᐅᕐᒥᐅᑕᓂᓪᓗ ᓂᕿᑦᓴᖃᑦᓯᐊᓱᓂ, ᐃᓚᐅᑎᓪᓗᒋᑦ ᐅᕕᓗᐃᓪᓗ ᑕᓪᓗᕈᓐᓀᓗ ᐊᒻᒨᒪᔪᐃᓪᓗ. ᐃᑦᓴᓂᑕᑕᖏᑦ ᑕᑯᒍᑕᐅᒍᓐᓇᓯᓯᒪᔪᑦ ᑕᒪᓐᓇ ᓄᓇ ᐃᓄᖃᓲᑐᖃᐅᒋᐊᖓ 3500-ᓂ ᐊᕐᕌᒍᓂ ᐊᓂᒍᕐᑐᓂ ᑌᒃᑯᐊᓗ ᑑᓕᐅᓂᕋᕐᑕᐅᓲᑦ ᐃᓄᕐᖃᕕᓃᑦ, ᐅᓪᓗᒥ ᐃᓄᑐᐃᓐᓇᓄᑦ ᓯᕗᓪᓕᕕᓂᕆᔭᐅᓂᐊᖕᖒᕆᔭᐅᔪᑦ ᑕᒪᐅᖓ ᓄᓇᓚᐅᕐᑐᕕᓂᐅᓂᕋᕐᑕᐅᓱᑎᒃ 500-ᓗᓐᓃᑦ 600-ᓗᓐᓃᑦ ᐊᕐᕌᒍᑦ ᐊᓂᒍᓕᕐᑐᑦ ᑌᒪᖕᖓᒥᑦ.

ᐊᕐᕌᒍᑦ 1930-ᓃᑦᑐᑦ ᐱᒋᐊᕐᖃᒥᓕᖕᖏᓂᓕᒫᖏᓐᓂ, ᑖᓐᓇ ᓄᕗᑯᑖᒃ ᐊᑦᓯᕋᐅᑎᖃᕐᓯᒪᔪᖅ ᓄᕗᑯᑖᒥᒃ (ᓄᕗᑯᑖᒃ). ᑭᓯᐊᓂ ᑌᒣᑦᑐᕕᓂᐅᒐᓗᐊᕐᓱᓂ, ᐅᓂᒃᑲᐅᓯᑎᒍᑦ ᖃᐅᑦᔨᑕᐅᔪᖅ, ᐊᖑᑎᖃᓚᐅᕐᑐᕕᓂᐅᒋᐊᖓ ᕿᓚᓗᒐᕐᓂᐊᕆᐊᕐᓯᒪᔪᕕᓂᕐᒥᒃ ᐊᓇᕐᓱᓂ ᑕᑯᓚᐅᕐᑐᕕᓂᕐᒥᒃ ᑐᖁᖓᖕᖏᑐᓂᒃ ᖁᒪᕐᓂᒃ ᐊᓇᕐᒥᓂ — ᑌᒪᖕᖓᒥᑦ ᖁᐊᕐᑕᒥᒃ ᐊᑦᓯᕋᐅᑎᐊᓗᑦᑖᑐᐃᓐᓇᓕᕐᓂᖁᖅ.

ᖁᐊᕐᑕᖅ ᐃᓄᐃᑦ ᐱᕙᓪᓕᐊᓯᒪᓂᖏᑎᒍᑦ ᐃᓄᓐᓄᑦ ᐅᑭᐅᕐᓯᐅᕕᐅᓲᑐᖃᐅᔪᖅ, ᓄᓇᐅᒐᒥ ᓯᓈᖃᕐᓱᓂ ᑐᕙᕐᒥᒃ ᓄᓇᒥᑦ ᐊᕕᐅᑎᒍᓐᓇᑐᒥᒃ ᐅᑭᐅᑐᐃᓐᓇᐅᒐᓗᐊᕐᐸᑦ, ᑌᒣᒃᑲᒥ ᐅᑭᐅᒃᑯᑦ ᐆᒪᔪᓕᐊᓘᔪᖅ ᐊᖑᓇᓱᕝᕕᓯᐊᖑᑦᓱᓂᓗ. ᑕᒪᑐᒥᖓᑦᓭᓇᖅ, ᐊᒥᓱᑦ ᐃᓄᑑᓇᕐᑎᑐᑦ ᓂᐅᕐᕈᓭᔩᑦ ᑕᕆᐅᓪᓗ ᐊᑭᐊᓂᒥᐅᔦᑦ ᓂᐅᕐᕈᓭᔩᑦ ᐅᒃᑯᐃᓯᖃᑦᑕᓯᒪᕗᑦ ᐅᒃᑯᐊᕈᑦᔭᐅᕙᑦᓱᑎᓪᓗ ᓂᐅᕕᕐᑎᓄᑦ ᑖᕙᓂ ᓄᓇᓯᒪᖃᑦᑕᓯᒪᔪᓄᑦ, 1947-ᖑᓕᕐᑎᓗᒍ ᑲᑐᓕᒃᑯᑦ ᑐᑦᓯᐊᕕᖁᑎᒥᓂᒃ ᑎᑭᐅᑦᔨᓕᓚᐅᕐᓯᒪᓐᓂᒥᔪᑦ.

ᖁᐊᕐᑕᖅ ᓄᓇᓕᐊᕉᒋᔭᐅᓗᐊᕐᓯᒪᕗᖅ ᐱᑦᔪᔨᕕᐅᒐᔭᕈᓂ ᐱᑦᔪᔨᒍᑕᐅᓲᓂᒃ ᓄᓇᓕᓐᓂᒃ, ᐊᐅᐸᓪᓛᓇᕐᑐᖃᓚᐅᕐᑎᓗᒍᓗ ᑭᓯᐊᓂ 11-ᓂᒃ ᐃᓅᒍᓐᓀᑫᓯᒪᔪᒥᒃ (ᖁᐊᕐᑕᒥᐅᑦ 10%-ᖏᓐᓂᒃ) ᑲᕙᒪᑐᖃᒃᑯᑦ ᐱᑕᖃᕆᐊᓕᓐᓂᒃ ᐱᑦᔪᔨᒍᑎᓂᒃ ᐱᑕᖃᕐᑎᓯᒋᐊᖕᖓᓯᓚᐅᕐᓯᒪᕗᑦ. ᐋᓐᓂᐊᓯᐅᕐᑎᑖᓚᐅᕐᓯᒪᔪᑦ 1963-ᒥ ᓂᐅᕕᕐᓂᐊᕕᑦᑖᓱᑎᓪᓗ ᐊᓪᓚᑕᕐᕕᑖᕐᓱᑎᓪᓗ ᐅᖃᓕᒪᐅᑎᐅᒍᓐᓇᓱᓂ ᓈᓚᐅᑎᑕᓕᒻᒥᒃ. 1978-ᒥ, ᖁᐊᕐᑕᖅ ᐱᖁᔭᑎᒍᑦ ᐃᓕᑕᕆᔭᐅᔪᒥᒃ ᓄᓇᓕᖕᖑᑎᑕᐅᓂᖃᓕᓚᐅᕐᓯᒪᕗᖅ.

ᐊᒃᐸᑑᖅ, ᐅᖓᓯᑦᑑᓱᓂ ᑕᑯᑦᓴᐅᔪᖅ ᐅᖓᕙᐅᑉ ᐃᒪᕐᐱᖓᓃᑦᓱᓂ ᖁᐊᕐᑕᐅᑉ ᓯᕿᓂᐊᑕ ᓄᐃᕕᐊᓂ, ᖃᐅᔨᒪᔭᐅᔪᑐᖃᐅᔪᖅ ᐁᕝᕙᓂᐊᕐᕕᓯᐊᖑᓂᕐᐹᖑᒋᐊᖓ ᓇᓐᓂᐊᕕᑦᓯᐊᖑᒋᐊᖓᓗ. ᐃᓐᓈᕈᐊᓗᖏᑦ ᒪᓃᑦᑐᐊᓗᐃᑦ ᐅᓪᓗᓕᕕᑦᓯᐊᒪᕆᐊᓗᓲᑦ ᓯᒃᒍᑲᓪᓚᓕᓐᓄᑦ ᐊᑉᐸᓄᑦ.

ᑕᑯᔭᑦᓭᓗ ᖃᓄᐃᓘᕈᑎᑦᓴᐅᔪᓪᓗ

ᑐᕚᓗᒃ (ᑌᐊᓇᐅᑉ ᑲᖏᕐᓱᖓ) ᒪᙯᕝᕕᓯᐊᒻᒪᕆᐊᓘᕗᖅ ᑕᑯᓐᓇᐅᔮᑐᐃᓐᓇᕈᒪᔪᖃᕈᓂᓗ ᓂᕐᔪᑎᓂᒃ ᑌᒣᓗᕐᕕᓯᐊᖑᑦᓱᓂ ᐊᒥᓱᑲᓪᓛᓗᓐᓂᓗ ᐃᑦᓴᓂᑕᓂᒃ ᐱᑕᖃᕐᓱᓂ ᑖᒃᑯᓇᓂ ᕿᑭᕐᑖᓗᓐᓂ ᑕᒪᑐᒪᓂᓗ ᓄᓇᒥ.

ᑐᑭᖓ

ᖁᒪᖅ

ᐃᓄᖏᑕ ᐅᓄᕐᓂᖏᑦ

376

ᓯᓚᖓ

Today 5°C
Sat 10°C
Sun 11°C