ᑯᐯᒃ ᓯᑎ

ᐊᑦᓯᑕᐅᒪᒍᑎᖓᓪᓛᑦ “ᑯᐯᒃ” ᓚᔪᖅ ᐅᖃᐅᓯᖅ ᐊᓪᓓᑦ ᐊᓪᑳᖕᑯᐃᓐ ᐅᖃᐅᓯᖓᓂᑦ ᐱᓯᒪᔪᖅ ᑐᑭᖃᕐᓱᓂ: “ᑰᑉ ᖂᕐᖑᖓ”. ᐊᓪᑳᖕᑯᐃᓐ ᓄᓇᓕᑐᖃᐅᑦᓱᑎᒃ ᓯᕗᓪᓕᐹᖑᓯᒪᒻᒪᑕ ᓄᓇᓯᒪᒋᐊᖕᖓᓚᐅᕐᑐᕕᓃᑦ ᒫᓐᓇ/ᑕᒐᑕᒐ ᑯᐯᒃ ᓯᑎᐅᑉ ᑕᕐᕋᖓᑕ ᓯᓈᓂ. ᓇᑎᕐᓈᖑᑦᓱᓂ, ᐃᒪᐅᑉ ᓯᓈᓂ ᒍᐃᒍᐃᓄᑦ ᓄᓇᓯᐅᕐᑐᓄᑦ ᓄᓈᕐᕕᐅᓚᕐᑐᕕᓂᖅ 1608-ᒍᑎᓪᓗᒍ ᐊᒻᒪᓗ ᐃᕐᐸᐸᓪᓕᐊᒐᐅᒐᕐᑐᕕᓂᐅᑦᓱᑎᒃ ᑕᒪᑐᒪ ᓄᓇᐅᑉ ᐃᓐᓈᕈᖏᓐᓄᑦ ᐊᓯᒥᓄᑦ ᐱᔭᐅᑦᑌᓕᒐᓱᐊᕐᓱᑎᒃ ᐱᑦᔪᑎᓕᕕᓂᐅᒋᐊᖏᑦ ᓇᓗᓇᖕᖏᑐᑦ.

ᑌᒣᒻᒪᑦ ᐃᓪᓗᒐᓭᑦ ᖁᑦᓯᓂᕐᓴᒥᑦᑐᑦ ᐊᓪᓕᐊᓃᓐᓂᓭᓪᓗ ᓯᕗᓪᓕᐹᒥ ᐃᓪᓗᔪᐊᓕᐊᕆᔭᐅᕙᓪᓕᐊᓯᒪᔪᐃᑦ. ᐊᒥᐊᔨᑲᒻᒪᕆᓕᒫᒥᒃ ᓄᓇᑖᕋᓱᐊᕐᓂᒥᓂ ᐃᖕᓚᒥᐅᑦ ᓯᕗᓪᓕᒥ ᓱᖃᑦᑕᑐᕕᓂᐅᖕᖏᑲᓗᐊᕐᓱᑎᒃ ᐅᓐᓄᐃᑦ ᐃᓚᖓᓂ 1763-ᒍᑎᓪᓗᒍ ᖃᓪᓗᓈᑐᐃᓐᓀᑦ ᐃᖕᓚᓐᒥᐅᑦ ᐅᓇᑕᕐᑐᓴᖁᑎᖏᑦ ᒪᔪᕐᓱᑎᒃ ᑖᒃᑯᑎᒎᓇ ᐃᓐᓈᕈᕐᑎᒎᕐᓱᑎᒃ ᓵᓚᖃᕈᓐᓇᓯᓕᕋᑕᓚᐅᕐᑐᕕᓃᑦ ᒍᐃᒍᐃᓂᒃ. ᐊᕐᕌᒍᓂ 13-ᓂ ᒍᐃᒍᐃᑦ ᓄᓇᓯᒪᑫᓐᓇᓚᐅᕐᑐᕖᑦ ᑖᕙᓂ ᐊᒥᐊᔨᑲᒻᒪᕆᒃ ᓄᓇᑖᕆᔭᐅᒐᓱᐊᕐᓂᖓᓂ. ᑭᓯᐊᓂ ᒍᐃᒍᐃᑦᑎᑐᑦ ᐅᖃᐅᓯᓖᑦ ᑯᐯᒃᒥᐅᔦᑦ ᐊᒥᓲᓂᕐᓴᐅᖏᓐᓈᕋᒥᒃ, ᐅᖃᐅᓯᕐᓯᒪᑦᔭᖏᑦᑐᐃᑦ ᐱᐅᓯᑐᖃᕐᒥᓂᓪᓗ ᐅᓪᓗᒥᒧᑦ ᐊᑐᑦᓯᐊᓲᒍᖏᓐᓈᑐᑦ.

ᐅᓪᓗᒥᓕ ᑯᐯᒃ ᓄᓇᕐᔪᐊᖁᑎᖓᑕ ᑲᕙᒪᖓᓄᑦ ᑯᐯᒃ ᓯᑎᐅᑉ ᕿᑎᖓ ᓄᓇᓯᒪᕕᐅᔪᖅ. ᑖᓐᓇ ᐃᓪᓗᔪᐊᕐᑕᖃᕐᓱᓂ ᓄᓇᓕᕐᓚᐅᔪᖅ ᐊᒻᒪᓗ ᐃᓄᑦᑕᖏᑦ ᐳᓛᕆᐊᕐᑐᓄᑦ ᑐᖕᖓᓇᕐᑐᒪᕆᐊᓘᓲᒍᑦᓱᑎᒃ. ᐃᓪᓗᔪᐊᖏᑦ ᓴᓇᒪᑦᓯᐊᑐᐊᓗᐃᑦ ᐊᒻᒪᓗ ᐊᕐᖁᑎᖏᑦ ᖂᑭᑦᑐᐊᐱᐅᑦᓱᑎᒃ ᑌᒣᒃᑲᒥᒃ ᒍᐃᒍᐃᓄᑦ ᐱᔪᕆᓇᕐᑐᐃᑦ ᓄᐃᑕᑎᑦᓯᒪᑕ ᖃᓄᐃᑦᑐᑯᕐᓯᒪᓂᖏᓐᓂᒃ ᓲᕐᓗ ᐆᒪᑎᒋᔭᐅᔪᕐᑎᑐᑦ ᒍᐃᒍᐃᑦ ᐱᐅᓯᑐᖃᖏᓐᓄᑦ ᐊᒥᐊᔨᑲᒻᒪᕆᓕᒫᒥ, ᓴᓇᓯᑎᐅᓂᕐᐹᓯᐊᓄᑦ ᓴᓇᔭᐅᖃᑦᑕᓯᒪᒻᒪᑕ ᐊᒻᒪᓗ ᐊᑯᓂᓂᑕᕐᓂᒃ ᓂᐅᕕᕐᕕᓂᒃ ᐊᔪᒉᓪᓘᓱᑎᒃ ᐳᓛᕆᐊᕐᓯᒪᔪᓄᑦ ᑕᑯᔭᕐᑐᑕᐅᒍᓐᓇᑐᓂᒃ ᐱᑕᖃᑦᓯᐊᑐᖅ ᑯᐯᒃ ᓯᑎ.

ᐊᕐᕌᒍᑕᒫᑦ, ᐊᖏᔪᑲᓪᓚᒪᕆᐊᓗᒻᒥᒃ ᓇᓪᓕᐅᓂᕐᓯᐅᓂᖃᓲᑦ ᑯᐯᒃᒥ ᐅᑭᐅᒃᑯᑦ ᐅᑭᐅᕐᓯᐅᑎᓂᒃ ᓇᓪᓕᐅᓂᕐᓯᐅᕈᑎᖃᕐᓱᑎᒃ Québec Winter Carnival -ᒍᓂᕋᕐᑕᐅᔪᒥᒃ ᐊᓯᖏᓐᓂᓗ ᐃᓗᕐᕈᓯᕐᓅᓕᖓᑦᓱᑎᒃ ᖁᕕᐊᓲᑎᖃᕐᓂᓂᒃ ᐱᖕᖑᐊᓂᕐᔪᐊᓂᖃᕐᑎᓯᓲᑦ ᑯᐯᒃᒥ, ᓯᓚᒥ ᖃᓄᐃᓘᓗᑳᑦᑎᑕᐅᓂᖃᕐᑎᓗᒋᑦ ᑯᐯᒃᒥᐅᔦᑦ ᐳᓛᕆᐊᕐᓯᒪᔪᐃᓪᓗ ᐊᑕᐅᑦᓯᑯᑦ, ᐱᐅᔪᒻᒪᕆᐊᓗᓐᓂᒃ ᐊᑦᔨᒋᔭᐅᖕᖏᑐᓂᒃ ᓄᐃᑕᑎᑦᓯᓂᖃᓲᑦ ᐊᒻᒪᓗ ᑕᕆᐅᕐᔪᐊᑉ ᐊᑭᐊᓂᒥᐅᑦ ᐃᓗᕐᕈᓯᑐᖃᖏᓐᓂᒃ ᑲᔪᓯᑎᑦᓯᓂᖃᖏᓐᓈᓂᕐᒥᓂᒃ ᓄᐃᑕᑎᑦᓯᓱᑎᒃ.

ᐅᑭᐅᒥ ᓇᓪᓕᐅᓂᕐᓯᐅᓂᖃᓕᑐᐊᕐᒪᑦ ᐊᖏᔪᕐᓛᓗᓐᓂᒃ ᓯᑯᑦᓱᑎᒃ ᓯᑐᕋᕿᕕᓕᐊᒍᓯᒪᔪᓂᒃ ᓴᑐᕋᕐᕕᓕᐅᕐᓯᒪᓲᑦ ᐊᓕᐊᓱᖕᖑᐊᕈᑎᑦᓴᐅᑎᓪᓗᒋᑦ ᓯᓚᕐᔪᐊᒥᐅᓄᑦ ᐃᓐᓂᐊᓯᒪᔪᓄᑦ. ᐱᐅᓯᑐᖃᕐᒥᒍᑦ ᑯᐯᒃᒥᐅᑦ ᓂᕐᓯᐅᕈᓯᒥᓂᒃ ᐃᒥᐊᓗᓕᐅᕈᓯᕐᒥᓂᓗ ᐱᔭᑦᓴᐅᑎᑦᓯᓲᒍᒻᒥᔪᑦ ᓂᕆᕕᓐᓂ. ᓯᑐᕋᐅᑎᓄᑦ ᓯᑮᕐᕕᓯᐊᒻᒪᕆᐊᓘᒻᒥᔪᖅ, ᓵᑦᑐᔮᓄᓪᓗ ᓯᑐᕋᕐᕕᓯᐊᒍᒻᒥᓱᓂ ᐊᓯᖏᓐᓄᓗ ᐅᑭᐅᒥ ᓱᓇᓱᐊᓗᑳᕐᕕᓴᐅᓲᒍᒻᒥᓱᓂ ᐃᓪᓗᒐᓴᓄᑦ ᖃᓂᑦᑐᐊᐱᒻᒥ ᑯᐯᒃ ᓯᑎᐅᑉ ᑕᕐᕋᖓᓂ. ᐊᐅᔭᒥ/ᐅᐱᕐᖔᒥ ᑯᐯᒃ ᓯᑎᒥ ᑐᓴᕐᓂᔮᕐᑎᓯᓂᒃᑯᑦ ᐱᖕᖑᐊᓂᕐᔪᐊᖃᓲᒍᒻᒥᔪᖅ Quebec City Summer Music Festival -ᒍᓂᕋᕐᑕᐅᔪᒥᒃ ᑕᑯᓐᓇᐅᔮᕐᑕᐅᑎᑦᓯᓂᖃᓲᒍᑦᓱᑎᒃ ᓯᓚᕐᔪᐊᓕᒫᒥ ᐱᓯᒪᑦᓱᑎᒃ ᑐᓴᕐᓂᔮᕐᑎᓂᒃ. ᑯᕿᒻᒥᔪᐊᓄᑦ ᑲᓕᒑᓗᓐᓄᑦ ᑲᓕᑕᐅᒐᐅᒐᕈᒪᔪᐃᑦ ᑲᓕᑕᐅᒐᐅᒐᕈᓐᓇᓲᒍᒻᒥᔪᑦ ᐊᑐᐃᓐᓇᐅᒪᓲᒍᒻᒪᑕ ᑌᒪᖕᖓᑦ, ᐊᒻᒪᓗ ᖃᒻᒥᐅᓂᕐᓴᑯᑦ, ᓯᑯᓂᒃ ᓯᓂᑦᑕᕕᓕᐅᕐᓯᒪᓲᒍᓕᕐᒪᑕ ᐊᕐᕌᒍᑕᒫᑦ ᓯᓂᑦᑕᕈᒪᔪᐃᑦ ᓯᓂᑦᑕᕈᓐᓇᓲᒍᓕᕐᒥᔪᑦ ᓯᑯᒥ ᐃᓪᓕᖃᕐᓱᑎᒃ, ᐆᒪᔪᕕᓂᕐᓂᒃ ᒥᕐᖁᓕᓐᓂᒃ ᐊᒥᕐᓂᒃ ᐃᒧᓯᒪᑦᓱᑎᒃ; ᐅᐱᓐᓇᑐᕋᑕᕐᓂᒃ ᕿᐱᖃᕐᓱᑎᒃ ᐊᓪᓕᓂᕆᑦᓱᒋᓪᓗ ᑕᕐᕋᒥ ᓄᓇᖃᕐᖄᓯᒪᔪᐃᑦ ᑌᒫᒃ ᐃᓅᓯᖃᕐᓯᒪᒻᒪᑕ ᑕᒫᓂ ᑯᐯᒃ ᓄᓇᑦᓯᐊᕌᓗᖓᓂ.

ᑯᐯᒃ ᓯᑎᒥ ᓱᓇᓱᐊᕋᑦᑕᖃᕐᒪᖔᑦ ᖃᐅᔨᒐᓱᐊᕈᒪᔪᐃᑦ ᑕᑯᒐᓱᐊᖁᓐᓇᑐᑦ ᖃᕆᑕᐅᔭᑎᒍᑦ ᑕᑯᒐᓱᐊᕐᕕᖃᕈᓐᓇᑐᑦ ᐆᒥᖓ Québec tourism website.