ᒪᓐᑐᔨᐊᓪ - ᑐᕈᑐ
ᒪᓐᑐᔨᐊᓪ ᑯᐯᒃᓕᒫᒥ ᐃᓪᓗᒐᓴᕐᔪᐊᑕᖃᕐᓱᓂ ᓄᓇᓕᕆᓐᓂᐸᐅᕗᖅ ᐊᒻᒪᓗ ᑲᓇᑕᓕᒫᒥ ᑐᖓᓕᕆᔭᐅᑦᓱᓂ ᓄᓇᒋᐊᑦᑑᓂᖓ. ᕿᑭᕐᑕᒦᑦᑐᖅ ᓭᓐ-ᓗᐊᕋᓐᔅ ᑰᕌᓗᐊᑕ ᕿᑎᖓᓂᑦᓱᓂ ᓯᕗᓪᓕᐹᑦᓯᐊᒥ ᑕᕆᐅᕐᔪᐊᑉ ᐊᑭᐊᓂᒥᐅᔭᓄᑦ ᑕᑯᔭᐅᒋᐊᖕᖓᓯᒪᔪᖅ ᕿᓂᕐᑎᐅᓯᒪᔪᒧᑦ ᔮᒃ ᑲᑦᓰᒧᑦ ᒍᐃᒍᐃᒻᒪᕆᒃᑯᑦ ᓄᓇᖓᓂᒥᐅᔭᒧᑦ ᑲᑎᓯᒋᐅᓚᐅᕐᑐᕕᓂᕐᒧᑦ ᐊᓪᓚᓂᒃ ᐃᐊᕆᑯᐊᓂᒃ 1535 ᐊᕐᕌᒍᖓᓂ.
ᓐᑐᔨᐊᓪ ᐊᒥᓱᖕᖏᑑᒐᓗᐊᓂᒃ ᐊᑎᖃᕐᑎᑕᐅᖃᑦᑕᓯᒪᔪᖅ ᐊᑎᖃᕐᑎᑕᐅᓯᑦᓴᕋᑕᓚᐅᕐᑐᕕᓂᖅ ᑕᒐᑕᒐ/ᒫᓐᓇ ᐊᑦᓯᕋᐅᓯᒋᓕᕐᑕᒥᓂᒃ ᖃᐅᔨᒪᔭᐅᒍᑎᒋᓂᕐᐹᕆᓕᕐᑕᒥᓂᒃ ᐊᑕᓂᐊᓗᒻᒧᑦ ᖃᕐᖃᕆᔭᐅᓂᕋᕐᑕᐅᓱᓂ, ᖃᕐᖃᐅᓗ ᓄᓇᖓᓂ ᕿᑎᖓᓂᑦᓯᐊᓱᓂ.
ᑭᓯᐊᓂ ᓵᒧᐊᓪ ᑎ ᓵᒻᐸᓓᖕ ᑎᑭᕋᑕᕐᒪᑦ, ᐊᕐᕌᒍᐃᑦ 70-ᐄᑦ ᑭᖑᓂᖓᒍᑦ, ᓄᓇᓕᖓ ᓂᐅᕕᕐᕕᑖᓪᓚᕆᓕᑌᓐᓇᓚᐅᕐᑐᕕᓂᖅ ᑕᕐᓰᖃᑦᑕᐅᑎᕕᐅᓚᖓᓕᕐᑐᒥᒃ ᐊᒻᒪᓗ ᐋᕐᕿᓱᕐᓯᒪᐅᑎᑦᓴᓂᒃ ᑐᑦᑕᕕᐅᓪᓚᕆᐅᓚᖓᓕᕐᑐᒥᒃ ᓈᑉᐯᕕᐅᑦᓱᓂᓗ ᐊᑦᓯᕋᕐᑕᐅᒍᑎᑖᕐᓱᓂᓗ ᒍᐃᒍᐃᒃᑯᑦ ᓄᓇᖓ ᓄᑖᖅ, ᓚᔪᒥᒃ. ᒍᐃᒍᐃᑦᔪᐊᑯᑦ ᓄᓇᒥᒃ ᓇᕝᕚᑕᒥᓂᒃ ᐊᕐᓵᓂᐊᕐᑎᐅᓱᑎᒃ ᑕᕆᐅᕐᔪᑉ ᐊᑭᐊᓂ ᐱᑦᓱᑎᒃ ᑎᑭᕐᖄᓚᐅᕐᑐᕕᓂᐅᒐᓗᐊᕐᑎᓗᒋᑦ ᐊᒥᐊᔨᑲᒻᒪᕆᐅᑉ ᓄᓇᕐᔪᐊᖓᓂᒃ, ᑕᒪᓐᓇ ᒪᓐᑐᔨᐊᓪ ᒍᐃᒍᐃᕐᔪᐊᑯᓐᓄᑦ ᓄᓇᑖᕐᖃᒥᐅᓂᕋᕐᑕᐅᔪᕕᓂᐅᒐᓗᐊᕐᓱᓂ ᑭᓯᐊᓂ ᖃᓪᓗᓈᕐᔪᐊᓄᑦ 150-ᐄ ᐊᕐᕌᒍᐃᑦ ᐊᓂᒍᕐᒪᑕ ᐱᑖᕆᔭᐅᓚᐅᕐᑐᕕᓂᖅ ᓄᓇᖓ, ᖁᓄᒪᔪᒻᒪᕆᕕᓂᐊᓘᒐᓗᐊᕐᓱᑎᒃ ᐊᕐᓵᑕᐅᒐᓱᐊᕐᓂᒥᓂ ᑭᓯᐊᓂ ᑯᐯᒃᒧᑦ ᐊᑕᒍᒪᓂᖃᑦᓯᐊᖏᓐᓈᑐᑦ.
ᐃᓗᕐᕈᑎᖃᑎᒋᔭᐅᖕᖏᓂᕐᒥᓄᑦ ᐊᕕᑦᓯᒪᓲᒍᒐᓗᐊᕐᓱᑎᒃ, ᐅᖃᐅᓯᖃᑎᒌᖕᖏᓂᕐᒥᓄᓪᓗ ᐊᒻᒪᓗ ᐱᐅᓯᖃᑎᒌᖕᖏᓂᕐᒥᓄᑦ, ᖃᓪᓗᓈᑐᐃᓐᓀᑦ ᒍᐃᒍᐃᒃᑯᓗ ᓄᓇᕐᖃᑎᒌᒍᓐᓇᑐᐃᓐᓇᓲᒍᒻᒥᔪᑦ ᒪᓐᑐᔨᐊᓪᒥ, ᐃᓚᖓᓂ ᑯᑭᖓᔮᖃᑎᒌᓱᒍᒐᓗᐊᕐᓱᑎᒃ, ᐊᕐᕌᒍᓂ ᐊᒥᓱᐊᓗᓐᓂ 1950 ᐊᕐᕌᒍᖏᑦᑕ ᕿᑎᕐᖃᖏᓐᓂ, ᓂᐸᓕᔮᕐᑐᐊᓗᖕᖏᑲᓗᐊᕐᓱᑎᒃ ᐱᐅᓂᕐᓴᓂᒃ ᐃᓅᓯᕐᑖᕋᓱᐊᕐᓯᒪᔪᑦ ᑲᕙᒪᓐᓂᐊᓂᕐᒥᒍᑦ, ᐊᓯᑦᔩᕙᓪᓕᐊᑕᐅᒐᕐᓱᑎᒃ ᐱᐅᓯᕆᒍᒪᔭᒥᓂᒃ, ᑭᓯᐊᓂ ᑐᖕᖓᕕᑦᑖᓚᕆᑦᓯᒪᔪᑦ, ᒍᐃᒍᐃᒃᑯᑦ ᑲᓇᑕᐅᒥᐅᑉ ᐃᓅᖃᑎᒋᔭᐅᓂᕐᒥᓄᑦ ᐃᓂᑦᑖᓯᐊᕈᓐᓇᓯᓯᒪᔪᑦ ᐅᐱᓐᓇᕋᓂ ᑐᕝᕕᒋᕐᖄᓚᐅᕐᓂᕋᒥᐅᒃ ᑕᒪᓐᓇ ᐊᒻᒪᓗ ᐅᓪᓗᒥᒧᑦ ᐅᓄᕐᓂᓴᐅᖏᓐᓇᕙᓪᓗᓲᖑᑦᓱᑎᒃ ᒍᐃᒍᐃᑦ ᑕᒫᓂ.
ᑯᐯᒃ ᓄᓇᖓ ᐊᖏᔪᒻᒪᕆᐊᓘᒐᓗᕐᑎᓗᒍ ᐊᒻᒪᓗ ᐊᒥᓱᒻᒪᕆᐊᓗᓐᓂᒃ ᐊᕕᑦᑐᓯᒪᔪᓂᒃ ᓄᓇᖁᑎᖃᕋᓗᐊᕐᑎᓗᒍ, ᑭᓯᐊᓂ ᒪᓐᑐᔨᐊᓪ ᑯᐯᒃᒥᐅᓕᒫᑦ ᖃᓄᑐᐃᓐᓇᖅ ᐱᐅᓯᑐᖃᓕᓐᓄᑦ ᐊᒻᒪᓗ ᑮᓇᐅᔭᓕᐅᕋᓱᐊᕈᓯᖏᑦᑎᒍᑦ ᓇᐅᓕᒫᓄᑦ ᑐᑦᑕᕕᒋᔭᐅᓪᓚᕆᖏᓐᓈᑐᖅ; ᒍᐃᒍᐃᕐᔪᐊᓂᒃ ᓯᕗᓪᓕᕕᓂᖃᕐᓱᑎᒃ ᑲᓇᑕᒥᐅᑦᓴᔭᐅᓕᕐᑐᑦ ᐊᒻᒪᓗ ᑲᓇᑕᒥᐅᖑᓕᕐᑐᐃᑦ ᐅᕕᓂᖃᑎᒌᑦᓴᔭᐅᖕᖏᑲᓗᐊᕋᒥᒃ ᐃᓅᖃᑎᒌᑦᓯᐊᑐᐃᓐᓇᕈᕐᓇᑐᑦ ᐃᓗᕐᕈᓯᖃᑎᒌᒐᑎᒃ ᓄᓇᕐᖃᑎᒋᕐᔪᐊᓂ ᓯᓚᕐᔪᐊᒥ ᓇᓂᒥᐅᑐᐃᓐᓇᓴᔭᐅᒐᓗᐊᕈᑎᒃ ᓄᓇᓕᕐᔪᐊᒥᐅᖑᖃᑎᒌᒍᓐᓇᕕᐅᔪᖅ ᒪᓐᑐᔨᐊᓪ, ᐊᒻᒪᓗ ᐊᑦᔨᒋᔭᐅᑦᔭᒥᒐᓂ ᐊᓯᖏᓐᓄᑦ ᐃᓪᓗᔪᐊᕐᑕᖃᕐᓱᑎᒃ ᓄᓇᓕᕐᔪᐊᓄᑦ ᑲᓇᑕᒥ.
ᓄᓇᓯᒪᕕᒋᒋᐊᖓ ᐱᐅᓂᕐᐸᓂᕋᕐᑕᒐᓗᐊᕐᑎᓗᒋᑦ ᐊᒥᐊᔨᑲᒻᒪᕆᓕᒫᑉ ᓄᓇᕐᔪᐊᖓᓂ, ᒪᓐᑐᔨᐊᓪ ᖃᐅᔨᒪᔭᒍᑎᖃᕐᓂᐸᐅᕗᖅ ᐃᓪᓗᓕᐊᕆᓯᒪᔭᐅᔪᐃᑦ ᓴᓇᒻᒪᖏᑦᑕ ᓴᓇᐅᔭᓯᒪᓂᐊᓗᖏᑦ, ᐃᓗᕐᕈᓯᖃᑎᒋᖕᖏᑐᐃᓪᓗ ᖁᕕᐊᓲᑎᖃᕐᐸᓂᖏᑦ ᓇᓪᓕᐊᓂᕐᓯᐅᕈᑎᖃᕐᐸᓱᑎᒃ, ᓂᕕᕆᑦᓯᐊᒪᕆᐊᓗᓐᓂᓗ ᐱᑕᖃᕐᓱᓂ, ᐅᓐᓄᐊᓯᐅᕐᕕᓯᐊᑦᓴᒪᕇᐊᓗᖏᑦ ᐱᒻᒥᔪᑦ ᐊᒻᒪᓗ ᐃᓘᓐᓈᒍᑦ “ᐃᓅᓯᕐᒥᒃ ᖁᕕᐊᒋᔭᖃᕐᓂᖅ,” ᒪᓐᑐᓕᐊᓪᓗ ᑲᓇᑕᒥᐅᓕᒫᓄᑦ ᓲᕐᓗ ᐅᒃᑯᐊᒍᑦᓱᓂ ᑲᓇᑕᓕᒫᒧᑦ ᐱᒻᒪᕆᐊᓘᑦᓱᓂᒃ ᑮᓇᐅᔭᓕᐊᕋᓱᕐᓂᓄᑦ ᐊᒻᒪᓗ ᑲᓇᑕᒥᐅᒍᖕᖏᑐᓂᒃ ᐃᑎᕐᑎᓯᓚᕿᒐᓱᐊᕐᒥᐅᓱᓂ, ᐃᓄᑐᐃᓐᓀᑦ ᐊᕐᖁᑎᒋᔭᐅᑎᓪᓗᒋᑦ ᐊᒻᒪᓗ ᐅᖓᑖᓄᐊᓪᓛᑦ ᐃᑖᕈᒪᔪᓄᑦ ᐊᕐᖁᑎᒋᔭᐅᒍᓐᓇᓱᓂ.
ᑕᑯᔭᑦᓭᑦ ᖃᓄᐃᑐᑐᐃᓐᓀᓗ ᓱᓇᓐᓂᐊᕋᑦᓭᑦ
ᒪᓐᑐᔨᐊᓪᒥ ᓱᓇᓐᓂᐊᕋᑦᓴᖃᓲᒍᕗᖅ ᐊᕐᕌᒍᓕᒫᒥ, ᐅᑭᐅᒥ, ᐅᐱᕐᖓᓴᒥ, ᐊᐅᔭᒥ ᐅᑭᐊᑦᓴᒥᓪᓗ, ᐃᓘᓐᓇᑎᓗ ᐊᑑᑎᔭᐅᒍᓐᓇᑐᐃᓐᓇᐅᓱᑎᒃ ᖃᓄᐃᓘᕈᒪᒋᐊᒥᒃ ᖃᐅᔨᒪᑐᐊᕈᕕᑦ. ᒪᓐᑐᔨᐊᓪᒥᐅᑦ ᐃᓐᓂᐊᓯᒪᔪᐃᓪᓗ ᐃᓘᓐᓇᑎᒃ ᒪᓐᑐᔨᐊᓪᓗᖃᐅᑦᓱᓂ ᐋᕐᕿᒋᐊᕐᑕᐅᓯᒪᔪᒦᒋᐊᒥᒃ ᐊᓕᐊᒋᔭᖃᕐᑐᐃᓇᐅᓲᒍᑦᓱᑎᒃ, ᒪᓐᑐᔨᐊᓪ ᓄᓇᓕᖕᖑᐸᓪᓕᐊᕕᕕᓂᖓ ᑕᑯᓂᐊᕋᑦᓴᓯᐊᒍᓲᖑᒻᒥᔪᖅ.
ᐊᐅᔭᐅᓂᖓᓂ/ᐅᐱᕐᖔᖑᓂᖓᓂ ᑕᕐᕿᓂ ᐱᖓᓱᓂ ᐃᓗᕐᕈᓯᖃᑎᒌᖕᖏᑐᐃᑦ ᓇᓪᓕᐅᓂᕐᓯᐅᓂᖃᕐᑎᓯᓲᑦ, ᒪᓐᑐᔨᐊᓪᒥ ᓯᓚᕐᔪᐊᒥᑦ ᓇᑭᑐᐃᓐᓇᖅ ᐱᓯᒪᔪᑦ ᑐᓴᕐᓂᔮᕐᑎᓯᓂᒃᑯᑦ ᓇᓪᓕᐅᓂᕐᓯᐅᓂᖓ ᔮᔅ-ᖑᓂᕋᕐᑕᐅᔪᓂᒃ (Montreal International Jazz Festival-ᒥ) ᐊᒻᒪᓗ ᒍᐃᒍᐃᑦ ᑐᓴᕐᓂᔮᕐᑎᓯᓂᖃᓲᒍᒻᒥᔪᑦ ᕗᔮᒃᑯᕘᓕ-ᐅᓂᕋᕐᑕᓂᒃ (Francofolies-ᐅᓂᕋᕐᑕᓂᒃ)ᓇᓪᓕᐅᓂᕐᓯᐅᑎᑦᓯᓃᑦ ᐃᓱᓕᒍᑎᖃᕐᐸᓕᐊᓯᓲᑦ ᓯᓚᕐᔪᐊᒥᐅᓄᑦ ᑕᕐᕋᓕᔮᒐᓕᐊᕕᓂᕐᓂᒃ ᓇᓪᓕᐅᓂᕐᓯᐅᕈᑎᖃᕐᑎᓯᓲᒍᒻᒥᔪᑦ(World Film Festival-ᒥ.)
ᐅᑭᐅᒍᓕᕐᒪᑦ ᐅᓪᓗᑐᓯᕙᓪᓕᐊᓕᕐᑎᓗᒍ ᓱᓇᓱᐊᕋᑦᓴᖃᕐᑎᓯᓲᒍᒻᒥᔪᑦ ᐃᑯᒪᓂᒃ ᓇᓪᓕᐅᓂᕐᓯᐅᓂᖃᓲᒍᒻᒥᔪᖅ (Montréal en lumière-ᖑᓂᕋᕐᑕᐅᔪᒥᒃ) ᕕᕗᐊᕆᐅᑉ ᓄᖕᖑᐊᓂ, ᐱᓇᓱᐊᕈᓯᓐᓂ ᒪᕐᕉᓂ ᒪᓐᑐᔨᐊᓪ ᐃᓪᓗᒐᓴᖏᑦ ᐃᑯᒪᔪᕐᑕᖃᒻᒪᕆᓲᑦ, ᓯᓚᕐᔪᐊᒥᐅᓪᓗ ᐱᐅᓯᑐᖃᕐᒥᑎᒍᑦ ᖃᐅᔨᒪᔭᐅᒻᒪᕆᑦᑐᒥᒃ ᓇᓪᓕᐅᓂᕐᓯᐅᕈᑎᖏᑦ ᐃᓚᖃᓲᒍᒻᒥᔪᑦ, ᓂᕐᓯᐅᓂᕐᓂᒃ ᐃᓗᕐᕈᓯᖏᓐᓄᑦ ᐃᓕᖓᔪᓂᒃ ᐊᒻᒪᓗ ᐃᓪᓗᔪᐊᑦ ᓄᓇᖓᑕ ᐊᑖᓂ ᓯᕕᓂᑐᖃᕐᑐᓂᒃ 32 ᑭᓛᒥᑕᓂᒃ, ᓂᐅᕕᑦᓴᖁᑎᓖᑦ ᐊᑭᑭᓪᓕᒋᐊᕐᓯᒪᔪᓂᒃ ᓂᐊᕕᑦᓴᖃᓲᒍᒻᒥᔪᑦ ᐱᐅᓂᕐᐹᓯᐊᓂᒃ ᓂᐅᕕᑦᓴᓂᒃ.
ᓄᓇᐅᑉ ᐊᑖᓂᑦᑑᑉ ᖁᓛᓂᑦᓱᓂ ᓄᓇᒥ, ᐊᕐᖁᑎᐅᑦᓱᓂ ᐊᕐᖁᓯᓂᐅᓂᕐᐹᒥ ᓭᓐᑦ-ᑳᓱᕋ-ᒥ ᐊᒻᒪᓗ ᓭᓐᑦ-ᕌᑉ ᐊᕐᖁᑎᖏᓐᓂᒃ ᓂᐅᕕᕐᕕᓂᒃ ᓂᐅᕕᕆᐊᕐᕕᓴᑦᓯᐊᕌᓗᓐᓂᒃ ᐱᑕᖃᓲᒍᒻᒥᔪᖅ ᓂᕆᕕᑦᓴᓯᐊᕌᓗᓐᓂᓗ.
ᑐᑭᓯᒋᐊᒃᑲᓂᕈᒪᒍᕕᑦ ᓱᓇᓱᐊᕈᒪᔭᕐᐱᑦ ᒥᑦᓵᓄᑦ ᒪᓐᑐᔨᐊᓪᒥᓐᓂᓃᕕᑦ, ᖃᐅᔨᒋᐊᕐᕕᖃᕈᓐᓇᑐᑎᑦ ᖃᕆᑕᐅᔭᑎᒍᑦ ᐆᒥᖓ, Tourisme Montréal’s website. ᒪᓐᑐᓕᐊᓪᒥᒃ ᑕᑯᔭᕐᑐᓯᒪᔪᓄᑦ ᖃᕆᑕᐅᔭᑎᒍᑦ ᖃᐅᔨᒐᓱᐊᕐᕕᒋᒍᓐᓇᑐᒥᒃ.
ᐊᑎᐁ?
ᐅᓪᓗᒥ ᒪᓐᑐᔨᐊᓕᐊᓕᕆᑦ ᐃᓄᐃᒃᑯᑎᒍᑦ