ᐃᑦᓯᕖᑦ ᑌᒣᑐᐃᓐᓇᖏᑦᑐᑦ

1-   ᐱᑦᔪᑎᒋᑦᓱᒋᑦ ᐱᖕᖑᐊᕆᐊᕐᑐᑐᑦ ᐱᖕᖑᐊᕈᑎᑦᓴᔭᖏᑕ ᖃᓄᑐᐃᓐᓇᖅ ᓴᓇᒻᒪᖃᓱᖑᓂᖏᑦ ᐊᖏᓂᖃᓱᖑᓂᖏᓪᓗ, ᑖᒃᑯᐊ ᐃᑦᓯᕕᓐᓂᒃ ᐅᓯᓴᓕᐅᕐᕕᑯᑦ ᐅᓯᑦᓴᓕᐊᖑᒋᐊᖃᕐᐳᑦ ᐃᓚᒋᔭᐅᑎᑕᐅᓱᖑᕗᓪᓗ ᐊᑭᖃᖕᖏᑐᓂᒃ ᐃᑦᓯᕕᓐᓂᒃ ᐅᓯᒍᑎᓄᑦ.

• ᖄᑭᕈᑏᑦ, ᓯᑮᓄᑦ ᓯᑐᕋᐅᓯᔭᐅᑏᑦ, ᒪᙯᓯᐅᑏᑦ ᐃᖃᓗᓐᓂᐊᕈᑎᓪᓗ
• ᖄᑭᕈᑏᑦ, ᓯᑮᕈᓄᑦ ᓯᑐᕋᐅᓯᔭᐅᑏᑦ, ᒪᙯᓯᐅᑏᑦ ᐃᖃᓗᓐᓂᐊᕈᑎᓪᓗ ᐃᑭᒍᑌᕐᕕᓂ ᐃᑭᑎᑕᐅᒍᓐᓇᑐᓄᑦ ᐃᓚᒋᔭᐅᒍᓐᓇᑐᑦ ᐃᑦᓯᕕᑦᑎᑐᑦ/ᐃᕐᓯᕕᑦᑎᑐᑦ ᐃᑭᒍᒫᕐᓂᐊᑎᑕᐅᓗᑎᒃ, ᐴᕐᑐᓯᒪᑦᓯᐊᓴᓚᐅᕈᑎᒃ ᓱᒃᑯᑕᐅᒋᒃᑯᑎᑦᓴᖏᓐᓂᒃ ᐊᒻᒪᓗ ᒪᓕᒐᓕᐊᒍᓯᒪᔪᓕᒫᑦ ᒪᓕᑦᑕᐅᓴᓚᐅᕐᐸᑕ ᐊᐅᓪᓚᑎᑕᐅᒍᓐᓇᑐᓄᑦ ᐃᓕᖓᔪᐃᑦ.

• ᑐᑫᓛᕈᑏᑦ (ᐯᓯᑰᑦ)
• ᒪᕉᓂᒃ ᐊᑦᓴᓗᐊᓖᑦ ᑐᑫᓚᒉ/ᐯᓯᑯᐃᑦ ᐅᓯᔭᐅᓱᖑᕗᑦ ᐊᑭᖃᕐᑎᑕᐅᑦᓱᑎᒃ ᐊᑦᔨᒌᑐᐃᓐᓇᒥᒃ $52.50-ᓂᑦ ᑎᑭᑦᓱᒋᑦ $57.49 (ᑖᒃᓯᖏᑦ ᐃᓚᐅᑎᓪᓗᒋᑦ) ᓇᒨᒐᓗᐊᕐᐸᑦ ᐅᐸᑦᑕᖓᑦ. ᑐᑫᓚᒉ/ᐯᓯᑯᐃᑦ, ᐱᖕᖑᐊᕈᑏᑦ ᐊᓯᒥ ᓴᓂᐊᓐᓂ, ᐃᓚᒋᔭᐅᖕᖏᓚᑦ ᐊᑭᖃᖕᖏᑐᑎᑕᐅᓲᓄᑦ ᐅᓯᓄᑦ; ᐃᓕᖓᑎᑕᐅᓂᖃᕋᒥᒃ ᐊᒥᓲᓗᐊᕈᑎᐅᑦᓱᑎᒃ ᐅᓯᑦᓴᑎᑐᑦ ᐅᓯᓕᐅᑦᔭᐅᓲᖑᕗᓪᓗ, ᐅᓯᖃᐅᑎᒥ ᐃᓂᖃᓚᖓᑐᐊᕋᒥᒃ.
• ᐊᖂᑎᖏᑦᑕ ᕿᑦᔮᖏᑦ ᓱᑫᑦᔮᓯᒪᒋᐊᓖᑦ ᐊᒻᒪᓗ ᐃᓯᖕᖓᖃᑕᐅᓗᑎᒃ ᑎᒥᖓᓄᑦ, ᐊᓴᓗᐊᖏᓪᓗ ᐳᓪᓚᖃᕈᓐᓀᓗᑎᒃ ᐊᒻᒪᓗ ᐃᑎᒑᓐᓄᑦ ᑐᑫᓛᕈᑎᑕᖏᑦ ᐲᕐᓯᒪᓗᑎᒃ.

* ᐃᙯᓕᓴᕐᓂᑯᑦ ᐱᖕᖑᐊᕈᑎᓂᒃ ᐱᐅᒃᑯᑎᖃᕈᕕᑦ ᐊᒥᓱᓂᒃ ᐅᕝᕙᓘᓐᓃᑦ ᐊᖏᓗᐊᕐᑐᓂᒃ, ᐊᐅᓪᓚᑐᑦᓴᓕᐊᕆᔭᐅᒍᓐᓇᑐᑦ ᐃᓄᐃᑦ ᖃᖓᑦᑕᔫᖏᓐᓄᑦ ᐅᓯᒐᑦᓴᓕᕆᕕᒃ ᐊᕐᖁᑎᒋᖔᕐᓗᒍ. 

ᐃᐊ ᐃᓄᐃᒃᑯᑦ ᑐᓴᕐᓂᔮᕈᑎᓂᒃ ᐅᓯᔭᐅᓚᖓᔪᓂᒃ ᐃᑭᑎᑦᓯᒍᓐᓇᑐᑦ ᐴᕐᑐᓯᒪᑦᓯᐊᑐᐊᕐᐸᑕ ᐅᕝᕙᓘᓐᓃᑦ ᓇᔪᕐᑎᒋᔭᐅᓚᖓᔪᓂᒃ ᖃᖓᑦᑕᔫᒥ/ᑎᒻᒥᔫᒥ, ᐅᖁᒣᓐᓂᖏᑦ ᖃᓄᐃᓪᓗᐊᓂᖏᓪᓗ ᐊᒻᒪᓗ ᓴᓇᒻᒪᖏᑦ ᓇᔪᕐᑎᒋᔭᐅᓗᑎᒃ ᖃᓄᐃᖕᖏᑐᐊᕐᐸᑕ.

ᖃᖓᑦᑕᔫᒥ/ᑎᒻᒥᔫᒥ ᓇᔪᕐᑎᒋᔭᐅᓚᖓᓗᑎᒃ ᐃᑭᐅᑦᔭᐅᓚᖓᔪᑦ

ᐃᑦᓯᕙᐅᑌᑦ ᑐᓴᕐᓂᔮᕈᑎᓄᑦ ᐊᑐᕐᑕᐅᓚᖓᓗᑎᒃ ᓂᕕᐊᕆᔭᐅᕐᖃᔭᖏᑦᑐᑦ, ᑭᓯᐊᓂ ᒥᑭᔪᖕᖑᐊᒍᓂᕐᓭᑦ/ᒥᑭᔪᕐᓚᐅᓂᕐᓭᑦ ᑐᓴᕐᓂᔮᕈᑏᑦ ᓇᔪᕐᑎᒋᔭᐅᒍᓐᓇᑑᒐᓗᐊᑦ (ᐅᑦᑑᑎᒋᓗᒋᑦ; ᓱᐴᒉᑦ ᖃᓄᐃᑦᑐᑐᐃᓐᓀᑦ, ᑎᑦᑐᓚᐅᑏᑦ, ᑯᑭᑕᐸᐅᑏᑦ ᑕᐅᑎᕈᑎᓪᓗ ᐊᒋᐊᑦ) ᑕᒪᒃᑯᐊᓗᑳᑦ ᓇᑦᓴᑕᐅᒍᓐᓇᑐᐃᓐᓇᕆᐊᓖᑦ ᖃᖓᑦᑕᔫᒧᑦ/ᑎᒻᒥᔫᒧᑦ ᐃᓄᐃᑦ ᖃᖓᑦᑕᔫᖏᑦᑕ/ᑎᒻᒥᔫᖏᑦᑕ ᒪᓕᒐᓕᐊᕆᓯᒪᔭᖏᑦ ᒪᓕᒍᑕᐅᑦᓴᓚᐅᕐᐸᑕ ᓇᔪᕐᑎᒋᔭᐅᒍᓐᓇᑐᐃᑦ ᖃᓄᐃᓪᓗᕆᐊᖃᕐᓂᖏᑦ ᒪᓕᓪᓗᒋᑦ ᐊᒻᒪᓗ ᐃᒣᑦᓴᓚᐅᕐᐸᑕ:

• ᓱᒃᑯᓴᐅᑎᒋᓂᐅᔭᖕᖏᑐᓂᒃ ᓯᑎᔪᓂᒃ ᐴᖃᕐᓗᑎᒃ.
• 5 ᑭᓘᒥᑌᑦ (11 ᐸᐅᓐ) ᐅᖓᑖᓄᑦ ᐅᖁᒣᓐᓂᖃᖕᖏᑐᐊᕈᑎᒃ.
• ᐃᑦᓯᕙᐅᑕᐅᑉ ᓯᕗᕋᕐᓃᑑᑉ ᐊᑖᓅᕈᓐᓇᑐᐊᕈᑎᒃ ᐅᕝᕙᓘᓐᓃᑦ ᖁᓕᕈᐊᓄᑦ.

ᖃᖓᑦᑕᔫᑦ/ᑎᒻᒥᔫᑦ ᐅᓯᒐᑦᓴᖃᐅᑎᖏᑦ ᐃᓂᑭᑦᑑᓂᖏᓐᓄᑦ, ᑐᓴᕐᓂᔮᕈᑏᑦ ᐊᑕᐅᑦᓯᑯᑦ ᐃᑭᔪᒧᑦ ᐊᐅᓪᓚᖃᑎᐅᒍᓐᓇᒪᖔᑕ ᓴᑑᑎᖃᕐᑎᓯᒍᓐᓇᔭᖏᑦᑐᒍᑦ. ᐃᓂᑭᑦᑑᓂᖓᓄᑦ “ᓯᕗᓪᓕᐸᐅᑐᐃᓐᓇᑐᐃᑦ, ᐊᑦᔭᕋᑦᓴᖏᑦ ᐃᑭᑎᑕᐅᖃᑦᑕᓲᑦ,” ᑌᒣᒻᒪᑦ ᐃᑭᒋᐊᕐᑐᓴᐅᑎᒋᒍᓐᓇᑐᐊᕈᑦᓯ ᐱᐅᓂᕐᓴᐅᒐᔭᕐᑐᖅ ᓯᕗᓪᓕᐸᐅᒐᓱᐊᕐᓗᓯ.

ᑐᓴᕐᓂᔮᕈᑎᓯ ᐃᑭᒋᐊᕐᑐᕕᒻᒥ ᖃᐅᔨᔭᐅᑎᒋᐊᖃᕋᔭᕐᖂᑕᓯ ᐊᒻᒪᓗ ᐃᑭᑎᑕᐅᑐᐃᓐᓇᕆᐊᖃᕐᓱᑎᒃ ᐅᓯᒐᑦᓴᓅᕐᑕᐅᓂᐊᕐᑎᓗᒍ, ᑎᒻᒥᔪᕐᓂᐊᕕᒻᒥ ᐱᓇᓱᑦᑎ ᐅᕝᕙᓘᓐᓃᑦ ᖃᖓᑦᑕᔫᕐᑏᑦ ᑐᑭᑖᕈᓐᓇᑐᑐᐊᑦ ᐊᑦᑕᓇᕐᑑᔪᕆᑦᓯᑐᐊᕈᑎᒃ ᓇᔪᕐᑎᒋᔭᐅᖕᖏᑑᑎᑦᓯᒍᓐᓇᒥᔪᑦ. ᑕᒪᒃᑯᐊ ᐱᑦᔪᑎᒋᑦᓱᒋᑦ, ᑐᓴᕐᓂᔮᕈᑏᑦ ᐴᕐᑐᑕᐅᓯᒪᑦᓯᐊᒋᐊᓖᑦ ᓯᑎᔪᓂᒃ ᐴᖃᕐᓗᑎᒃ ᑐᓴᕐᓂᔮᕈᑏᑦ ᐴᑦᓴᔭᖏᓐᓃᓯᐊᕐᓗᑎᒃ.

ᑐᓴᕐᓂᔮᕈᑎᒃ ᓇᔪᕐᑎᒋᓚᖓᔭᐃᑦ ᖃᖓᑦᑕᔫᒥ/ᑎᒻᒥᔫᒥ ᓇᑦᓴᑕᐅᒍᓐᓇᑐᕐᑎᓄᑦ ᐃᓱᒪᒋᔭᐅᓚᖓᔪᖅ, ᓈᒻᒥᓂᕆᔭᐅᔪᕐᑎᑐᑦ ᐅᕝᕙᓘᓐᓃᑦ ᐅᓯᔭᐅᒍᓐᓇᑐᕐᑎᑐᑦ (ᖃᓄᐃᓪᓗᐊᓂᖓ ᐊᖏᓂᖓᓗ ᑐᓴᕐᓂᔮᕈᑎᐅᑉ).

ᐃᑭᑎᑕᐅᓚᖓᑦᓱᑎᒃ ᐅᓯᔭᐅᓚᖓᔪᐃᑦ ᐃᑦᓯᕖᑦ/ᐃᕐᓯᕖᑦ

ᖃᐅᔨᒪᒐᑦᑕ ᑐᓴᕐᓃᔮᕈᑎᒋᔭᐅᔪᓂᒃ ᓇᐅᑐᐃᓐᓇᓄᑦ ᐱᒻᒪᕆᐅᒻᒪᑕ, ᑲᒪᒋᑦᓯᐊᕋᓱᐊᖃᑦᑕᓚᖓᔭᕗᑦ. ᐊᒥᔪᒥᒃ ᑐᓴᕐᓂᔮᕈᑎᒥᒃ ᐃᑭᔪᑦᓴᓕᐅᓚᖓᑐᐊᕈᕕᑦ, ᓯᕗᓂᐊᒍᑦ ᐊᐅᓪᓚᑐᑦᓴᒫᓕᐅᕐᑐᓴᐅᕗᑎᑦ ᐊᑦᑕᓀᑦᑐᓯᐊᒍᓗᓂ ᐃᑦᓯᕕᓕᕆᔨᓄᑦ/ᐃᕐᓯᕕᓕᕆᔨᓄᑦ ᐅᐃᒻᒪᔮᕈᑕᐅᒍᓐᓀᓗᓂ ᑲᒪᒋᔭᐅᑦᓯᐊᓂᕐᓴᐅᒐᔭᕐᒪᑦ.

ᖃᓄᐃᓪᓗᐊᑐᓂᒃ ᐃᑭᑎᑕᐅᔨᐊᖃᕈᓐᓇᒪᖔᑕ ᐊᐅᓪᓚᓚᖓᔪᐃᑦ ᒪᓕᒐᖃᕐᒪᑕ, ᑐᓴᕐᓂᔮᕈᑏᑦ ᐃᓚᒋᔭᐅᑎᑕᐅᓲᑦ ᐃᑭᑎᑕᐅᒍᓐᓇᑐᓄᑦ, ᖃᑦᓯᓂᒃ ᐃᑦᓯᕕᖃᕈᓐᓇᑎᑕᐅᓂᖏᑦ/ᐃᕐᓯᕕᖃᕈᓐᓇᑎᑕᐅᓂᖏᑦ ᒪᓕᑦᓱᒋᑦ (ᑐᓴᕐᓂᔮᕈᑏᑦ ᐃᓚᐅᔪᑦ ᐃᑦᓯᕕᒋᔭᐅᓂᕋᕐᑕᐅᔪᓄᑦ/ᐃᕐᓯᕕᒋᔭᐅᓂᕋᕐᑕᐅᔪᓄᑦ) ᐅᖁᒣᓐᓂᕆᒋᐊᓕᖏᓐᓄᑦ ᐅᖓᑖᓄᑐᐊᕐᐸᑕ ᐅᖓᑖᓄᕈᑎᖏᑦ ᐊᑭᓕᕐᑕᐅᒋᐊᓖᑦ. ᑐᓴᕐᓂᔮᕈᑏᑦ ᖃᖓᑦᑕᔫᒥ/ᑎᒻᒥᔪᒥ ᓇᔪᕐᑎᒋᔭᐅᒍᓐᓇᑐᐃᑦ ᐅᖁᒣᓐᓂᖏᑦ 32 ᑭᓘᒥᑕᐅᒍᓐᓇᑐᑦ (70 ᐸᐅᓐ).

ᖃᓄᖅ ᐴᕐᑐᓯᒪᒋᐊᖃᕐᒪᖔᑕ

ᖃᓄᐃᑦᓴᒐᓛᖕᖏᑐᒍᑦ ᑐᓴᕐᓂᔮᕈᑎᓂᒃ ᐊᐅᓪᓚᑎᑕᐅᒍᒫᕐᓂᐊᑐᓂᒃ ᐃᑦᓯᕕᒋᔭᐅᔪᕐᑎᑐᑦ/ᐃᕐᓯᕕᒋᔭᐅᔪᕐᑎᑐᑦ, ᐊᑐᓂ ᓯᑎᔪᔭᕐᓂᒃ ᐴᕐᑐᓯᒪᑦᓯᐊᓴᓚᐅᕐᐸᑕ. ᓯᖁᑦᑎᕇᒃᑯᑏᑦ ᐳᓪᓚᓖᑦ ᐊᑐᕐᑕᐅᒐᓗᐊᕈᑎᒃ ᖃᓄᐃᖕᖏᑑᒐᓗᐊᑦ ᐅᓪᓗᓭᓐᓇᖅ ᐊᑦᔭᑕᐅᓚᖓᔪᓄᑦ, ᑭᓯᐊᓂ ᐱᐅᑦᓯᐊᒐᓛᖕᖏᑐᑦ ᖃᖓᑦᑕᔫᒃᑯᑦ/ᑎᒻᒥᔫᒃᑯᑦ ᐊᐅᓪᓚᑎᑕᐅᓚᖓᔪᓄᑦ ᐳᓪᓚᖏᑦ ᖄᕋᓲᒍᒻᒪᑕ .

ᑐᓴᕐᓂᔮᕈᑏᑦ ᐴᖃᑦᓯᐊᒋᐊᓖᑦ ᓈᒻᒪᒋᑦᓯᐊᑕᖏᓐᓂᒃ ᐊᐅᓚᑕᐅᓕᕈᑎᒃ ᑕᑦᑐᖁᑎᓕᓐᓂ. ᐴᕐᒥᓂ ᓂᒪᔮᑐᐊᕐᐸᑕ ᑕᑦᑐᖁᓯᕐᓗᒋᑦ ᖃᓪᓗᓈᕐᑕᓄᑦ, ᐊᓪᓚᕈᑎᓄᓘᓐᓃᑦ ᐅᕝᕙᓘᓐᓃᑦ ᑭᐊᑎᓄᑦ ᐱᐅᔫᒐᔭᕐᑐᖅ ᑐᓴᕐᓂᔮᕈᑎᒃ ᐊᐅᓚᓗᐊᖃᑦᑕᓂᐊᖕᖏᒪᑦ ᐴᕐᒥᑕ ᐃᓗᐊᓂ. ᑐᓴᕐᓂᔮᕈᑎᐅᑉ ᐴᖓ ᐊᓪᓚᕕᒋᓯᒪᑦᓯᐊᒋᐊᓕᒃ ᓯᖁᒥᒍᐊᕐᑐᖅ ᓚᔪᓂᒃ ᐊᓪᓚᕕᐅᓯᒪᑦᓯᐊᕆᐊᓕᒃ, ᑐᓴᕐᓂᔮᕈᑎᐅᒋᐊᖓ ᓇᓗᓇᖕᖏᓯᐊᕋᓗᐊᕐᐸᑦ.

ᐊᑦᓱᓈᓖᑦ ᑐᓴᕐᓂᔮᕈᑏᑦ ᖃᖓᑦᑕᔫᒃᑯᑦ/ᑎᒻᒥᔫᒃᑯᑦ ᐊᐅᓪᓚᑎᑕᐅᓕᑐᐊᕈᑎᒃ ᓱᕐᕋᑕᐅᒻᒪᕆᒍᓐᓇᒪᑕ ᓂᓪᓕᓇᕐᑐᒨᑐᐊᕋᒥᒃ ᓂᕈᒥᑦᑐᒨᑐᐊᕋᒥᓪᓗ ᐊᒻᒪᓗ ᖁᑦᓱᑕᐅᓐᓇᑐᒨᑐᐊᕋᒥᒃ, ᓱᑲᑎᕆᐅᑎᖏᑦ ᓯᖁᒻᒪᑕᐅᓚᕿᒍᓐᓇᒪᑕ ᐊᑦᓱᓈᖏᑦ ᓱᑲᖓᑐᐊᕐᒪᑕ ᐅᕝᕙᓘᓐᓃᑦ ᑭᑦᑐᕋᕐᑕᐅᒍᓐᓇᓱᑎᒃ. ᓱᒃᑯᑕᐅᖁᖕᖏᑐᐊᕈᑦᓯᐅᒃ ᓇᒻᒥᓂᖅ ᐃᑉᐱᒋᑦᓯᐊᕆᐊᓕᓯ, ᐊᑦᓱᓈᖏᑦ ᓱᑲᖓᑎᒍᓐᓀᓗᒋᑦ ᐱᐅᓂᕐᓴᐅᒐᔭᕐᑐᑦ.

ᐃᓄᐃᑦ ᖃᖓᑦᑕᔫᖏᑦ/ᑎᒻᒥᔫᖏᑦ ᐅᓯᒍᓐᓇᓲᒍᕗᑦ ᓱᔪᒍᐊᕐᑐᓂᒃ ᐃᓚᒋᔭᐅᒍᓐᓇᑎᓪᓗᒋᑦ ᐃᑦᓯᕕᒋᔭᐅᔪᓄᑦ/ᐃᕐᓯᕕᒋᔭᐅᔪᓄᑦ, ᓇᓗᓀᒃᑯᓯᕐᓯᒪᑦᓴᓚᐅᕐᐸᑕ ᐃᒫᒃ: “ᓱᔪᒍᐊᕐᑐᐃᑦ”.

• ᐴᕐᑐᓯᒪᑦᓯᐊᖏᑦᑐᐃᑦ ᐊᐅᓪᓚᑎᑕᐅᓂᖏᔭᖕᖏᑐᑦ ᐃᑭᕕᑦᓴᓕᐅᕐᕕᒥ ᐅᕝᕙᓘᓐᓃᑦ ᐅᓯᒐᑦᓴᓂᒃ ᐊᐅᓪᓚᑎᑦᓯᔨᓄᑦ.
• ᐃᓄᐃᑦ ᖃᖓᑦᑕᔫᖏᑦ ᐸᓯᔭᑦᓴᐅᒍᓐᓇᖏᓪᓚᑦ ᓱᔪᑦᑐᖃᕐᓂᐸᑦ ᖃᓄᑐᐃᓐᓇᖅ, ᑭᖑᕙᕆᐊᑲᑦᑕᑐᕕᓂᐅᓂᖏᓐᓄᑦ ᖃᖓᑦᑕᔫᑦ ᐸᓯᔭᑦᓴᐅᒍᑎᒋᒍᓐᓇᖏᒻᒥᔭᖏᑦ.

* ᐃᑭᐊᕐᒥᐅᑕᑦᓴᔭᕐᓱᑎᒃ ᐴᑦ ᐊᒻᒪᓂᖃᕆᒃᑯᑎᑦᓴᔭᐅᓗᑎᒃ ᑌᒣᖕᖏᓚᑦ ᐊᒻᒪᓗ ᑌᒣᑦᑐᓂᒃ ᐴᓖᑦ ᖃᖓᑦᑕᔫᒨᑕᐅᓂᐅᔭᕋᑎᒃ.