ᐊᒥᓱᓄᑦ ᓄᓇᓕᓐᓄᑦ
ᐃᓄᑐᖃᖅ ᐅᑎᕐᕕᒋᓗᒋᑦ ᐃᓄᒻᒪᕇᑦ, ᑲᒃᑲᓛᔭᐱᐊᕃᑦ ᓄᑕᕋᓛᓪᓗ X

ᐅᒥᐅᔭᖅ

ᐅᒥᐅᔭᖅ ᓄᓇᓕᓕᐊᖑᒪᕗᖅ ᖃᕐᖃᐅᑉ ᐅᒥᐊᖑᑦᓱᓂ ᐳᓯᖕᖓᔪᔭᕐᑑᑉ ᐊᑎᐊ, ᐃᓄᐃᑦ ᐁᕕᕕᓂᕐᒥᒃ-ᕿᓯᓕᒻᒥᒃ ᐅᒥᐊᑐᖃᑦᓴᔭᖏᑕ ᐊᑦᔨᔪᐊᕆᔮᕐᑕᖓᓂᒃ. ᓄᓇᓕᒃ ᐃᓂᓪᓚᑕᐅᓯᒪᕕᖓᓂᑦ 15 ᑭᓚᒦᑕᓂᒃ ᓯᕿᓂᐅᑉ ᓄᐃᕕᐊᓂ ᐅᖓᓯᓐᓂᖃᕐᓱᓂ ᐱᒻᒥᔪᖅ ᑕᓯᐅᔭᖅ ᖃᓪᓗᓈᕐᑎᑐᑦ ᕆᑦᓯᒪᓐ ᑳᓪᖑᓂᕋᕐᑕᐅᔪᖅ, ᐊᖏᔪᐊᓘᑦᓱᓂ ᐱᖓᓱᓂᒃ ᓯᓇᕐᔪᓕᑦᑎᑐᑦ ᓯᓈᖃᕐᓱᓂ ᐃᓗᐃᓕᕐᒦᓱᓂ ᑲᖏᕐᓱᒃ ᐱᑐᑦᓯᒪᔪᖅ ᑕᓯᐅᔭᕐᔪᐊᒧᑦ ᐱᑐᒍᑎᖃᕐᓱᓂ ᒪᓃᑦᑐᒥᒃ, ᓯᑯᕐᔪᐊᕌᓗᒻᒧᑦ ᒪᓂᕐᖃᑕᐅᒪᒐᓚᑦᑐᒥ ᖁᓐᓂᐊᓗᒻᒥ ᓲᕐᓗ ᑰᕈᐊᓘᔭᕐᑐᒥ. ᐃᒪᐅᑉ ᐃᖏᕐᕋᓂᐊᓗᖏᑦ ᓱᑲᑦᑐᔪᐊᕌᓗᒻᒪᑕ ᑕᒪᓐᓇ ᑐᕙᕐᖃᔭᖕᖏᑐᖅ. ᓯᕿᓂᐅᑉ ᓂᐱᕝᕕᐊᓃᓐᓂᓴᖅ ᓯᓈ ᓯᑦᔭᖃᕐᑐᖅ ᐃᓐᓈᕈᓕᐊᓘᑦᓱᓂᓗ. ᑰᑦ ᑕᓯᐅᔭᒧᑦ ᑰᒃᑐᑦ ᐃᒪᖓᓂᒃ ᐃᓱᕐᑎᓯᖏᓐᓇᓲᑦ, ᑌᒣᒃᑲᓗᐊᕐᓱᑎᒃ ᐋᓇᓐᓄᓗ ᑲᐱᓯᓕᓐᓄᓗ, ᓇᑦᓯᓄᓪᓗ ᕿᓚᓗᒐᕐᓄᓗ ᓇᔪᕐᑕᐅᒍᓐᓇᐸᑦᑐᑦ.

ᑕᒪᓐᓇ ᐃᒪᕐᐱᒧᑦ ᐱᑐᑦᓯᒪᑦᓱᓂ ᓄᓇᐅᑉ ᐊᕙᑎᖓ ᐱᕈᕐᕕᐅᒥᔪᖅ ᓇᐹᕐᑐᓄᑦ ᐱᖏᐅᓂᕋᕐᑕᐅᓲᓄᓪᓗ ᐁᑉᐯᖏᓐᓄᓗ, ᓄᓇᐅ ᓇᐹᕐᑐᓄᑦ ᐱᕈᕐᕕᐅᖃᔭᖕᖏᑑᑉ ᐊᕙᑖᓂ. ᑕᒪᑐᒪ ᓄᓇᐅᑉ ᓯᕿᓂᐊᓂ ᐃᐱᕃᓐᓇᓂᑯᐃᑦ ᖃᑦᓴᓐ ᐯ ᑲᒻᐸᓂᒃᑯᑦ ᓂᐅᕕᕐᕕᖁᑎᕕᓂᖏᑦ ᐱᑕᖃᕐᑐᑦ.

ᑕᓯᐅᔭᐅᑉ ᐃᓐᓈᕈᐊᓗᖏᓐᓂᑦ ᑕᑯᒥᓇᕐᑐᒪᕆᐊᓗᑦᓱᓂ ᑕᓯᐅᔭᕐᔪᐊᑉ ᓯᕿᓂᖓᑕ ᓂᐱᕝᕕᐊ ᓄᐃᑕᑦᓯᐊᐳᖅ ᐸᑎᕐᑑᓗ ᕿᑭᕐᑕᖏᑦ ᖃᓂᑦᑑᓱᑎᒃ ᓄᐃᑕᑦᓯᐊᒥᔪᑦ. ᖃᕐᓴᐅᓗ, ᒥᑏᓪᓗ ᑭᒃᒐᕖᓪᓗ ᑕᒫᓂ ᐅᓪᓗᓕᓯᒪᓲᑦ ᐊᐅᔭᒥ. 30 ᑭᓚᒦᑕᓂ ᑕᕐᕋᐅᓂᕐᓴᒦᑦᑎᓗᒍ ᐸᑎᕐᑑᑉ ᑰᖓ, ᓄᓇᐅᑦᓱᓂ ᑕᑯᒥᓇᕐᑐᐊᓗᒻᒥᒃ 30-ᒦᑕᓂᒃ ᑭᖏᓐᓂᓕᒻᒥᒃ ᖁᕐᓗᑐᐊᓗᑦᑕᓕᒃ.

ᐃᓄᐃᑦ ᐊᖏᖃᑎᒌᒐᓱᐊᕐᓂᖃᕐᓱᑎᒃ ᐊᓪᓚᓯᒪᔪᕐᑕᓰᔭᐅᓚᐅᕐᓯᒪᕗᑦ ᑌᑦᓱᒪᓂ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ 1975-ᒥ ᐱᑕᖃᕐᑎᓯᒍᑎᓕᐅᕐᓱᑎᒃ ᓄᑦᑎᑎᑕᐅᓂᕆᒐᔭᕐᑕᖓᓐᓂᒃ ᐃᓄᑐᐃᓐᓀᑦ ᑰᒃᔪᐊᕌᐱᖕᒥᐅᑦ ᑕᓯᐅᔭᒧᑦ, ᐊᓱᐃᓛᒃ 1982, ᓂᕈᐊᕐᓂᑯᑦ ᑐᑭᑖᕈᑎᓕᐅᕐᓱᑎᒃ, ᑐᑭᑖᓕᓚᐅᕐᓯᒪᕗᑦ ᓄᓇᓕᓕᐅᓛᕆᐊᒥᒃ ᓄᓇᓕᖃᕐᕕᐅᓚᐅᕐᓯᒪᖕᖏᑐᒥ ᐃᓄᑐᐃᓐᓇᑎᒍᑦ ᐱᐅᓯᑐᖃᕐᒥᓂᒃ ᑲᔪᓯᑎᑦᓯᕕᒋᓛᕐᑕᒥᓐᓂᒃ ᓄᓇᒥ ᐃᖃᓗᖃᕐᓱᓂᓗ ᐆᒪᔪᓕᒻᒥ ᓱᕐᕋᑕᐅᓂᖃᕐᓂᐅᔭᖕᖏᑐᓂᒃ ᑰᓐᓂᒃ ᐃᑯᒪᐅᑎᑦᓴᓕᐅᕐᓂᓄᑦ. ᐊᒥᓱᕕᑦᓱᑎᒃ ᐃᑦᓴᓂᑕᓂᓪᓗ, ᓄᓇᒨᓕᖓᔪᓂᓪᓗ ᓄᓇᐅᓪᓗ ᐊᑐᕐᑕᐅᓂᑦᓴᖓᓄᑦ ᐊᑐᐃᓐᓇᕈᕐᑎᕆᒍᑎᓂᒃ ᖃᐅᔨᓴᕈᑎᖃᖃᑦᑕᓚᐅᕐᓱᑎᒃ, ᓴᓇᒋᐊᖕᖓᓯᓚᐅᕐᓯᒪᕗᑦ ᓄᓇᓕᐊᐱᑦᓴᒥᒃ 1985 ᐊᐅᔭᒐᓂ ᐱᔭᕇᓚᐅᕐᓯᒪᔭᒥᓐᓂᒃ ᑏᓯᒻᐱᕆ 1986-ᖑᓕᕐᑎᓗᒍ, ᑖᒃᑯᓇᓂ ᐅᓪᓗᓂ ᓄᓇᓕᑦᑖᖃᒻᒥᓛᕐᓂᐊᑐᑦ ᐊᐅᓪᓛᓯᒪᕕᖃᕐᓯᒪᔪᑦ ᓄᓇᓕᑦᑖᓴᒥᓐᓂᒃ.

ᑕᑯᔭᑦᓭᓗ ᖃᓄᐃᓘᕈᑎᑦᓴᐅᔪᓪᓗ

ᑕᑯᔭᕐᑐᕋᑦᓴᓯᐊᖑᔪᖅ ᖃᓯᒋᐊᓕᒃ ᑕᓯᖅ, ᑯᐯᒃ ᓄᓇᓕᕐᓚᖓᓂ ᑕᓯᓕᒫᓄᑦ ᐊᖏᓂᕐᐹᓄᑦ ᐱᖓᔪᒋᔭᐅᔪᖅ ᐊᓪᓕᖓᓗ ᓇᑦᓯᓕᒃ ᑕᓯᖅ ᑕᒃᒐᓂ ᑕᓯᕐᒥ ᓇᑦᓯᓂᒃ ᖃᓯᒋᐊᖑᓂᕋᕐᑕᓂᒃ ᑕᕆᐅᖑᖕᖏᑐᒥ ᐃᒫᓂᓱᓂᒃ ᐱᑕᖃᕐᑐᖅ. ᐅᒥᐅᔭᐅᑉ ᑲᕙᒫᐱᒃᑯᖏᑕ ᐊᓪᓚᕕᖓᓂ, ᑕᑯᔪᓐᓇᑐᑎᑦ ᓄᐊᑕᐅᒪᔪᓂᒃ ᐃᓄᐃᑦ ᓴᓇᕐᕈᑎᑦᓴᔭᑐᖃᖏᓐᓂᒃ ᐃᓪᓘᓗ ᐱᐅᒃᑯᑎᑦᓴᔭᖏᓐᓂᒃ ᐊᓯᖏᓐᓂᓗ ᓴᓇᔭᐅᒪᔪᓂᒃ ᑕᑯᔭᐅᖃᑦᑕᓯᒪᑦᓱᑎᒃ ᐃᑦᓴᓂᑕᕐᓂᐊᓱᑎᒃ ᓄᓇᒥᒃ ᓴᒃᒐᑐᓄᑦ ᐅᒥᐅᔭᐅᑉ ᓄᓇᓕᖓ ᓴᓇᔭᐅᓯᓪᓚᕆᓚᐅᕐᑎᓇᒍ ᑕᑯᔭᐅᖃᑦᑕᑐᕕᓂᐅᔪᓂᒃ.

ᑐᑭᖓ

ᐅᒥᐊᖑᔮᕐᑐᖅ

ᐃᓄᖏᑕ ᐅᓄᕐᓂᖏᑦ

444

ᓯᓚᖓ

Today -23°C
Wed -14°C
Thu -6°C