ᐊᑐᐊᕐᓗᒋᑦ ᐃᓘᓐᓇᑎᒃ ᖃᐅᔨᑎᑦᓯᒍᑏᑦ
ᑰᒃᔪᐊᕌᐱᒃ

ᑰᒃᔪᐊᕌᐱᐅᑉ ᓄᓇᓕᖓᑕ ᓯᑦᔭᖓ ᓯᐅᕋᔮᖅ ᑰᒃᔪᐊᕌᐱᐅᑉ ᑰᖓᑕ ᐹᖓᓂᑦᓱᓂ.

ᖃᖓᑦᑕᐅᓯᕆᑦ
ᑐᑭᖓ ᑰᒑᐱᒃ
ᐃᓄᖏᑕ ᐅᓄᕐᓂᖏᑦ 1517
ᐅᖃᐅᓰᑦ ᐃᓄᒃᑎᑐᑦ, ᖃᓪᓗᓈᑎᑐᑦ, ᐊᓪᓚᑎᑐᑦ ᑯᔩᑎᑐᑦ
ᐅᓪᓗᒥ
 
ᖃᐅᑉᐸᑦ
 
ᖃᐅᑉᐸᓵᓐ
 

ᑕᕆᐅᑉ ᓯᓈᓂᑦᓱᓂ, ᑕᓯᐅᔭᕐᔪᐊᑉ ᐃᒪᕐᐱᖓ ᑖᕗᖓᓕᒫᑦᓯᐊᖅ ᑕᑯᑦᓴᐅᓱᓂ ᐊᒻᒪᓗ ᐃᓐᓇᓖᑦ ᕿᑭᕐᑕᖏᑦ ᓄᓇᒧᑦ ᐅᖓᓯᑦᑑᔭᒐᑎᒃ ᑕᑯᑦᓴᐅᒥᔪᑦ.ᐃᓐᓇᓕᖏᑦ ᙯᕐᑐᔮᒍᑦᓱᑎᒃ ᓯᑦᔭᒧᑦ ᓯᑐᔪᑦ ᐃᒪᕐᐱᒧᑦ, ᐅᖓᑖᒍᑦ ᓄᓇᒧᑦ ᓵᖓᓱᑎᒃ ᐃᓐᓈᕈᖃᕐᓱᑎᒃ. ᓯᓈᖓᑕ ᑲᖏᐊᓂ ᓄᓇᖓ ᓄᓇᔭᓕᒃ ᒪᓂᕐᓂᒃ ᐊᒻᒪᓗ ᐅᔭᕋᔮᒍᑦᓱᓂ ᑖᕗᖓᓕᒫᒍᔮᕐᑐᖅ ᐃᔨᓐᓄᑦ ᑕᑯᑦᓴᐅᔪᓂᒃ. ᑕᓯᐅᔭᕐᔪᐊᖅ ᕿᑭᕐᑌᓗ ᑕᕆᐅᕐᒥᐅᑕᓄᑦ ᑎᒻᒥᐊᓄᑦ ᓇᔪᕐᑕᐅᓲᑦ, ᓇᑦᓯᓄᓪᓗ, ᐊᕐᕕᐊᓗᓐᓄᓗ ᐊᒻᒪᓗ ᕿᓚᓗᒐᕐᓄᑦ.

ᑰᒃᔪᐊᕌᐱᒃ ᓄᓇᕕᒻᒥ ᓄᓇᓕᓕᒫᓂ ᓯᕿᓂᕐᒦᓂᕐᐸᐅᕗᖅ ᐊᒻᒪᓗ ᐊᑦᔨᐅᖏᑦᑑᒍᑎᖃᕐᓱᓂᓗ ᑕᒣᓐᓄᑦ ᐃᓄᑐᐃᓐᓇᓄᑦ ᐊᓪᓚᓄᓪᓗ ᑯᔩᓄᑦ ᓄᓇᓯᒪᕕᐅᓂᕐᒥᓄᑦ. 150 ᒥᑦᓵᓂᑦᑐᑦ ᐃᓄᐃᑦ ᐊᓪᓚᓄᑦ ᓯᓵᓯᐱᒥᐅᓄᑦ ᓄᓇᕐᖃᑎᒋᔭᐅᒻᒥᔪᑦ (ᒣᓚᓯᒃᑯᓂ); ᑰᒃᔪᐊᕌᐱᐅᑉ ᓄᓇᓕᖓ ᐊᓪᓚᑎᑐᑦ ᒍᐊᑉᒪᑰᔅᑐᐃ ᑐᑭᖓ “ᕿᓚᓗᒐᕐᑕᓕᒃ” ᑭᓯᐊᓂ ᐅᐃᒍᐃᑎᑐᑦ ᐊᑦᓯᕋᐅᒍᑎᖃᕐᒥᓱᓂ “ᐴᔅ ᑕᓚ ᐸᓓᓐ,”, ᑲᓇᑕᒥ ᓄᓇᓖᑦ ᐊᒥᓲᖕᖏᑐᑦ ᐱᖓᓱᓂᒃ ᐊᑦᔨᕋᕐᑕᐅᒍᑎᖃᕐᑎᓗᒋᑦ, ᑰᒃᔪᐊᕌᐱᒃ ᐊᑦᓯᕋᕐᑕᐅᒍᑎᖃᖃᑕᐅᔪᑐᒻᒥᔪᖅ ᐱᖓᓱᓂᒃ.

ᐃᓄᐃᓪᓗ ᐊᓪᓓᓗ ᑯᔩᑦ ᓯᕗᓪᓕᕕᓂᖏᑦ, ᓄᓇᕐᖃᑎᒌᑦᓯᒪᔪᑐᖄᓗᐃᑦ ᐊᑯᓂᓂᐊᓗᒃ ᐊᕐᕌᒍᐃᑦ 3,000 ᒥᑦᓵᓂᐅᒍᓇᐅᔪᖅ. ᖃᑦᓴᓐ ᐯ ᑯᒻᐸᓂᒃᑯᑦ ᓂᐅᕕᕐᕕᖁᑎᒥᓂᒃ ᐅᒃᑯᐃᓯᓚᐅᕐᑐᕕᓃᑦ 1820 ᐊᕐᕌᒍᖓᓂ ᑕᒐᑕᒐ/ᒫᓐᓇ ᐅᓪᓗᒥᒧᑦ ᑖᕙᓂᑦᓭᓇᖅ ᓂᐅᕕᕐᕕᒃ ᓄᓇᓯᒪᔪᖅ ᑰᒃᔪᐊᕌᐱᒻᒥ. ᓂᐅᕕᕐᕕᒥᓂᒃ ᐅᒃᑯᐃᓯᒍᑎᖃᓗᐊᖕᖑᐊᓚᐅᕐᑐᕕᓃᑦ ᕿᓚᓗᒐᕐᓂᐊᓂᕐᓄᑦ ᑮᓇᐅᔭᓕᐅᕋᓱᐊᕈᒪᑦᓱᑎᒃ ᐊᒻᒪᓗ ᐆᒪᔪᐃᑦ ᒥᕐᖁᖏᓐᓂᒃ ᓂᐅᕕᖃᑦᑕᕈᒪᑦᓱᑎᒃ ᑮᓇᐅᔭᓕᐅᕋᓱᐊᕈᑎᒋᓗᒋᑦ. ᐊᖕᒃᓕᑲᒃᑯᑦ ᑐᑦᓯᐊᕕᖏᑦ ᑐᑦᓯᐊᕕᒻᒥᓂᒃ ᓇᑉᐯᓚᐅᕐᑐᕕᓃᑦ 1882-ᒍᑎᓪᓗᒍ ᐊᒻᒪᓗ ᐃᑦᓯᔭᕐᔪᐊᑯᑦ ᑐᑦᓯᐊᕕᖁᑎᒥᓂᒃ ᓇᑉᐯᓂᐊᓕᕐᒥᒪᑕ 1890 ᐊᕐᕌᒍᖓᓂ. ᑲᕙᒪᑐᖃᒃᑯᑦ ᓯᓚᓐᓂᐊᕕᖁᑎᑦᓴᒥᓂᒃ ᓇᑉᐯᓚᐅᕐᑐᕕᓂᐅᒐᓗᐊᕐᑎᓗᒋᑦ 1895 ᐊᕐᕌᒍᖓᓂ, ᐋᑐᒍᐊᒥ ᑲᕙᒪᑐᖃᒃᑯᑦ ᐋᓐᓂᐊᓯᐅᕐᑎᖃᕐᓂᓂᒃ ᐱᒍᑦᔨᒍᑎᖃᓯᓕᑌᓐᓇᓯᒪᔪᑦ ᐊᒻᒪᓗ ᐳᓖᓯᖃᕐᑎᓯᓂᕐᓂᒃ 1900 ᐊᕐᕌᒍᖏᑦ ᐱᒋᐊᕐᖃᒥᐅᑎᓪᓗᒋᑦ ᑭᓯᐊᓂ ᑖᕙᓃᓯᓚᐅᕐᓂᒥᔪᑦ.

ᑰᒃᔪᐊᕌᐱᐅᒃ ᓄᓇᓕᖓᑕ ᐊᖏᓕᕙᓪᓕᐊᓂᖓ ᐊᖏᓕᕙᓪᓕᐊᓯᑲᓪᓚᓯᒪᔪᖅ 1930 ᐊᕐᕌᒍᖏᑦ ᐱᒋᐊᕐᓯᒪᔪᑐᖃᐅᓕᕐᑎᓗᒋᑦ. ᓯᓚᕐᔪᐊᒥ ᐅᓇᑕᕐᓂᔪᐊᖃᕐᑎᓗᒍ ᑐᖓᓕᐊᓂᒃ, ᐊᒥᐊᔨᑲᒥᐅᑦ ᓴᓇᓯᓚᐅᕐᑐᕕᓃᑦ ᐅᓇᑕᕐᑎᓴᓄᑦ ᑐᑦᑕᕕᐅᓂᐊᕐᑐᒥᒃ ᑎᒻᒥᔫᓄᑦ/ᖃᑦᑕᔫᓄᑦ ᒥᕝᕕᒥᓪᓗ ᓴᓇᑦᓱᑎᒃ, ᑲᓇᑕᐅᑉ ᑲᕙᒪᑐᖃᒃᑯᓄᑦ ᐅᑎᕐᑎᑕᐅᓚᐅᕐᑐᕕᓃᑦ 1948 ᐊᕐᕌᒍᖓᓂ ᐊᒻᒪᓗ ᐅᓇᑕᕐᑏᑦ ᓈᓚᐅᑎᖏᓐᓂᒃ ᑲᒪᔨᒋᔭᐅᓯᑦᓱᑎᒃ ᓴᓇᔭᐅᓚᐅᕐᑐᕕᓂᕐᓂᒃ 1955 ᐊᕐᕌᒍᖓᓂ ᐊᑦᓛᑎᒃ ᐃᒪᕐᐱᖓᓂᑦ (ᑲᓇᑕᒥ ᓯᕿᓂᐅᑉ ᓄᐃᕕᖓᑕ ᐃᒪᕐᐱᖓᓂᑦ) ᑕᓯᐅᔭᕐᔪᐊᒧᑦ 55 ᓄᓇᕐᔪᐊᒥ ᐃᑳᖓᔫᑉ ᑭᓪᓕᖓᒍᑦ. ᑭᓯᐊᓂ ᑰᒃᔪᐊᕌᐱᒻᒥᐅᑦ ᐃᓄᒋᐊᓐᓂᖏᑦ ᐃᑭᓪᓕᐅᒥᓪᓚᕆᓚᐅᕐᓯᒪᔪᑦ 1985-ᒥ ᐃᓚᒌᑦ ᐊᒥᓱᐃᑦ ᓄᑦᑎᑐᐊᕐᒪᑕ ᓄᓇᓕᐅᑉ ᐊᓯᐊᓄᑦ, ᐅᒥᐅᔭᒧᑦ, 160 ᑭᓛᒥᑕᓂᒃ ᑕᕐᕋᒧᑦ ᐅᖓᓯᕐᓂᖃᕈᓇᐅᔪᒧᑦ, ᓄᑦᑎᓚᕿᓚᐅᕐᓯᒪᔪᐃᑦ ᓯᕘᕋᕐᓱᑎᒃ ᑰᒃᔪᐊᕌᐱᐅᑉ ᑰᖓ ᐃᑯᒪᓐᓂᐊᑎᒃᑯᓄᑦ ᐱᓇᓱᐊᕐᕕᐅᓂᖓᓄᑦ ᓱᕐᕋᑕᐅᓂᐊᖕᖒᓯᑦᓱᑎᒃ.

ᑕᑯᔭᑦᓭᑦ ᖃᓄᐃᑐᑐᐃᓐᓀᓗ ᓱᓇᓐᓂᐊᕋᑦᓭᑦ

ᐃᓐᓇᓖᑦ ᕿᑭᕐᑕᖏᑦ ᑕᑯᓂᐊᖕᖑᐊᕋᑦᓴᐅᕗᑦ, ᐊᒥᒐᖕᖏᑐᓂᒃ ᐆᒪᔪᓂᒃ ᖃᓄᐃᑦᑐᑐᐃᓐᓇᓂᒃ ᐱᑕᖃᓲᒍᒻᒪᑕ. ᓄᓇᕙᓯᒥ, ᑰᑦ ᑲᑕᑦᑐᑲᓪᓚᖏᑦ ᑕᑯᔭᕕᓂᕆᓗᒋᑦ ᐳᐃᒍᕐᓴᐅᓚᐅᕐᓯᒪᓂᐊᕈᓐᓀᓱᑎᒃ ᐃᕐᖃᐅᒪᓇᕐᑐᐃᑦ. ᓄᓇᓕᒻᒥ ᑕᑯᒍᓐᓇᕋᔭᕐᑐᓯ ᐊᓪᓚᖑᐊᕐᑎᐅᓯᒪᔫᕐ ᐁᑑ ᐅᐃᑖᓗᑦᑑᑉ ᐊᓪᓚᖑᐊᕐᓯᒪᔮᐱᖏᓐᓂᒃ ᔩᓱᓯᖕᖑᐊᒥᒃ ᐃᒪᒃᑯᑦ ᐱᓱᑦᑐᖑᐊᒥᒃ ᑐᑦᓯᐊᕕᒻᒥ ᑰᒃᔪᐊᕌᐱᐅᑉ ᑰᖓᒍᑦ. ᐊᓯᒪᐅᑕᖅ ᐃᓕᓴᕐᕕᒥ ᑕᑯᑦᓴᐅᒥᔪᑦ ᐁᑑᑉ ᐊᓪᓚᖑᐊᕐᓱᒋᑦ ᓴᓇᖕᖑᐊᖃᑦᑕᓯᒪᔭᖏᑦ ᒥᖑᐊᕐᓯᒪᔭᖏᓪᓗ ᑕᑯᑦᓴᐅᒥᔪᑦ ᐃᓕᓴᕐᕕᒥ.

ᐊᑦᔨᓕᐅᕐᑐᕕᓂᖅ/ᐊᑦᔨᓕᐅᑐᕕᓃᑦ: Camille Lapointe

ᐊᑎᐁ?

ᐅᓪᓗᒥ ᑰᒃᔪᐊᕌᐱᓕᐊᓕᕆᑦ ᐃᓄᐃᒃᑯᑎᒍᑦ

ᖃᖓᑦᑕᐅᓯᕆᑦ

ᓄᓇᓖᑦ ᐅᐸᑦᑕᐅᔪᑦ
ᑐᑭᓯᒋᐊᒃᑲᓂᒃᑭᑦ ᓄᓇᕕᐅᑉ ᓄᓇᓕᖏᓪᓗ ᐊᓯᓕᒫᖏᓪᓗ ᐱᑐᕝᕕᒋᓯᒪᔭᕗᑦ
ᐊᐅᓪᓚᕕᒋᓲᕗᑦ