ᐳᕕᕐᓂᑐᖅ

ᓄᓇ ᑕᓯᐅᔭᕐᔪᐊᒥ ᓯᕿᓂᐅᑉ ᓄᐃᕕᐊᓃᓐᓂᓴᖅ, ᓄᓇᓕᐅᑉ ᐊᑎᖓ ‘ᐳᕕᕐᓂᑐᖅ’ ᐱᔭᐅᓯᒪᕗᖅ ᐃᓄᐃᑦ ᐅᖃᐅᓯᖓᓐᓂᑦ ᑐᑭᓕᒻᒥᒃ ‘ᑎᐸᓕᒻᒥᒃ ᐃᒍᓇᕐᓂᐅᓱᓂ ᐳᕕᕐᓂᐊᓂᕐᒥᒃ’ ᐅᖃᕐᑕᐅᓲᑦ ᐳᕕᕐᓂᑑᑉ ᓄᓇᓕᖓᑕ ᐊᑦᓯᕋᐅᑎᖓᓂᒃ ᓇᑭᕐᖓᓂᑕᐅᒻᒪ¯ᑦ ᐅᓂᒃᑲᐅᓯᕐᑕᖏᑦ ᐊᑦᔨᒌᖑᖕᖏᑐᑦ. ᑐᑭᖃᓪᓚᕆᑦᑐᕆᔭᐅᔪᖅ ᐱᓯᒪᒋᐊᖓ ᐃᓄᐃᑦ ᐅᑭᐅᖑᑎᓪᓗᒍ ᖃᓂᒪᓐᓇᒧᑦ ᓄᖑᑕᐅᓚᐅᕐᑐᕕᓂᐅᓂᖓᓐᓂᑦ, ᐁᑉᐹᒍᓪᓗ ᑐᑭᖃᑐᐃᓐᓇᕆᐊᖃᕐᒥᓱᓂ ᑐᑦᑐᐃᑦ ᐃᒫᓄᑦ ᑭᕕᐅᕐᖃᑐᕕᓂᐅᑦᓱᑎᒃ ᓯᓚ ᐅᕐᖂᓯᓯᒪᓕᑎᓗᒍ ᑭᓯᐊᓂ ᐳᕕᕐᓂᐅᓕᕐᑎᓗᒋᑦ ᓀᐱᑕᐅᓚᐅᕐᑐᕕᓂᐅᓂᖓᓐᓂᒃ.

ᐅᓪᓗᒥᐅᓕᕐᑐᖅ ᐳᕕᕐᓂᑐᖅ ᓄᓇᓕᐅᕗᖅ ᓄᓇᓕᖕᖑᐸᓪᓕᐊᓯᒪᑦᓱᓂ 1921-ᒥ ᑌᑦᓱᒪᓂ ᖃᑦᓴᓐ ᐯ ᑲᒻᐸᓂᒃᑯᑦ ᑖᕙᑦᓱᒪ ᓄᓇᖓᓂ ᐱᓇᓱᐊᒻᒪᕆᒋᐊᓯᓚᐅᕐᓂᒪᑕ, 1951-ᒍᓕᕐᑎᓗᒍ ᓂᐅᕕᕐᕕᒥᒃ ᐅᒃᑯᐃᓯᑐᐃᓐᓇᕋᑕᓚᐅᕐᓂᒪᑕ ᑲᔪᖏᕐᓭᒍᑎᐅᓚᕿᓯᒪᔪᖅ ᐃᓄᓐᓂᒃ ᓯᓈᓂᒥᐅᓂᒃ ᐃᓂᓪᓓᒍᑎᐅᓚᕿᑦᓱᓂ ᐃᓄᐃᕈᑉᐸᓂᐊᕈᓐᓀᑐᒥᒃ ᓄᓇᓕᒻᒥᒃ. ᐊᓱᐃᓛᒃ 1950 ᐊᕐᕌᒍᖏᑦᑕ ᕿᑎᕐᖃᖏᓐᓂ, ᐃᑦᓯᕋᕐᔪᐊᑯᑦ ᐊᔪᕿᕐᑐᐃᔨᖓ ᐊᔪᒉᓪᓗᑐᒻᒪᕆᓕᕐᓂᒪᑦ ᓱᓕᓪᓗᑐᕐᑐᖑᐊᕌᐱᐅᔮᕐᑐᓂᒃ ᐃᓄᐃᑦ ᓴᓇᖕᖑᐊᐸᑦᑕᖏᓐᓂᒃ ᐃᑉᐱᒍᓲᒻᒥᓚᐅᕐᑐᕕᓂᖅ. ᐅᒥᑲᓪᓚᐅᓂᕋᕐᑕᖅ ᐊᔪᕿᕐᑐᐃᔨ ᓯᓀᑕ ᐱᒋᐊᕐᑎᓯᓚᐅᕐᓯᒪᔪᖅ ᓴᓇᐅᒐᕐᑏᑦ/ᓴᓇᖕᖑᐊᑏᑦ ᑯᐊᐸᒋᓂᐊᕐᑕᖓᓂᒃ ᐊᑯᓂᐅᖕᖏᑐᐊᐱᓪᓗ ᓯᓚᕐᔪᐊᒥᐅᓄᑦ ᐃᓄᐃᑦ ᐃᓗᕐᕈᓯᖓ ᖃᐅᔨᔭᐅᓕᓚᐅᕐᑐᕕᓂᖅ.

ᓯᕗᓪᓕᐹᒥ ᑰᒻᒥᒃ ᐃᑯᒪᓕᐅᕈᑎᖃᕈᒪᔪᓂᒃ 1974-ᒥ ᐊᖏᖕᖏᓴᐅᑎᒋᓚᐅᕐᓯᒪᒐᓗᐊᕐᓱᑎᒃ, ᐊᒥᓲᓂᕐᓭᑦ ᐃᓄᑐᐃᓐᓀᑦ ᑕᒪᑐᒥᖓ ᐱᓇᓱᑦᑕᐅᒍᒪᔪᒥᒃ ᐅᒃᑯᐃᖔᕐᓯᒪᕕᖃᕐᓂᓴᐅᓕᕐᒪᑕ ᐅᓐᓂᑑᑎᑦᓴᓕᐅᕈᓐᓇᓂᕐᓴᐅᓕᕐᓱᑎᓪᓗ ᐊᖏᕐᑕᐅᑐᐃᓐᓇᓯᒪᔪᖅ ᑭᖑᓂᖓᒍᑦ. ᐅᓪᓗᒥ, ᐳᕕᕐᓂᑐᖅ ᐱᓇᓱᕝᕕᐅᒪᕆᑉᐸᓕᕐᑐᖅ ᑐᑦᑕᕕᐅᑦᓱᓂ ᑕᓯᐅᔭᕐᔪᐊᑉ ᓯᓈᓂᒥᐅᓄᑦ. ᓄᓇᓕᐅᓪᓗ ᑎᒻᒥᔪᕐᓂᐊᕕᖓ ᐊᕐᖁᓵᕐᑕᐅᒪᕆᓲᒍᑦᓱᓂ ᐊᓯᖏᓐᓄᑦ ᓄᓇᓕᐊᕈᕐᒥᐅᓄᑦ. ᐳᕕᕐᓂᑑᓪᓗ ᑰᒃᔪᐊᓗ, ᓄᓇᕕᖕᒥ ᐊᐅᓚᑦᓯᓂᕆᓂᕐᓂᒃ ᐱᑦᔪᔨᕕᐅᔫᒃ, ᖃᖓᑦᑕᔫᓄᑦ/ᑎᒻᒥᔫᓄᑦ ᖃᐅᑕᒫᑦ ᐱᑐᑦᓯᒪᖃᑕᐅᓲᖑᕘᒃ.

ᑭᖕᖒᒪᓇᓪᓚᕆᓕᓚᐅᕐᓯᒪᒻᒪᑦ ᓄᓇᓕᓕᒪᓂ, ᑎᒻᒥᔪᕐᓂᐊᕕᒃ ᓄᑖᖅ ᐅᒃᑯᐃᑕᐅᓯᒪᓕᕐᑐᖅ ᐳᕕᕐᓂᑐᒥ, ᐅᒃᑯᑕᐅᓯᒪᔪᖅ 2013-ᒍᑎᓪᓗᒍ ᐅᑭᐊᑦᓴᒥ.

ᐳᕕᕐᓂᑐᒥ ᐅᑭᐅᒥ ᓇᓪᓕᐅᓂᕐᓯᐅᓂᖃᓲᖅ ᐃᓄᐃᑦ ᐱᐅᓯᑐᖃᕐᒥᒍᑦ ᖃᓄᐃᓘᕈᓯᖏᓐᓂᓗ ᐊᑦᔨᒌᖕᖏᑐᓂᒃ ᐱᖕᖑᐊᓂᕐᔪᐊᓂᖃᕐᑎᓗᒍ ᓄᐃᑕᑎᑦᓯᓱᑎᒃ, ᐊᐳᑎᒥᒃ ᓴᓇᖕᖑᐊᓂᖅ ᐃᓚᒋᔭᐅᖕᖏᓂᐅᔭᓲᒍᖕᖏᑐᖅ ᐃᓄᐃᑦ ᓴᓇᖕᖑᐊᑏᑦ ᓇᓪᓕᐅᓂᕐᓯᐅᖃᑕᐅᑦᓱᑎᒃ ᐊᐳᑎᒥᒃ ᓴᓇᖕᖑᐊᓲᑦ ᐱᐅᔪᐊᓗᓐᓂᒃ ᓱᖏᐅᓐᓀᑐᖕᖑᐊᓂᒃ ᐊᐳᑎᒧᑦ ᓴᓇᓯᒪᒻᒪᑕ. ᑐᓂᕐᖄᕕᓂᕐᓄᑦ ᐱᐅᓯᑐᖃᕐᒥᒍᑦ ᓴᓇᕐᕈᑎᑐᖃᕕᓃᑦ ᐊᖑᓇᓱᒍᑎᑐᖃᕕᓂᖏᓪᓗ ᑕᑯᔭᐅᖃᑦᑕᓯᒪᒻᒥᔪᑦ ᐃᑦᓴᓂᑕᕐᓂᐊᕕᐅᔪᓂ.

ᐊᑦᔨᓕᐅᕐᑐᕕᓂᖅ/ᐊᑦᔨᓕᐅᑐᕕᓃᑦ: Alexandra Offlaville