ᑰᑦᔪᐊᖅ

ᑰᒃᔪᐊᖅ ᖃᐅᔨᒪᔭᐅᒍᑎᖃᕐᖄᓚᐅᕐᓯᒪᕗᖅ ᖃᓪᓗᓈᑎᑐᑦ ᐊᑦᔨᕋᕐᑕᐅᒍᑎᖃᕐᓱᓂ ᕘᐊᑦ ᓭᒨ-ᖑᓂᕋᕐᑕᐅᓱᓂ “ᓭᒨ” ᐃᓄᐃᑦ ᐅᖃᐅᓯᖓ “ᐊᒡᒐᑎᓄᑦ ᑎᒎᑎᓗᓄᒃ ᓭᒧᕐᓗᒃ” ᓚᔪᖅ ᑯᑕᑦᑐᓄᑦ ᐆᒪᔪᐃᑦ ᐊᒥᖏᓐᓂᒃ ᒥᕐᖁᓕᓐᓂᒃ ᓂᕐᕈᓭᔩᑦ ᑐᖕᖓᓱᑦᑎᑕᐅᖏᓐᓇᐸᓐᓂᒪᑕ ᓭᒨᕐᓱᒋᓪᓗ, ᑭᖑᓂᐊᒍᑦ ᑌᒫᒃ ᑰᒃᔪᐊᖅ ᐊᑦᓯᕋᐅᑎᑖᕐᑕᐅᓯᒪᔪᖅ.

ᓯᕗᓪᓕᐹᑦᓯᐊᖑᑦᓱᑎᒃ ᑕᕆᐅᕐᔪᐊᑉ ᐊᑭᐊᓂᒥᐅᔦᑦ ᐃᓄᑐᐃᓐᓇᓂᒃ ᑲᑎᓯᒋᐊᖕᖓᓚᐅᕐᑐᕕᓃᑦ ᑰᒃᔪᐊᖑᓂᕋᕐᑕᐅᔪᒥ, ᓱᕐᖁᐃᓇᕐᑐᑦ, ᒧᕃᕕᐊᓐᖑᓂᕋᕐᑕᐅᔪᐃᑦ ᐊᔪᕿᕐᑐᐃᔨᕕᓂᕆᒋᐊᖏᑦ, ᐊᔪᕿᕐᑐᐃᔨᐅᖃᑎᒌᒃ ᐱᐊᓐᔭᒪᓐ ᖁᓪᒥᐊᔅᑐ ᐊᒻᒪᓗ ᔮᔨ ᑭᒧᑦᔅ, ᑎᑭᓚᐅᕐᑐᕕᓃᒃ ᑰᑦᔪᐊᑉ ᐹᖓᓄᑦ ᓵᒋᐊᕐᑎᓯᒍᒪᓂᕐᒥᓂᒃ ᐃᓄᑐᐃᓐᓇᓂᒃ ᓯᕗᓂᖃᕐᓱᑎᒃ.

1830 ᐊᕐᕌᒍᖓᓂ, ᖃᑦᓴᓐ ᐯ ᑲᒻᐸᓂᒃᑯᑦ ᐆᒪᔪᐃᑦ ᐊᒥᖏᓐᓂᒃ ᒥᕐᖁᓕᓐᓂᒃ ᑕᐅᕐᓰᖃᑦᑕᐅᑎᖃᖃᑦᑕᓱᑎᒃ ᓂᐅᕕᕐᑎᓯᒍᑎᖃᖃᑦᑕᓯᓚᐅᕐᑐᕕᓃᑦ ᐃᓄᓐᓂᒃ, 1866 ᐊᕐᕌᒍᖓ ᑎᑭᕋᑕᕐᓱᒍ. ᐊᔪᒉᑦᑑᒐᓚᐅᓯᒪᔪᑦ, ᐊᓪᓓᑦ ᒨᑕᓀᑦ ᓇᔅᑳᐱᓪᓗ ᓂᐅᕕᕈᑎᑦᓴᒥᓂᒃ ᓂᐅᕐᕈᓭᒋᐊᕐᑐᖃᑦᑕᑐᕕᓂᐅᓂᖏᑦ, ᐃᓄᓐᓂᒃ ᓄᓇᓕᒻᒥᐅᓂᒃ ᐃᓚᖃᕐᓱᑎᒃ. ᓯᓚᕐᔪᐊᒥ ᐅᓇᑕᕐᓂᔪᐊᖃᕐᑎᓗᒍ ᑐᖓᓕᖓᓂᒃ, ᐊᒥᐊᔨᑲᒥᐅᑦ ᐅᓇᑕᕐᑎᓄᑦ ᑐᑦᑕᕕᓕᐅᕐᓯᒪᔪᑦ ᑯᒑᓘᑉ ᓯᓈᓂ ᓯᕿᓂᐅᑉ ᓂᐱᕕᐊᓂᐅᓂᕐᓴᖅ, ᑲᓇᑕᐅᑉ ᓄᓇᓕᕐᔪᐊᖓᓄᑦ ᐅᑎᕐᑎᑕᐅᓕᓚᐅᕐᓂᒥᔪᖅ ᐅᓇᑕᕐᓂᔪᐊᖅ ᐃᓱᓕᑐᐊᕐᒪᑦ.

1948-ᖑᓕᕐᑎᓗᒍ, ᐃᑦᓯᔭᕐᔪᐊᑯᑦ ᑐᑦᓯᐊᕕᒻᒥᓂᒃ ᓇᑉᐯᓕᕐᓂᒥᔪᑦ ᑭᖑᓂᖓᒍᓪᓗ ᐋᓐᓂᐊᓯᐅᕐᕕᒃ ᐃᓕᓐᓂᐊᕕᓪᓗ ᓯᓚᓐᓂᐊᕕᓪᓗ ᓇᑉᐸᑕᐅᖃᑦᑕᓕᕐᓂᒥᔪᑦ. 1958 ᐊᕐᕌᒍᖓ ᐊᑐᓕᕐᑎᓗᒍ, ᖃᑦᓴᓐ ᐯ ᑲᒻᐸᓂᒃᑯᑦ ᓄᑦᑎᓕᓚᐅᕐᓯᒪᒻᒥᔪᑦ ᑰᒻᒧᑦ ᐳᓚᒋᐊᕐᓱᑎᒃ ᖃᓂᓪᓕᑎᕋᓱᐊᕐᓱᑎᒃ ᖃᖓᑦᑕᔫᑦ/ᑎᒻᒥᔫᑦ ᒥᕝᕕᖓᓄᑦ ᐊᒥᔨᑲᒥᐅᓄᑦ ᕿᒪᑦᑕᐅᒪᓕᕐᑎᓗᒍ, ᓄᑦᑎᒪᑕ ᒪᓕᑦᑕᐅᓕᓚᐅᕐᓂᒥᔪᑦ ᐃᓚᒌᓄᑦ ᐃᓄᓐᓄᑦ ᕘᐊᑦ ᓭᒨᒧᑦ ᓄᑦᑎᑎᓪᓕᒋᑦ.

ᒫᓐᓇᐅᓕᕐᑐᖅ/ᑕᒐᑕᒐᐅᓕᕐᑐᖅ ᒪᕐᕉᓂᒃ ᖃᖓᑦᑕᔫᓄᑦ/ᑎᒻᒥᔫᓄᑦ ᒥᕝᕕᖃᓕᕐᑐᖅ, ᑰᒃᔪᐊᖅ ᓄᓇᓕᓕᒫᓄᑦ ᑐᑦᑕᕕᓪᓚᕆᐅᓕᕐᓱᓂ ᖃᖓᑦᑕᔫᓄᑦ/ᑎᒻᒥᔫᓄᑦ, ᓯᓂᑦᑕᕕᖃᕐᓱᓂ, ᓂᕆᕕᖃᕐᓱᓂᓗ, ᓂᐅᕕᕐᓂᐊᕕᖃᕐᓱᓂ, ᐃᓄᐃᓪᓗ ᑕᑯᒥᓇᕐᑐᓕᐊᕆᓯᒪᔭᖏᓐᓂᒃ ᓴᓇᓯᒪᔭᖏᓐᓂᓗ ᓂᐅᕕᕐᕕᑕᖃᕐᓱᓂ ᐊᒻᒪᓗ ᑮᓇᐅᔭᒃᑯᕕᑦᑕᖃᕐᓱᓂ.

ᐊᑦᓛᓐᑎᒃ ᐃᒪᕐᐱᖓᓂᒥᐅᔭᓂᒃ ᓵᒪᓂᒃ ᐃᖃᓗᑉᐱᓂᓪᓗ ᐱᑕᖃᒻᒪᕆᑦᑐᖅ ᑰᒃᔪᐊᑉ ᓴᓂᐊ. ᑰᒃᔪᐊᑐᖃᕐᓗ ᑕᑯᔭᕐᑐᕋᑦᓴᓯᐊᖑᑦᓱᓂ ᐃᓄᐃᑦ ᐱᕙᓪᓕᐊᓯᒪᓂᖏᓐᓂᒃ ᑐᑭᓯᒍᒪᓂᖃᓲᓄᑦ ᐳᓛᕆᐊᕐᕕᓴᑦᓯᐊᖑᑦᓱᓂ.