ᑲᖏᕐᓱᐊᓗᒃᔪᐊᖅ

ᑕᕐᕋᒥᒃᑲᓗᐊᕐᓱᓂ, ᑰᕈᖅ ᐱᕈᕐᑐᖃᑦᓯᐊᑐᒻᒪᕆᐅᕗ. ᑌᑦᓱᒪᓂᐅᓕᕐᑐᖅ ᐊᓪᓛᑦ ᓄᓇᓕᒃ ᓇᐹᕐᑐᓂᒃ ᐱᓇᓱᒐᕆᑦᓱᒋᑦ ᓇᑲᑎᕆᖃᑦᑕᓯᒪᕗᖅ.

ᐊᖑᓇᓱᑦᑎᓄᓪᓗ, ᐃᕐᖃᑕᒐᕐᒧᓗ ᐃᖃᓗᓐᓂᐊᑎᓄᑦ ᐊᓯᖏᓐᓄᓗ ᒪᙯᖕᖑᐊᒐᓚᑐᐃᓐᓇᕆᐊᒥᒃ ᖁᕕᐊᒋᔭᓕᓐᓄᑦ ᑕᒪᑐᒪ ᓄᓇᖓ ᐅᐸᒐᑦᓴᓯᐊᒻᒪᕆᐊᓘᔪᖅ. ᑲᖏᕐᓱᐊᓗᒃᔪᐊᑉ ᑐᑦᑐᖏᑕ—ᕿᑐᕐᖏᐅᕕᖏᑦ, ᑖᒃᑯᐊ ᑐᑦᑐᓂ ᑲᑎᖕᖓᔪᓂ ᐊᒥᓲᓂᕐᐹᖑᓇᓱᒋᔭᐅᔪᑦ ᓯᓚᕐᔪᐊᒥ ᖃᓐᑕᑕᐅᓴᐅᓈᕐᑎᔪᓂᒃ ᐅᓄᕐᓂᖃᒐᓱᒋᔭᐳᒧᑦ ᑐᑦᑐᐃᑦ—ᐅᖓᓯᑦᑑᖏᑦᑐᑦ. ᑰᖏᑦ ᐃᖃᓗᓕᐊᓗᐃᑦ, ᐃᖃᓗᑉᐱᓂᓪᓗ ᓵᒪᓂᓪᓗ. ᑕᑉᐸᐅᖓ ᑲᖏᕐᓱᐊᓗᒃᔪᐊᑉ ᑰᒐᓗᐊᓄᑦ ᐳᓚᒍᕕᑦ 64 ᑭᓚᒦᑕᓄᑦ ᑎᑭᐅᑎᒐᔭᕐᑐᑎᑦ ᖁᕐᓗᑐᐊᓗᒻᒧᑦ, ᑕᒫᓂ ᒪᙯᕝᕕᓂᒃ ᐊᐅᓪᓛᓯᒪᕕᖃᕐᑐᑦ ᐃᖃᓗᓐᓂᐊᑎᓄᑦ ᐱᐅᒋᔭᐅᔪᒻᒪᕆᓐᓂᒃ.

ᐊᑦᓯᕋᐅᑎᖃᕐᑎᑕᐅᒍᑎᖃᕐᒥᓱᓂ ‘ᔫᐊᑦᓯ ᕆᕙᒥ,’ ᑲᖏᕐᓱᐊᓗᒃᔪᐊᖅ ᓄᓇᓕᕈᓕᑌᓐᓇᓯᒪᕗᖅ 1960-ᓂ, ᖃᑦᓴᓐ ᐯ ᑲᒻᒪᓂᒃᑯᑦ ᓂᐅᕕᕐᕕᖁᑎᖃᖃᑦᑕᓯᒪᔪᑐᖃᐅᒐᓗᐊᕐᑎᓗᒋᑦ ᐊᐅᓪᓚᐸᒃᓱᑎᓪᓗ ᐅᑎᕐᐸᓱᑎᒃᓘᑐᓂᒃ, ᐊᕐᕌᒍᑦ 1838 - 1932 ᐊᑯᓐᓂᖓᓂ, ᑌᒪᓕ ᐃᓄᐃᑦ ᐊᐅᔭᕐᓯᐅᕈᒪᓲᑐᖃᐅᓂᕐᓴᑐᖃᐅᓯᒪᔪᑦ ᑕᕆᐅᑉ ᓯᓈᓂᐅᓂᕐᓴᖅ ᐅᑭᐅᕈᑦᔭᐅᒐᒥ ᓄᓇᕐᐸᓯᐅᓂᕐᓴᒦᓯᓲᖑᑦᓱᑎᒃ 50 ᑭᓚᒦᑕᓂᒃ ᑕᕆᐅᑉ ᓯᓈᓂᑦ ᐅᖓᓯᓐᓂᓕᒻᒥ ᓄᓇᒥ. 1959-ᒥ ᐃᓄᐃᑦ ᑯᐊᐸᒋᐊᓯᓚᐅᕐᓯᒪᔪᑦ ᑯᐊᐸᖕᖑᐸᓛᓕᕐᑐᑦ ᓯᕗᓪᓕᐹᑦᓯᐊᖓᓂᒃ ᓇᑉᐯᓱᑎ ᓂᐅᕐᕈᓭᕕᒋᓯᑦᓱᒍ ᐃᖃᓗᑉᐱᓂᒃ ᓄᓇᕕᒻᒥᐅᔭᓂᒃ. ᓄᓇᓕᐅᓂᐊᓕᕐᑐᒥ ᓴᓇᒋᐊᖕᖓᓯᑦᓱᑎᒃ 1962-ᒥ ᑕᒃᑯᖓ ᓄᐊᑐᐃᓐᓇᓯᒪᔪᑦ ᐊᕙᑎᓕᒫᖓᓂ ᓄᓇᓕᑲᓪᓛᖑᓱᕕᓃᑦ. ᑭᖑᓂᐊᒍᑦ ᐃᓕᓐᓂᐊᕕᓕᐅᕐᓱᑎᓪᓗ, ᑯᐊᐸᒃᑯᓗ ᓂᐅᕕᕐᕕᑖᕐᓱᑎᒃ ᑲᕙᒪᑐᖃᒃᑯᓗ ᐃᓪᓗᔪᐊᖁᑎᖏᑦ ᓇᑉᐸᑕᐅᑦᓱᑎᒃ ᐱᓕᓚᐅᕐᓯᒪᔪᑦ. 1980-ᖑᓕᕐᒪᑦ ᑭᓯᐊᓂ ᑲᖏᕐᓱᐊᓗᒃᔪᐊᖅ ᓄᓇᓕᐅᓂᖓ ᑲᕙᒪᑎᒍᑦ ᓇᓗᓀᕐᑕᐅᓚᕆᓕᑌᓐᓇᓯᒪᔪᖅ.

ᑲᖏᕐᓱᐊᓗᒃᔪᐊᒥ ᐱᑕᖃᑦᓯᐊᑐᖅ ᐊᑦᓛᓐᑎᒃ ᓵᒪᖏᓐᓂᒃ ᐃᖃᓗᑉᐱᓂᓪᓗ, ᑐᑦᑐᓯᐅᕐᕕᓯᐊᖑᑦᓱᓂᓗ. ᑭᖏᑦᑐᓄᑦ ᒪᔪᕋᕆᐊᒥᒃ ᐱᒐᓱᐊᓲᑦ ᐆᑦᑐᕈᓐᓇᓯᐊᕐᑐᑦ ᑐᕐᙰᑦ ᖃᕐᖄᓗᖏᓐᓂᒃ ᒪᔪᕋᕆᐊᒥᒃ ᓛᐸᑐᐊᑉ ᓯᑦᔭᖓᓄᑦ ᑎᑭᐅᑎᔪᓂᒃ ᑖᒃᑯᓂᖓ ᖃᕐᖄᓗᓐᓂᒃ ᐃᓚᐅᑎᓪᓗᒍ ᖃᕐᖄᓗᒃ ᑭᖏᓐᓂᐹᖓ 1652-ᒦᑕᓂ ᐳᕐᑐᓂᓕᒃ ᖃᕐᖃᖓ ᑎ ᐃᐲᕐᕖ. ᓯᓚᒦᒋᐊᒥᒃ ᐊᓕᐊᒋᔭᓖᑦ ᖃᐅᔨᓴᕐᑕᖃᕈᓐᓇᒥᔪᑦ ᑰᕈᒃ ᑰᒐᓗᐊᓂᒃ, ᐊᑉᓗᕕᐊᖅ ᖂᕐᖑᐊᓗᐊᓂᓪᓗ, ᔪᐊᑦᓯ ᕆᕙᒥᓗ ᕿᓕᓐᓗ ᖁᕐᓗᑐᐊᓗᖓᓂ ᐅᐸᑦᑕᐅᒍᓐᓇᑑᓐᓂᒃ ᓄᓇᒃᑯᓗ ᐃᒫᒍᓪᓗ. ᓂᕐᔪᑏᑦ ᑕᑯᑦᓴᐅᕙᑦᑐᑦ ᐃᓚᖃᕐᑐᑦ ᑐᑦᑐᓂᒃ, ᐊᒃᓵᓗᓐᓂᒃ, ᑎᕆᒐᓐᓂᐊᓂᒃ ᐊᒪᕈᕐᓂᓗ.