ᓚ ᑲᕌᓐ (ᑰᓐᓂᐊᑎᒃᑯᑦ)
<ᓚ ᑲᕌᓐ, ᐊᓪᓚᓄᑦ ᑯᔩᓄᑦ, ᓯᓵᓯᐱᐅᓂᕋᕐᑕᐅᓲᒍᒻᒥᔪᖅ ᐊᓪᓚᓄᑦ ᑖᕙᑦᓱᒪᐅᑉ ᒥᑦᓯᓕᒫᖓᓂ ᓄᓇᓕᓐᓄᑦ, ᑰᕌᓗᖓᓗ ᑯᐯᒃᓕᒫᒥ ᑰᓄᑦ ᐊᖏᓂᕐᐸᐅᓂᕋᕐᑕᐅᔪᓄᑦ ᑐᖓᓕᕆᔭᐅᑦᓱᓂ ᐊᖏᓂᖓ.
ᑯᐯᒃᑯ ᑲᕙᒪᖓ ᐃᑯᒪᓐᓂᐊᕕᓕᐅᕈᒪᓯᓚᐅᕐᓯᒪᔪᑦ ᔦᒥᔅ ᐯ ᓄᓇᖓᑕ ᒥᑦᓵᓂ 1970 ᐊᕐᕌᒍᖏᑦ ᐱᒋᐊᕐᖃᒥᐅᑎᓪᓗᒋᑦ. ᓯᕗᓪᓕᐹᒥ ᐃᓄᑐᐃᓐᓇᓄᑦ ᐊᒻᒪᓗ ᐊᓪᓚᓄᑦ ᓄᓇᓕᕆᓐᓂᓴᓄᑦ ᑖᕙᑦᓱᒪ ᓄᓇᐅᑉ ᐱᓇᓱᐊᕐᕕᐅᓂᖓ ᓈᒻᒪᒋᔭᐅᖏᕙᓪᓛᒋᐊᖕᖓᓯᓚᐅᕐᓯᒪᔪᖅ. ᐊᕐᕌᒍᓂ ᐊᒥᓱᐊᓗᓐᓂᒃ ᓴᓇᔭᐅᓯᒪᓕᕐᒪᑦ ᐊᐅᓚᑕᐅᔪᑐᖃᐅᑦᓱᓂᓗ, ᑕᒐᑕᒐ/ᒫᓐᓇ ᐊᖏᕐᑕᐅᓯᒪᑐᐃᓐᓇᓕᕐᑐᖅ ᐃᓗᓐᓈᒍᑦ ᑯᐯᒃᒥᐅᓕᒫᓄᑦ ᐱᕙᓪᓕᖁᑎᑖᖑᑐᐃᓐᓇᓯᒪᓕᕐᒥᒪᑦ ᐊᓪᓚᓄᑦ ᑯᔩᓄᑦ ᐃᓄᓐᓄᓗ, ᑮᓇᐅᔭᑎᒍᑦ ᐃᒻᒥᓂᕐᓱᕈᓐᓇᓯᕙᓪᓕᐊᒍᑕᐅᑦᓱᓂ.
ᐊᓪᓓᑦ ᐱᐅᓯᑐᖃᕐᒥᑎᒍᑦ ᐱᓂᐊᕐᓂᖃᕈᓐᓀᓯᕙᓪᓕᐊᓯᒪᓂᖏᑦ ᐃᓗᓐᓈᒍᑦ ᖃᐅᔨᒪᔭᐅᕗᑦ, ᕿᑐᕐᖏᐅᒍᓐᓀᓯᕙᓪᓕᐊᓯᒪᑦᓱᑎᓪᓗ. ᐃᑯᒪᓕᐅᕐᕕᓵᓗᒃ ᐱᒋᐊᕐᑕᐅᑎᓪᓗᒍᓗ ᐱᓇᓱᒐᑐᐃᓐᓇᐅᔭᖏᑦᑐᓂᒃ ᓄᐃᑦᓯᓯᒪᔪᖅ, ᐃᓅᒐᓱᐊᕐᕕᓯᒪᔭᒥᓂᒃ ᐃᓄᐃᑦ ᐊᓪᓓᓗ ᐊᖏᖃᑎᒌᒍᑎᖃᒐᓱᐊᒻᒪᕆᓯᓚᐅᕐᓯᒪᔪᑦ ᐱᒍᓐᓇᐅᑎᒋᓯᒪᔭᑐᖄᓗᒋᑦᓱᒍ ᓄᓇᒋᓯᒪᒥᓂᒃ ᑕᐅᕐᓯᐅᑎᖃᕐᓱᑎᒃ, ᐊᒻᒪᓗ ᐊᕐᕌᒍᐃᑦ ᑕᓪᓕᒪᐅᔪᕐᑐᐃᑦ/ᖁᓖᑦ ᐊᓂᒍᕐᓯᒪᓕᕋᑕᕐᑎᓗᒋᑦ ᐊᒥᓱᕕᑦᓱᑎᒃ ᓇᒧᖕᖓᕖᕈᑦᑑᔮᖃᑦᑕᓯᒪᔪᑦ ᐊᖏᖃᑎᒌᒐᓱᐊᕐᓂᖏᓐᓂ ᓄᓇᕕᒻᒥᐅᑦ ᐊᒻᒪᓗ ᑯᐯᒃᑯᑦ ᑲᕙᒪᖓᑕ ᐊᓪᓚᕕᖏᓐᓂ ᐱᓇᓱᑦᑏᑦ, ᑭᓯᐊᓂ ᐊᖏᖃᑎᒌᒍᓐᓇᓯᓚᐅᕐᓂᒪᑕ ᐃᓘᓐᓇᑎᒃ ᐱᒍᒪᔭᒥᓂᒃ ᐱᒍᓐᓇᓯᓯᒪᔪᐃᑦ.
ᐱᓇᓱᒉᑦ, ᑮᓇᐅᔭᑐᐃᓐᓇᑎᒍᓪᓗ ᐊᑭᓕᕐᑕᐅᒍᑏᑦ, ᐊᒻᒪᓗ ᐃᓱᐊᖁᑎᑦᓭᑦ ᓴᕐᕿᑎᑕᐅᒻᒪᑕ ᓴᐳᒻᒥᒍᑕᐅᓂᐊᕐᓱᑎᒃ ᐱᓇᓱᐊᕐᑕᐅᔪᓂᒃ ᓈᒻᒪᓂᕋᕐᑕᐅᓯᑦᓴᕋᑕᕐᓯᒪᔪᑦ ᐃᓘᓐᓇᖏᓐᓄᑦ ᑕᒪᒃᑯᓂᖓ ᐊᖏᖃᑎᒌᒐᓱᐊᕈᑎᖃᕐᓯᒪᔪᓄᑦ. ᐃᓚᖏᑎᒍᑦ ᓱᓕᔪᐃᓐᓈᓗᓯᒪᖕᖏᑲᓗᐊᕐᑎᓗᒍ ᑕᒪᒃᑯᓂᖓ ᐊᖏᖃᑎᒌᒐᓱᐊᕈᑎᖃᕐᓱᑎᒃ, ᑭᓯᐊᓂ ᐊᖏᖃᑎᒌᒍᓐᓇᓯᓯᒪᒻᒪᑕ ᓭᒪᖃᑎᒌᑦᓭᓇᕈᓐᓇᓯᓯᒪᔪᑦ.
ᑭᓯᐊᓂ ᐱᒻᒪᕆᐅᓗᐊᖕᖑᐊᓯᒪᔪᖅ, ᐊᖏᖃᑎᒌᒐᓱᐊᕐᓂᖃᕐᑎᓗᒍ ᑯᐯᒃᒥ ᓄᓇᖃᕐᖄᓯᒪᔪᐃᑦ ᐱᔪᓐᓇᐅᑎᑐᖄᓗᒋᔭᖏᓐᓂᒃ ᓄᓇᒥᓂᒃ ᓴᒃᑯᓯᑎᑕᐅᒐᓱᐊᕐᓱᑎᒃ ᑌᒣᓕᖓᑐᐃᓐᓇᓯᒪᖕᖏᒪᑕ, ᑌᒪᖕᖓᓂᐊᓗᒃ ᓲᕐᓗ ᓯᓚᕐᔪᐊᖅ ᐱᒋᐊᕐᑎᓗᒍᓗ ᐅᐱᓐᓇᕋᓂ ᓄᓇᒋᓯᒪᒐᐅᒃ.
ᐃᓅᖃᑎᒌᓐᓂᑯᑦ ᑮᓇᐅᔭᑎᒍᓪᓗ ᓱᕐᕋᑕᐅᓯᒪᓃᑦ ᔦᒥᔅ ᐯᒥ ᐱᓇᓱᐊᕐᓂᐅᓯᒪᔪᒧᑦ ᓱᓕ ᓴᖑᕙᓪᓕᐊᒍᑕᐅᖏᓐᓇᖁᖅ ᑯᐯᒃᓗ ᑲᓇᑕᐅᓪᓗ ᐱᕙᓪᓕᐊᓂᖏᓐᓄᑦ.
ᓄᓇᕕᒻᒥᓗ ᑭᓯᐊᓂ ᑕᒪᓐᓇ ᐱᒋᐊᕐᓯᒪᑦᓱᓂ.
ᑕᑯᔭᑦᓭᑦ ᖃᓄᐃᑐᑐᐃᓐᓀᓗ ᓱᓇᓐᓂᐊᕋᑦᓭᑦ
ᓚ ᑲᕌᓐᒥ ᑰᒻᒧᑦ ᐃᑯᒪᐅᑎᓕᐅᕐᕕᐊᓗᒃ ᐊᔪᒉᓐᓂᐹᖑᖏᓐᓈᖁᖅ ᓴᓇᔭᐅᓯᒪᓂᐊᓗᐊ. ᐊᖏᔪᕐᔪᐊᒪᕆᐊᓗᑦᓱᑎᒃ ᓴᓇᔭᐅᓯᒪᔪᐊᓗᐃᑦ ᑕᑯᔭᐅᒐᒥᒃ ᐅᐱᒋᔭᐅᖕᖏᑑᕐᖃᔭᖕᖏᑐᑦ. ᑐᑭᓯᒋᐊᒃᑲᓂᕈᒪᔪᐃᑦ ᓯᕗᓕᕐᑎᖃᑦᓯᐊᓗᑎᒃ ᕿᒥᕐᕈᑎᑕᐅᒍᓐᓇᑐᑦ ᐃᑯᒪᓕᐅᕐᕕᐊᓗᒻᒥᒃ. ᑕᑯᒐᓱᐊᖁᓇᓱᓯᓪᓗ ᖃᕆᑕᐅᔭᑎᒍᑦ ᕿᒥᕐᕈᒐᑦᓴᓂᒃ ᐅᕙᓂ Hydro-Québec's website.
ᐊᑦᔨᓕᐅᕐᑐᕕᓂᖅ/ᐊᑦᔨᓕᐅᑐᕕᓃᑦ: Gabriel Ducasse
ᐊᑎᐁ?
ᑰᓐᓂᐊᑎᒃᑯᓕᐊᓕᕆᑦ ᐃᓄᐃᒃᑯᑎᒍᑦ