ᐊᒥᓱᓄᑦ ᓄᓇᓕᓐᓄᑦ
ᐃᓄᑐᖃᖅ ᐅᑎᕐᕕᒋᓗᒋᑦ ᐃᓄᒻᒪᕇᑦ, ᑲᒃᑲᓛᔭᐱᐊᕃᑦ ᓄᑕᕋᓛᓪᓗ X

ᑯᐯᒃ ᓯᑎ

ᐊᑦᓯᑕᐅᒪᒍᑎᒥᓄᑦ ᐅᖃᕐᑕᐅᒐᒥ, ᑯᐯᒃ ᓯᑎ, ᐅᕝᕙᓗᓐᓃᑦ ᒍᐃᒍᐃᕐᑎᑐᑦ ᐊᑦᓯᕋᐅᑎᒥᑐᑦ ᕕᓪ ᑕ ᑯᐯᒃᒥᒃ, ᑖᓐᓇ ᐃᓪᓗᒐᓴᖃᕐᕕᒃ ᑯᐯᒃᓕᒫᑉ ᓲᕐᓗ ᐆᒻᒪᑎᖓᑐᑦ ᐃᓕᖓᕗᖅ, ᐊᑦᓯᕌᕐᑕᐅᒍᑎᖃᓲᖑᖏᓐᓇᓱᓂᓗ ‘ᓄᓇᓕᕐᓚᐅᑉ ᐃᓪᓗᒐᓴᒻᒪᕆᐊᓂ’ ᑯᐯᒃᒥᐅᓴᔭᓄᑦ ᒍᐃᒍᐃᓄᑦ, ᑯᐯᒃ ᓯᑎ, ᐃᓕᖓᓂᖃᓪᓚᕆᑉᐳᖅ, ᐃᓕᑕᕐᓯᒪᒍᑕᐅᑦᓱᓂ ᐱᕙᓪᓕᐊᓯᒪᓂᕐᓂᒃ ᐃᓗᕐᖁᓯᕐᓂᓗ ᑯᐯᒃᒥᐅᓕᒫᑦ ᑌᒣᓐᓂᖏᓐᓄᑦ ᐊᒥᕆᑫᓪᓗ ᑕᕐᕋᖓᑕ ᓄᓇᓕᒫᖓᓂ ᐃᓪᓗᒐᓴᖃᕐᕕᓄᑦ ᐊᑯᓂᓂᑕᐅᓂᕐᐹᖑᖃᑕᐅᑦᓱᓂ.

ᐊᑦᓯᑕᐅᒪᒍᑎᖓᓪᓛᑦ ‘ᑯᐯᒃ’ ᐱᔭᐅᓯᒪᒻᒪᑦ ᐊᓪᓚᓂᑦ ᐋᓪᑲᓐᑯᐃᓐᓂᑦ, ᑖᒃᑯᐊ ᓄᓇᓕᑐᖃᐅᑦᓱᑎᒃ ᓯᕗᓪᓕᐹᖑᓯᒪᒻᒪᑕ ᓄᓇᓯᒪᒋᐊᖕᖓᑐᓂ ᑯᐯᒃ ᓯᕿᓂᐊᓂ ᑕᕐᕋᐅᓂᕐᓴᒥ ᓯᓈᖓᓂ ᐅᓪᓗᒥ ᑯᐯᒃ ᓯᑎᒥᒃ ᖃᐅᑦᔨᑕᐅᒍᑎᖃᕐᐸᓕᕐᑐᒥ, ‘ᑕᒫᓂ ᑯᒑᓗᒃ ᖂᓐᓂᓕᒃ.’ ᓇᑎᕐᓈᖑᑦᓱᓂ ᐃᒪᐅᑉ-ᓯᓈᓄᑦ ᖃᓂᑦᓱᓂ ᐃᒪᐅᑉ ᓯᓈᑕ ᑕᕐᕋᖓᓃᑦᑐᖅ ᓄᓇᓯᒪᕕᐅᒋᐊᖕᖓᓯᓐᓂᖁᖅ ᒍᐃᒍᐃᒃᑯᓄᑦ ᓄᓇᓂᒃ ᖃᐅᔨᓴᕐᑐᓄᑦ ᐊᕐᕌᒍᖅ 1608-ᖑᑎᓪᓗᒍ ᐃᕐᐸᐸᓪᓕᐊᒐᐅᒐᕐᓯᒪᔪᓄᑦ ᑕᒪᑐᒪ ᓄᓇᐅᑉ ᐃᓐᓈᕈᖏᓐᓄᑦ ᑕᒪᒃᑯᓇᓂᓗ ᓄᓇᓯᒪᕕᖃᓯᔪᕕᓂᐅᒋᐊᖏᑦ ᐊᓯᒥᓄᑦ ᐱᔭᐅᑦᑌᓕᓇᓱᑦᓱᑎᒃ ᐱᑦᔪᑎᓕᕕᓂᐅᒋᐊᖏᑦ ᓇᓗᓇᖕᖏᓚᑦ.

ᑌᒣᒻᒪᑦ ᐃᓪᓗᒐᓴᖃᕐᕕᐅᑉ ᖁᑦᓯᓂᑦᓴᖓᓗ ᐊᓪᓕᐊᓃᓐᓂᓴᕐᓗ ᓯᕗᓪᓕᐹᖑᓯᒪᕘᒃ ᓄᓇᓯᒪᕕᐅᓯᑦᓱᑎᒃ ᑕᒃᒐᓂ ᐃᓪᓗᒐᓴᖃᕐᕕᒥ. ᑖᒃᑯᓇᓂᓗ ᐃᓐᓈᕈᕐᓂ ᐅᓐᓄᐊᑯᑦ 1763 ᐊᕐᕌᒍᖓᓂ ᐃᖕᓚᓐᒥᐅᑦ ᐅᓇᑕᕐᑐᓴᖁᑎᖏᑦ ᓚᒧᖃᕐᓱᑎᒃ – ᐊᒥᓱᕕᐊᓗᑦᓴᓱᑎᒃ ᓵᓚᖃᕐᖃᔦᒪᖃᑦᑕᓚᐅᕐᓱᑎᒃ – ᓵᓚᖃᕈᓐᓇᓯᑦᓴᕋᑕᓕᓚᐅᕐᓂᖁᑦ ᒍᐃᒍᐃᒃᑯᑦ ᓄᓇᑕᕐᖃᒥᕐᒥᓂ ᓄᓇᓯᒪᕕᒋᓕᕐᑕᖓᓂ, ᑌᒫᒃ ᓵᓚᖃᕋᒥᒃ ᑕᒪᑐᒥᖓ ᓄᓇᒥᒃ ᐃᓚᒋᓕᐅᑦᔨᓕᓚᐅᕐᓯᒪᔪᑦ ᐃᖕᓚᓐ ᓄᓇᖁᑎᒐᓵᓗᖏᓐᓄᑦ ᐊᒥᕇᑫᑦ ᓄᓇᖏᑕ ᑕᕐᕋᖓᓂ, ᑕᒪᓐᓇ ᓵᓚᖃᕐᓂᖅ ᐃᓱᓕᑎᑕᐅᑲᓪᓚᓕᓚᐅᕐᓯᒪᒻᒥᔪᖅ ᐊᕐᕌᒍᐃᑦ 13 ᐊᓂᒍᕐᑎᓗᒋᑦ ᐊᒥᕆᑲᒥᐅᑦ ᐅᓇᑕᕐᑕᖃᓯᓂᖓᓐᓄᑦ. ᐅᐱᓐᓇᖁᑎᑦᓯᐊᓱᑎᒃ, ᑯᐯᒃᒥᐅᑦ ᒍᐃᒍᐃᑎᑐᑦ ᐅᖃᐅᓯᕐᖄᓕᖁᑎᖏᑦ ᓵᓚᐅᓪᓚᕆᓚᐅᕐᓯᒪᓐᓂᖏᓪᓗᑯᒐᒥᒃ ᒪᑭᑕᒍᓐᓇᓂᖃᕐᓯᒪᔪᑦ, ᐅᓪᓗᒥᒧᓪᓗ ᑎᑭᑦᓱᑎᒃ ᐅᖃᐅᓯᕐᒥᓂᓪᓗ ᐃᓗᕐᖁᓯᕐᒥᓂᓪᓗ ᑲᔪᓯᑎᑦᓯᒍᓐᓇᓂᖃᓚᕿᕗᑦ.

ᐅᓪᓗᒥᓕ ᑯᐯᒃ ᓯᑎ ᑯᐯᒃ ᓄᓇᓕᕐᓚᖓᑕ ᑲᕙᒪᖓᓄᑦ ᐃᓂᒋᔭᐅᓕᕐᐳᖅ ᓄᓇᖁᑎᐅᓪᓗ ᓲᕐᓗ ᑲᑦᔨᒋᓕᕐᓱᓂᒍ. ᑖᓐᓇ ᐃᓪᓗᒐᓴᖅ ᐃᓄᑦᑕᖏᓪᓗ ᐳᓛᕆᐊᕐᑎᒥᓄᑦ ᑐᖕᖓᓇᕐᑐᒪᕆᐅᔪᑦ. ᐃᓪᓗᔪᐊᖏᑕ ᓴᓇᒻᒪᖏᑦ ᐊᕐᖁᑎᖏᓪᓗ ᖂᑭᑦᑐᐊᐲᑦ ᓲᕐᓗ ᐅᖃᐅᓯᖃᕐᐳᑦ ᐱᔪᕆᐅᑎᖃᑦᓯᐊᑐᒥᒃ ᐱᕙᓪᓕᐊᓯᒪᓂᖃᕐᓂᒥᒃ (ᐅᓪᓗᒥᒧᑦ ᑎᑭᑦᓱᒍ) ᐆᒻᒪᑎᒋᔭᐅᓂᐊᕐᓱᓂ ᒍᐃᒍᐃᑦ ᐊᒥᕆᑫᑦ-ᑕᕐᕋᖓᓐᓂ ᐃᓗᕐᖁᓯᖓᓐᓄᑦ, ᑕᑯᑦᓴᐅᒍᑎᖃᑦᓯᐊᑐᒧᑦ ᐊᒥᓱᐃᓄᑦ ᓇᒻᒥᓂᖅ ᐱᒍᓐᓇᓂᕐᒥᓂᒃ ᐊᑐᕐᑐᓄᑦ ᓴᓇᒪᔪᓕᐅᓲᓄᑦ ᓄᑕᐅᖕᖏᑐᕐᔪᐊᓂᓪᓗ ᓂᐅᕕᐊᑦᓴᓕᓐᓂᒃ ᓂᐅᕕᕐᓂᐊᕕᓐᓄᑦ ᓂᐅᕕᐊᑦᓴᖃᕐᓱᑎᒃ ᐊᑯᓂᓂᑕᓂᒃ, ᐊᔪᒉᑦᑐᓂᒃ ᓂᐅᕕᕐᑕᐅᒍᓐᓇᓲᓂᒃ ᐊᔪᒉᓪᓕᐅᓱᑎᒃ ᓂᐅᕐᕈᔭᕐᑐᓯᒪᔨᒥᓄᑦ.

ᑕᑯᔭᑦᓭᓗ ᖃᓄᐃᓘᕈᑎᑦᓴᐅᔪᓪᓗ

ᐊᕐᕌᒍᑕᒫᑦ, ᐊᖏᔪᒻᒪᕆᒻᒥᒃ ᐱᓂᐊᕐᓂᖃᓲᖑᕗᑦ ᑯᐯᒃᒥ ᐅᑭᐅᒃᑯᑦ ᓇᓪᓕᐅᓂᕐᓯᐅᓂᕐᒥᒃ ᐊᓯᖏᓐᓂᓗ ᐃᓗᕐᖁᓯᕐᑎᒎᕐᑐᓂᒃ ᓇᓪᓕᐅᓂᕐᓯᐅᓂᕐᓂᒃ ᐱᓂᐊᕐᓂᖃᓲᖑᒻᒥᓱᑎᒃ, ᓯᓚᒥ ᓵᓂᓪᓗ ᐃᑦᓯᕙᐅᑕᓂᓪᓗ ᐊᓂᐅᕐᙯᓯᒪᔪᑦ ᐊᒥᓱᑦ ᐱᕙᑦᑎᓗᒋᑦ ᐅᐸᑦᑕᐅᕙᑦᑐᓂᒃ ᑯᐯᒃᒥᐅᓄᓪᓗ ᑯᐯᒃ ᓯᑎᒧᓪᓗ ᐃᓐᓂᐊᓯᒪᔪᓄᑦ, ᓱᓕᑎᑦᓯᖃᑎᒌᓕᕐᐸᑐᓄᑦ ᑖᑦᓱᒪ ᐃᓪᓗᒐᓴᐅᑉ ᐊᑦᔨᐅᖏᑦᑐᒥᒃ ᐅᓪᓗᒥᐅᓕᕐᑐᖅ ᐃᓅᓯᐅᓕᕐᑐᒥᒃ ᐱᓂᐊᕐᓂᖃᕐᕕᐅᓂᖓᓂᒃ ᐊᑕᐅᑦᓯᑯᑦ ᑕᕆᐅᑉ ᐊᑭᐊᓂᑦ ᐃᓗᕐᖁᓯᑐᖃᐅᓯᒪᔪᒥᒃ ᓱᓕ ᑲᔪᓯᑎᑦᓯᓂᖃᖏᓐᓈᒥᑦᓱᑎᓪᓗ.

ᐅᑭᐅᒥ ᓇᓪᓕᐅᓂᕐᓯᐅᓇᖅ ᐱᑕᖃᕐᐸᑐᖅ ᐊᖏᔪᖑᐊᕌᓗᓐᓂᒃ ᓯᑰᑦᓱᑎᒃ ᓯᑐᕋᕐᕕᓕᐊᖑᒪᔪᓂᒃ ᓴᓇᔭᐅᒪᔪᓂᒃ ᖁᕕᐊᓱᐊᕕᑦᓴᐅᑎᓪᓗᒋᑦ ᓯᓚᕐᔪᐊᒥᐅᓄᑦ ᐃᓐᓂᐊᓯᒪᔪᓄᑦ. ᐱᐅᓯᑐᖃᒃᑯᑦ ᑯᐯᒃᒥᐅᑦ ᓂᕐᓯᐅᕈᓯᖏᓪᓗ ᐃᒥᐊᓗᓕᐊᕆᓲᖏᓪᓗ ᐱᔭᑦᓴᐅᑎᑕᐅᓲᖑᒋᕗᑦ. ᓯᑐᕋᐅᓯᔭᐅᑏᓐᓄᑦ ᓯᑮᕐᕕᓯᐊᒻᒪᕆᐊᓘᒻᒥᔪᖅ, ᓵᑦᑐᔮᒧᓪᓗ ᓯᑐᕋᐅᓯᔭᕐᕕᓯᐊᖑᒻᒥᓱᓂ ᐊᓯᖏᓐᓗ ᐅᑭᐅᒥ ᖁᕕᐊᓱᐊᒍᑎᓂᒃ ᐱᓂᐊᕐᓂᖃᕐᕕᐅᒍᓐᓇᑐᑦ ᐃᓪᓗᒐᓴᓄᑦ ᖃᓂᑦᑐᐊᐱᐅᑦᓱᓂ ᐃᓪᓗᒐᓭᑦ ᑕᕐᕋᖓᓃᑦᑐᒥ. ᐊᐅᔭᐅᓕᕐᒪᑦ ᐊᑭᖃᖕᖏᑐᓂᒃ ᐱᑕᖃᕐᑎᓯᒍᑎᖃᓲᖑᒻᒥᔪᑦ ᑯᐯᒃ ᓯᑎᐅᑉ ᐊᐅᔭᒥ ᑐᓴᕐᓈᑎᑦᓯᓂᕐᓄᑦ ᓇᓪᓕᐅᓂᕐᓯᐅᓂᕐᒥᒃ, ᓯᓚᕐᔪᐊᒥᐅᓕᒫᑦ ᐱᖕᖑᐊᓂᖃᕐᕕᒋᒍᓐᓇᓲᖓᓐᓂᒃ. ᑯᐯᒃ ᓯᑎᐅᓪᓗ ᓯᓚᕐᔪᐊᒥᐅᓄᑦ ᑐᓂᕐᕈᑎᒋᓯᒪᔭᖓᑦ, ᓲᖅ ᑐ ᓱᓪᓖ, ᒪᓂᒪᑎᑦᓯᓲᖑᒋᕗᑦ ᐊᑦᔨᖃᖕᖏᑐᒥᒃ ᑕᑯᓐᓇᐅᔮᕐᑎᓯᒍᑎᒋᓲᒥ ᐃᓚᖓᓐᓂᒃ ᓯᓚᒥ ᐅᓐᓄᑯᑦ ᐅᓪᓗᕆᐊᓕᔮᕐᑎᓗᒍ ᑕᑯᓐᓇᐅᔮᕐᑎᓯᓂᖃᕐᓂᕆᓲᒥᓐᓂᒃ ᑕᒣᓐᓄᑦ ᐃᓪᓗᒐᓴᕐᒥᐅᓄᓪᓗ ᐃᓐᓂᐊᓯᒪᒧᕗᓪᓗ. ᕿᒻᒥᔪᐊᓄᑦ ᑲᓕᒑᓗᒃᑯᑦ ᑲᓕᑕᐅᒐᐅᒐᕐᓃᑦ ᐊᑑᑎᔭᒍᓐᓇᕕᖃᑦᓯᐊᖏᓐᓇᓕᒪᓲᖑᔪᑦ ᐊᒻᒪᓗ, ᖃᒻᒥᐅᓂᕐᓴᑯᑦ ᐱᑕᖃᓲᖑᓕᕐᒥᓱᓂ ‘ᓯᑯ ᓯᓂᑦᑕᕕᓕᐊᖑᒪᔪᖅ’ ᑖᓐᓇ ᐊᕐᕌᒍᑕᒫᑦ ᓴᓇᔭᐅᓲᖕᖑᖃᒻᒥᐅᔪᖅ ᓯᓂᑦᑕᕕᐅᒍᓐᓇᓯᐊᕐᓱᓂ ᕿᐅᔭᓇᖕᖏᑐᓂ ᐃᓪᓕᓂ ᓯᑰᒐᓗᐊᕐᓱᑎᒃ ᐆᒪᔪᐃᑦ ᐊᒥᖏᓐᓂ ᖄᖃᕐᓱᑎᒃ-ᐅᐱᓐᓇᑐᕋᑕ ᐃᓱᒪᒋᑦᓱᒋᑦ ᑕᕐᕋᒥᒃ ᓄᓇᓯᒪᕕᖃᕐᖃᓯᒪᔪᑦ ᑌᒫᒃ ᐃᓅᓯᖃᕐᓯᒪᓂᖏᑦ ᑕᒃᒐᓂ ᓄᓇᓕᕐᓚᓯᐊᒻᒪᕆᒻᒥ.

ᑐᑭᓯᒋᐊᒃᑲᓂᕈᒪᔪᑦ ᖃᓄᐃᓘᕆᐊᓪᓛᒍᑎᒋᒍᓐᓇᑕᒥᓅᓕᖓᔪᓂᒃ ᑯᐯᒃ ᓯᑎᒥ, ᑕᑯᒋᐊᕈᓐᓇᐳᑦ ᖃᕆᑕᐅᔭᑎᒍᑦ ᐅᕗᖓ ᐊᒻᒪᐅᑎᓗᑎᒃ.

ᑐᑭᖓ

ᑯᒐᓘᑉ ᖂᑭᓐᓂᖓ (ᐊᓪᑳᓐᑯᐃᓐ ᐊᓪᓓᑦ ᐅᖃᐅᓯᖓᑦ)

ᐃᓄᖏᑕ ᐅᓄᕐᓂᖏᑦ

765,706

ᓯᓚᖓ

Today 18°C
Sat 15°C
Sun 12°C