ᐊᑯᓕᕕᒃ

ᐊᑯᓕᕕᒃ ᓄᓇᐅᕗᖅ ᑕᓯᐅᔭᕐᔪᐊᒧᑦ ᑎᑭᐅᑎᔪᒥᒃ ᓄᕗᑯᑖᖃᕐᓱᓂ. ᐃᒪᕐᐱᐅᑉ ᐊᕙᑖᓂᑦᑐᖅ ᓄᓇᖓ ᐊᑦᔨᒋᔭᐅᔮᕐᑐᖅ ᓲᕐᓗ ᑲᑭᕙᖕᒧᑦ, ᐃᓄᐃᑦ ᐱᐅᓯᑐᖃᕐᒥᒍᑦ ᐱᖓᓱᓕᐅᑦᓱᓂ ᐃᐳᑯᑖᖃᕐᓱᓂᓗ ᐃᖃᓗᓐᓂᐅᑎᑐᖃᖓᓐᓄᑦ.

ᖃᖓᑦᑕᐅᓯᕆᑦ
ᑐᑭᖓ ᑲᑭᕙᐅᑉ ᑲᑮᒍᑎᖏᑕ ᐊᑯᓪᓕᐹᖓᑦ–ᐱᖓᓱᓂᒃ ᑲᐴᑎᓕᒃ ᐃᖃᓗᓐᓂᐅᑎ
ᐃᓄᖏᑕ ᐅᓄᕐᓂᖏᑦ 507
ᐅᖃᐅᓰᑦ ᐃᓄᒃᑎᑐᑦ, ᖃᓪᓗᓈᑎᑐᑦ
ᐅᓪᓗᒥ
 
ᖃᐅᑉᐸᑦ
 
ᖃᐅᑉᐸᓵᓐ
 

ᑕᕐᕋᒧᑦ ᓵᖕᖓᔪᖅ, ᐱᐅᓯᕐᓱᑐᒥᒃ ᑲᖏᕐᓱᑯᑖᒥᒃ ᐅᕐᖁᐊᓕᓂᖃᑦᓯᐊᑐᖅ ᓄᓇᓕᒻᒧᑦ ᐅᖂᑕᑦᓯᐊᖑᑦᓱᓂ ᐅᑭᐅᕌᓗᒻᒥ ᐊᓄᕆᔭᐅᓪᓗᐊᕇᒃᑯᑎᐅᓲᒥᒃ. ᑐᕓᕈᐊᕐᑐᒐᓚᒻᒪᕆᐅᓲᖅ, ᓄᓇᒥ ᐊᕙᑎᖓ ᐱᒐᓱᕝᕕᐅᓯᑦᓴᐅᑎᒋᒍᓐᓇᓲᖅ ᒪᙯᑎᓄᑦ. ᐊᑯᓂᓂᑖᓗᐃᑦ ᓇᑦᓰᑦ ᓴᐅᓂᕕᓂᖏᑦ ᓯᑦᔭᒥ ᓯᖃᓕᐊᕈᕐᓯᒪᔪᑦ ᓱᕐᖁᐃᓯᒪᒍᑕᐅᔪᑦ ᓯᓚᕐᔪᐊᖅ ᓯᑯᐊᓗᒻᒧᑦ ᐅᓕᑕᐅᒪᓚᐅᕐᓂᕕᓂᖓᑕ ᐊᐅᑉᐸᓕᐊᓯᒪᓂᖓᓂᒃ ᑌᒪᖕᖓᒥᑦ ᐊᕐᕌᒍᑦ 10,000 ᐊᓂᒍᕐᑐᑦ

ᑭᑎᑦᓴᐅᖏᑦᑐᑦ ᑕᓯᒐᓵᓗᐃᑦ ᖃᕐᖄᓗᐃᓪᓗ ᓄᓇᓕᐅᑉ ᐊᕙᑖᓂᑦᑐᑦ ᓄᓇᓐᓇᕆᔭᐅᑦᓱᑎᒃ ᐊᕿᒃᒋᓄᑦ, ᐅᖃᓕᕐᓄᓗ ᑎᕆᒐᓐᓂᐊᓄᓪᓗ. ᑕᕐᕋᒦᓐᓂᓭᑦ ᕿᑭᕐᑌᑦ ᐊᐅᔭᒥ ᑎᖕᒥᐊᖃᐅᑎᐅᓲᑦ ᖃᓄᐃᑦᑐᑐᐃᓐᓈᓗᓐᓄᑦ ᑎᑭᑕᐅᒪᑦᓱᑎᒃ. ᑭᓯᐊᓂᓕ ᑕᓯᐅᔭᕐᔪᐊᑉ ᐃᒪᕐᐱᖓᑕ ᐃᖏᕐᕋᓂᖏᑦ ᐅᓄᕐᓯᒍᐊᕐᑑᕕᐅᓲᖑᕗᑦ ᓂᕐᔪᑎᓄᓪᓗ ᐃᒪᐅᓪᓗ ᐱᕈᕐᑐᖏᓐᓄᑦ. ᐅᑭᐅᒥ ᐅᑦᑑᑎᒋᓗᒋᑦ, ᐊᑯᓕᕕᒻᒥᐅᑦ ᐊᓯᒥᓄᑦ ᐱᐅᓯᕆᔭᐅᖕᖏᑐᓂᒃ ᐅᕕᓗᕐᑕᓂᕐᒥᒃ ᐱᓇᓱᒍᑎᖃᓲᖑᓂᖓᑦ. ᑐᕙᕐᒥ ᑭᓪᓚᓕᐅᕐᓱᑎᒃ ᓄᓗᐊᓂᒃ ᓄᕕᔨᒍᓯᕐᓯᒪᔪᓂᒃ ᕿᔪᑯᑖᒥᒃ ᐃᐳᖃᕐᑎᓗᒋᑦ ᐅᕕᓗᕐᑕᕈᑎᖃᓲᖑᒐᒥᒃ.

ᓄᓇᓕᖓ ᑲᕙᒪᓄᑦ ᓇᓗᓀᕐᑕᐅᓂᖃᕐᓯᒪᔪᖅ 1976-ᒥ, ᐊᑯᓕᕕᐅᑉ ᐱᕙᓪᓕᐊᓯᒪᓂᖓ ᐊᕙᖓᓂᑐᖄᓗᒃ ᐱᒋᐊᕐᓯᒪᔪᖅ ᐊᕐᕌᒍᒐᓵᓗᐃᑦ ᑕᐅᓴᓐᑎᓃᑦᑐᑦ ᐅᖓᑖᓄᑦ, 1750 ᐊᕐᕌᒍᖓᓃᓕᕐᑎᓗᒋᑦ ᑭᓯᐊᓂ ᕿᑭᕐᑕᖅ ᐊᑯᓕᕕᒻᒧᑦ ᐅᖓᓯᑦᑑᖏᑦᑐᖅ ᖃᓪᓗᓈᓄᑦ ᐊᑦᓯᑕᐅᓕᑌᓐᓇᓯᒪᒐᓗᐊᕐᑎᓗᒍ ᓇᓗᓀᕐᓯᒍᑎᐅᑦᓱᓂ ᐊᖑᑎᒥᒃ ᐊᑎᓕᒻᒥᒃ ᑖᒪᔅ ᓯᒥᑦᒥᒃ, ᓂᐅᕐᕈᓭᔨᐅᓯᒪᑦᓱᓂ, ᐊᐅᓚᑦᓯᔨᒻᒪᕆᒋᔭᐅᒋᐊᖕᖓᓯᒪᔪᒥᒃ ‘ᖃᐅᔨᒪᓇᕇᖕᖏᑐᓂᒃ ᐱᒐᓱᑦᑕᖃᓲᓄᑦ’ ᐊᑑᑎᒋᐅᕐᑐᕕᓂᐅᑦᓱᓂᓗ ᑲᓇᑕᐅᑉ ᑕᕐᕋᖓᒍᑦ ᐃᒪᕐᐱᐅᑉ ᐁᑉᐹᓄᑦ ᐃᑳᕈᑎᐅᒍᓐᓇᑐᒥᒃ.

1922 ᐊᕐᕌᒍᖓᓂ, ᖃᑦᓴᓐ ᐯ-ᑯᑦ ᐃᓂᓪᓓᓚᐅᕐᑐᕕᓂᐅᔪᑦ ᓂᐅᕕᕐᑏᑦ ᓂᐅᕐᕈᓭᕕᑦᓴᖓᓐᓂᒃ ᐅᓪᓗᒥ ᐊᑯᓕᕕᒻᒥᐅᓄᑦ ᓄᓇᓕᖃᕐᕕᐅᓕᕐᑐᒥ, ᐊᕐᕌᒍᑦ ᓯᑕᒪᑦ ᐊᓂᒍᑐᐊᕐᒪᑕ ᓄᑦᑎᑕᐅᓚᐅᕐᑐᕕᓂᕐᒥᒃ ᐅᐸᒋᐊᖓ ᐃᓱᐊᕐᓂᓴᒨᕐᑕᐅᓱᓂ ᕿᑭᕐᑕᔪᐊᒥ. ᐊᕐᕌᒍᑦ ᐊᓂᒍᐊᑎᓪᓗᒋᑦ, ᐃᓄᐃᑦ ᑕᒃᑯᖓ ᓂᐅᕕᕐᑎᑯᑦ ᓄᓇᓯᒪᕕᒋᕙᓕᕐᑕᖓᓄᑦ ᓄᓇᓯᒪᖃᑕᐅᒋᐊᕐᑐᐸᓕᕐᓂᒥᔪᑦ, ᐊᐅᔭᐅᓕᕐᒪᑦ ᓄᓇᒋᕙᓕᓚᐅᕐᑕᒥᓄᑦ 1952-ᒥ ᐅᒃᑯᐊᑕᐅᓂᖃᖕᖏᓂᓕᒫᖓᓂ, ᐃᓄᐃᑦ ᓄᓇᓕᖃᖃᑦᑕᓯᒪᒐᑎᒃ ᐊᓱᐃᓛᒃ ᐳᕕᕐᓂᑐᒧᑦ ᓄᓇᒋᐊᕐᑐᑲᑕᓐᓂᐊᓕᕐᒪᑕ, ᐳᕕᕐᓂᑐᖅ ᖃᓂᓐᓂᐸᐅᓐᓂᒪᑦ ᓂᐅᕕᕐᑎᓄᑦ ᓄᓇᓯᒪᕕᐅᔪᓂ.

ᑭᓯᐊᓂ ᑌᒃᑯᐊ ᐃᓄᐃᑦ ᐊᓂᕐᕋᖃᑦᓯᐊᕈᓐᓀᓚᐅᕐᑐᕕᓃᑦ ᓄᓇᓕᐊᐱᒻᒥᓂᒃ ᓄᕗᑯᑖᒥᑦᑐᒥᒃ ᐳᐃᒍᓚᐅᕐᓯᒪᓐᓂᖏᑦᑐᑦ. 1973-ᒥᓂᑦ, ᐊᒥᓱᑦ ᐃᓚᒌᑦ ᐅᑎᓯᓚᐅᕐᓯᒪᔪᑦ ᓄᓇᓕᒻᒥᓂᒃ-ᓇᑉᐯᒋᐊᒃᑲᓂᕆᐊᕐᑐᓱᑎᒃ ᓯᕗᓕᒥ ᓄᓇᖓᓐᓂᒃ ᓄᓇᓯᒪᕕᖃᕆᐊᓪᓚᓚᕆᒋᐊᕐᑐᓯᑦᓱᑎᒃ.

ᑕᑯᔭᑦᓭᑦ ᖃᓄᐃᑐᑐᐃᓐᓀᓗ ᓱᓇᓐᓂᐊᕋᑦᓭᑦ

ᐅᐱᕐᖓᓴᒥ ᐊᑯᓕᕕᓕᐊᑦᓴᕈᕕᑦ, ᑕᑯᔭᕐᑎᑕᐅᒋᐊᖃᕐᐳᑎᑦ ᐅᓪᓗᓕᒫᖅ ᐊᐅᓪᓚᓯᒪᑎᑕᐅᓗᑎᑦ ᕿᑭᕐᑕᔪᐊᒧᑦ ᑕᒃᑲᓂ ᑕᒪᖏᓐᓂᒃ ᓂᕐᓕᓂᓪᓗ ᑲᖑᕐᓂᓗ ᑕᑯᒐᔭᕐᑐᑎᑦ ᑎᕿᐊᔭᓕᕐᑎᓗᒋᑦ ᐅᐱᕐᖏᕕᒻᒥᓄᑦ ᐅᑭᐅᕐᓯᐅᕕᒻᒥᓂᑦ ᓯᕿᓂᕐᒥᑦ ᐱᓗᑎᒃ.

ᐊᑦᔨᓕᐅᕐᑐᕕᓂᖅ/ᐊᑦᔨᓕᐅᑐᕕᓃᑦ : Mathieu Goupil

ᐊᑎᐁ?

ᐊᑯᓕᕕᓕᐊᕆᑦ ᐃᓄᐃᒃᑯᑎᒍᑦ.

ᖃᖓᑦᑕᐅᓯᕆᑦ

ᓄᓇᓖᑦ ᐅᐸᑦᑕᐅᔪᑦ
ᑐᑭᓯᒋᐊᒃᑲᓂᒃᑭᑦ ᓄᓇᕕᐅᑉ ᓄᓇᓕᖏᓪᓗ ᐊᓯᓕᒫᖏᓪᓗ ᐱᑐᕝᕕᒋᓯᒪᔭᕗᑦ
ᐊᐅᓪᓚᕕᒋᓲᕗᑦ