ᖃᖓᑕᔪᓂᒃ ᐱᒍᑦᔨᒍᑎᐅᓲᑦ
ᖃᓄᐃᓘᓲᑦ ᐃᓄᐃᑦ ᖃᖓᑦᑕᔫᖏᑦ/ᑎᒻᒥᔫᖏᑦ?
ᖃᐅᔨᒐᓱᐊᕈᓐᓇᖁᓯ ᖃᖓᑦᑕᔫᒥ/ᑎᒻᒥᔫᒥ ᐱᒍᑦᔨᒍᑎᒋᓲᑦᑎᓂᒃ, ᓂᕆᑎᑦᓯᒍᑎᒋᓲᑦᑎᓂᒃ, ᐅᖁᒻᒥᓘᒪᒐᑦᓴᓂᒃ, ᖃᖓᑕᓗᓂ ᐊᓕᐊᖕᖑᐊᕈᑎᓂᒃ, ᖃᐅᔨᒪᔭᐅᒋᐊᓕᓐᓂᒃ ᐊᒻᒪᓗ ᖃᕆᑕᐅᔭᒧᑦ ᐃᓕᔨᒐᓱᐊᕈᑎᓂᒃ. ᖃᐅᔨᒋᐊᕐᑕᐅᖁᔨᒻᒥᔪᒍᑦ ᖃᓄᒍᓗᑐᐃᓐᓈᕆᐊᖃᖕᖏᓂᕐᒧᑦ ᒪᓕᒐᕐᓂᒃ, ᐊᓕᐊᓇᕐᓱᓂ ᖃᖓᑕᔪᕕᓂᐅᖁᓪᓗᓯ.
ᖃᖓᑕᔪᓂᒃ ᐱᒍᑦᔨᒍᑎᐅᓲᑦ
ᐃᓄᐃᑦ ᐊᓕᐊᓱᒃᑯᖅ ᐊᑐᐃᓐᓇᖃᓚᖓᓕᕐᒥᒋᐊᒥᒃ ᓇᕐᓯᓯᕐᓯᒪᔪᓂᒃ ᓂᕿᓂᒃ ᖃᖓᑦᑕᔫᒥ ᐃᑭᒪᔪᓄᑦ ᐅᕙᓂ Boeing 737 ᐊᒻᒪᓗ Dash 8 ᒥ ᐃᑭᒪᔪᓄᑦ, ᒪᓕᓪᓗᒋᑦ ᖃᖓᑕᓂᕆᒋᐊᓕᖏᑦ. ᐱᒍᑦᔨᒍᑎᖃᓲᒍᒻᒥᔪᑦ ᐃᓱᕐᕆᖁᔨᒧᑦ ᐊᒻᒪᓗ ᐃᓱᐊᖁᑎᐅᑎᒐᓱᐊᕐᓱᒋᑦ ᐅᑯᐊ.
- ᐅᖁᒻᒥᓘᒪᒐᑦᓴᖃᕐᑎᓯᓲᑦ ᖃᖓᑦᑕᔫᑦ/ᑎᒻᒥᔫᑦ ᐊᒥᓲᓂᕐᓭᑦ ᐊᐅᓚᔪᑦ.
- ᐃᓄᐃᑦ ᒥᑦᓵᓄᑦ ᕿᒥᕐᕈᐊᓕᐊᕆᓲᕗᑦ, ᓄᓇᑦᓯᐊᒥ ᐱᕙᓪᓕᐊᔪᑦ ᖃᐅᑕᒫᑦ ᑐᓴᕋᑦᓭᑦ ᓯᑯᑦᓴᔭᒧᑦ ᐊᓪᓚᓯᒪᔪᐃᑦ ᐊᒻᒪᓗ ᒪᑭᕝᕕᑯᑦ ᕿᒥᕐᕈᐊᓕᐊᕆᓲᖏᑦ ᐊᓪᓚᓂᐊᕋᑦᓭᑦ/ᐊᑐᐊᕋᑦᓭᑦ ᐊᑐᐃᓐᓇᐅᑎᑕᐅᓲᑦ ᒪᓐᑐᔨᐊᓪᒥᑦ ᐱᑦᓱᑎᒃ ᖃᖓᑦᑕᑐᓄᑦ.
- ᐃᓘᓐᓇᑎᒃ ᐳᔪᓖᑦ Boeing 737-ᓖᑦ ᐊᒻᒪᓗ Dash 8 ᖃᖓᑦᑕᔫᑦ ᐊᓇᕐᕕᑕᓖᑦ/ᖁᕐᕕᖁᕕᑦᑕᓖᑦ.
* ᖃᐅᔨᒪᒋᑦᓯ ᖃᐅᔨᒪᓇᖕᖏᒪᑦ ᓂᕿᓂᒃ ᐊᑐᐃᓐᓇᖃᖃᑦᑕᓚᖓᒻᒪᖔᑦ ᐃᓂᓕᐅᕐᑐᕕᓂᕐᓄᑦ 5ᖒᑉ ᐅᖓᑖᓂ ᖃᐅᖓᓂ ᖃᖓᑕᓛᕐᓗᓂ.
ᐱᓪᓗᑯᒋᐊᓕᓐᓂᒃ ᓂᕆᒐᑦᓴᖃᕐᑎᓯᓃᑦ
ᐃᑭᒪᔨᐊᕗᑦ/ᐃᑯᒪᔨᐊᕗᑦ ᓈᒻᒪᓴᑦᓯᐊᖁᒧᑦ ᐅᕙᑦᑎᓂ ᖃᖓᑕᓕᕈᑎᒃ ᐱᓪᓗᑯᒋᐊᓕᓐᓂᒃ ᓂᕆᒋᐊᖃᑐᐊᕐᒪᑕ ᖃᓄᐃᒍᑎᖃᕐᓂᒥᓄᑦ ᐅᕝᕙᓘᓐᓃᑦ ᐅᑉᐱᓂᕐᒥᓂᒃ ᐱᑦᔪᑎᖃᕐᓱᑎᒃ ᓂᕆᓂᒃᑯᑦ ᑭᖕᖒᒪᒋᔭᖏᓐᓂᒃ ᓂᕆᑎᑦᓯᒐᓱᐊᓲᑦ ᐃᓄᐃᑦ ᖃᖓᑦᑕᔫᖏᓐᓂᒃ/ᑎᒻᒥᔫᖏᓐᓂᒃ ᐱᓇᓱᑦᑏᑦ, ᖃᓄᐃᑦᑐᑐᐃᓐᓇᓂᒃ ᐊᑦᔨᒌᑦᔭᖏᑦᑐᓂᒃ ᐱᓪᓗᑯᑦᓯᒪᑦᓱᑎᒃ ᓂᕆᔭᐅᒍᒪᔪᓂᒃ ᓂᕆᔭᐅᒋᐊᓕᓐᓂᓘᓐᓃᑦ.
- ᐱᕈᕐᑐᕕᓂᑐᐃᓐᓇᐅᓱᑎᒃ ᓂᕆᔭᑦᓭᑦ (VLML): ᓂᕿᑐᐃᓐᓇᑕᖃᕐᔭᒐᑎᒃ ᐃᖃᓗᑦᑕᖃᑦᔭᒐᑎᓪᓗ, ᐃᒻᒧᓴᔭᑦᑕᖃᕐᓱᑎᒃ ᐊᒻᒪᓗ ᒪᓐᓂᓂᒃ.
- ᐱᕈᕐᑐᕕᓂᑐᐃᓐᓇᐅᓱᑎᒃ ᓂᕆᔭᑦᓭᑦ (VGML): ᓂᕿᑐᐃᓐᓇᑕᖃᑦᔭᒐᑎᒃ ᐃᖃᓗᑦᑕᖃᑦᔭᒐᑎᓪᓗ ᐊᒥᐊᔨᑲᒥᐅᓄᑦ ᓂᕆᔭᑦᓴᔭᐅᓲᑦ ᐃᒻᒧᓴᔭᕐᑕᖃᑦᔭᒐᑎᒃ ᐊᒻᒪᓗ ᒪᓐᓂᑕᖃᑦᔭᒐᑎᓪᓗ.
- Gluten-ᑕᖃᖕᖏᑐᐃᑦ ᓂᕆᔭᑦᓭᑦ (GFML): ᐅᓪᓛᕈᒥᑕᑦᓴᔭᕐᑕᖃᖕᖏᑐᑦ ᐅᑯᓂᖓ (wheat, rye, barley, oats) ᐅᕝᕙᓘᓐᓃᑦ ᑎᐸᖃᖕᖏᑐᓂᒃ ᓀᑦᓴᐅᔭᖏᑦᑐᓂᓗ ᐸᑕᑦᓴᖃᑦᔭᖏᑦᑐᑦ/ᒪᒪᑦᓴᐅᑎᑕᖃᑦᔭᖏᑦᑐᑦ.
- ᓂᕆᔭᑦᓭᑦ ᐊᐅᖏᑦ ᐸᑕᑦᓴᖃᓗᐊᓲᓄᑦ/ᒪᒪᑦᓴᐃᑎᖃᓗᐊᓲᓄᑦ (DBML): ᐱᑕᑦᓴᖃᖕᖏᑐᑦ/ᒪᒪᑦᓴᐅᑎᖃᖕᖏᑐᑦ ᓂᕆᒐᑦᓭᑦ.
- ᐃᒻᒧᓴᔭᕐᑕᖃᖕᖏᑐᑦ ᓂᕆᔭᑦᓭᑦ(NLML): ᐃᒻᒧᓴᔭᕐᑕᖃᖕᖏᑐᑦ ᓂᖀᑦ ᓱᓇᐅᓂᖏᑦᑕ ᐊᒃᓚᑕᐅᓯᒪᐅᑎᖏᑦ
ᐊᐅᓪᓚᓚᐅᕐᓇᖅ ᐅᓪᓗᐃᑦ ᑕᓪᓕᒣᑦ (5) ᓯᕗᓂᐊᒍᑦ ᖃᓄᐃᑦᑐᓂᒃ ᓂᕆᒐᑦᓴᖃᕐᑎᑕᐅᒍᒪᒐᔭᕐᒪᖔᕐᐱᑦ ᖃᐅᔨᒪᑎᑦᓯᓴᐅᑎᒋᖁᔨᒐᔭᕐᑐᒍᑦ ᐅᕝᕙᓘᓐᓃᑦ ᐃᓂᑦᓴᓕᐅᓕᑐᐊᕈᕕᑦ ᖃᐅᔨᑎᑦᓯᓗᑎᑦ.
ᓂᕿᓂᒃ ᑐᑦᓯᕋᕐᓯᒪᒍᓐᓇᑐᑎᑦ ᐃᓂᓕᐅᕐᕕᑎᓐᓂ, ᖃᕆᑕᐅᔭᑎᒍᓪᓘᓃᑦ ᐅᕝᕙᓘᓐᓃᑦ ᐃᓂᓕᐅᓕᕈᑦᓯ ᐃᓂᓕᐅᕐᕕᐅᑉ ᐱᓇᓱᑦᑎᖁᑎᖏᓐᓄᑦ ᐅᖄᓚᓗᓯ
ᓂᕆᔭᒥᓄᑦ ᐃᒥᕐᑕᒥᓄᓪᓘᓃᑦ ᑎᒥᖏᑦ ᓱᕐᕋᑕᐅᒍᑎᖃᓲᑦ
ᐊᒥᓱᐃᑦ ᓂᕿᓄᑦ ᑎᒥᖏᑦ ᓱᕐᕋᑕᐅᒍᑎᖃᓲᒍᕗᑦ. ᐃᓄᐃᑦ ᖃᖓᑦᑕᔫᖏᑦ/ᑎᒻᒥᔫᖏᑦ ᓱᕐᕋᑕᐅᖕᖏᑑᑎᑦᓯᒍᓐᓇᕆᐊᒥᒃ ᓴᑑᑎᖃᕐᑎᓯᒍᓐᓇᔭᖏᒃᑲᓗᐊᓱᑎᒃ ᓂᕆᔭᒥᓄᑦ ᐃᒥᑦᑕᒥᓄᓪᓘᓃᑦ ᓱᕐᕋᑕᐅᒍᑎᖃᓲᓂᒃ, ᑭᓯᐊᓂ ᓂᕆᔭᑦᓴᓕᐊᒍᓯᒪᔪᓕᒫᑦ ᐅᕝᕙᓘᓐᓃᑦ ᐅᖁᒻᒥᓗᒐᑦᓭᑦ ᓂᕆᒃᑫᒍᑎᐅᓲᑦ ᖃᖓᑦᑕᔫᒥ/ᑎᒻᒥᔫᒥ ᓴᐅᓈᕐᑕᖃᓲᒍᖕᖏᑐᑦ.
ᑌᒣᒐᓗᐊᕐᑎᓗᒍ, ᐸᓯᔭᑦᓴᐅᖃᔭᖕᖏᑐᒍᑦ ᖃᖓᑦᑕᔫᒧᑦ/ᑎᒻᒥᔫᒧᑦ ᐃᑭᔪᓂᒃ ᓴᐅᓈᓂᒃ ᓇᑦᓴᓯᔪᖃᑐᐊᕐᐸᑦ.
ᓂᕿᒥᒃ ᓱᕐᕋᑕᐅᑎᖃᕈᕕᑦ ᓇᒻᒥᓂᖅ ᓂᕿᒡᒋᒍᓐᓇᑐᑎᑦ ᖃᖓᑦᑕᔫᒧᑦ. ᓇᒻᒥᓂᖅ ᓂᕿᒡᒋᕈᒪᓐᓂᕈᕕᑦ ᓱᓀᑦ ᐊᑦᔭᒍᓐᓇᒪᖔᕐᐱᑭᑦ ᖃᐅᔨᓴᒍᓐᓇᑐᑎᑦ ᖃᕆᑕᐅᔭᑎᒍᑦ ᐅᓄᖓ CATSA website ᒨᕐᓗᑎᑦ.
ᖃᐅᔨᒪᔭᐅᒋᐊᓕᒃ: ᐊᐅᓪᓚᓚᖓᔪᐃᑦ ᖃᐅᔨᒪᑐᐊᕈᑎᒃ ᓂᕆᔭᒥᓄᑦ ᓱᕐᕋᑕᐅᒍᑎᖃᓲᖑᒋᐊᒥᒃ ᓇᑦᓴᓯᖁᔨᑦᓱᑕ ᐅᓐᓂᑑᑎᖃᓪᓚᕆᑦᑐᒍᑦ ᑲᐴᑎᓂᒃ ᓇᑦᓴᓯᖁᑦᓱᒋᑦ ᓱᕐᕋᑕᐅᒍᑎᖃᑐᐊᕈᑎᒃ ᑲᐱᒍᑎᑦᓴᒥᓂᒃ, ᐅᑦᑑᑎᒋᓗᒋ EpiPens-ᒍᓂᕋᕐᑕᐅᔪᓂᒃ, ᓂᕈᒥᐊᕋᕐᒥᓃᑦᑎᓗᒋᑦ/ᑎᒍᒥᐊᕋᕐᒥᓃᑦᑎᓗᒋᑦ.
ᐱᐅᓯᕐᓲᑎᐅᒋᐊᓕᓐᓄᑦ ᒪᓕᒉᑦ
ᖃᖓᑦᑕᔫᒃᑯᑦ/ᑎᒻᒥᔫᒃᑯᑦ ᐃᑭᒪᔪᓕᒫᑦ/ᐃᑯᒪᔪᓕᒫᑦ ᑲᒪᑦᓯᐊᖃᑕᑐᐊᕐᐸᑕ ᒪᓕᒋᐊᓕᓕᒫᒥᓂᒃ ᖃᖓᑐᐃᓐᓇᓕᒫᖅ ᖃᖓᑕᔪᓕᒫᑦ ᖃᓄᐃᖕᖏᓯᐊᕈᓐᓇᖁᑦ. ᓯᓚ ᐊᑦᓯᑦᔨᓴᐅᑎᒋᐊᐱᓲᒍᒻᒪᑦ, ᐃᑦᓯᕙᐅᑕᒥᓃᖏᓐᓇᓕᒫᖁᔨᕗᒍᑦ ᐱᒍᓐᓇᕕᓕᒫᓯᒍᑦ ᖃᖓᑕᓂᓕᒫᓯᓐᓂ.
ᐊᑦᑕᓇᕐᑐᒨᖁᓇᓯ:
- ᑕᑦᓯᓯᒣᓐᓇᓗᓯ/ᖃᑦᓱᖓᐅᓯᕐᓯᒪᓗᓯ ᖃᖓᑕᓂᓕᒫᑦᓯᓂ, ᑕᑦᓯᓯᒪᖁᔨᒍᑏᑦ/ᖃᑦᓱᖓᐅᓯᕐᓯᒪᖁᔨᒍᑏᑦ ᐃᑯᒪᑎᑕᐅᒍᓐᓀᕋᓗᐊᕐᐸᑕ;
- ᖃᖓᑦᑕᔫᕐᑎᐅᑉ ᐊᖓᔪᕐᖄᑉ ᖃᖓᑦᑕᔫᒥᓗ ᐱᓇᓱᑦᑎᖏᑦᑕ ᖃᓄᐃᓘᖁᔨᓂᖏᑦ ᒪᓕᑦᑕᐅᓯᐊᕆᐊᓖᑦ;
- ᐃᓱᒪᒋᖃᓯᐅᑦᔨᓯᐊᕐᓗᓯ ᖃᖓᑕᖃᑎᑦᓯᓂᒃ. ᓱᒐᓗᓗᐊᕐᓱᑎᒃ ᐱᐅᓯᖃᕐᕕᖃᑦᓯᐊᖏᑦᑐᐃᑦ ᑌᒣᓕᖓᑦᔭᐅᑐᐃᓐᓇᓂᐅᔭᖕᖏᑐᑦ.
ᐃᓄᐃᑦ ᖃᖓᑦᑕᔫᖏᑦ/ᑎᒻᒥᔫᖏᑦ ᐱᒍᓐᓇᐅᑎᖃᕐᐳᑦ ᐱᖁᔭᕐᓄᓗ ᓴᐳᑦᔭᐅᓱᑎᒃ ᐃᑭᑎᑦᓯᒍᒪᖕᖏᑐᐊᕈᑎᒃ ᐃᒥᐊᓗᑦᓯᒪᔪᓂᒃ ᐊᒻᒪᓘᓐᓃᑦ ᐋᖓᔮᓐᓇᑐᕐᑐᓯᒪᔪᓂᒃ ᐃᑭᑎᑦᓯᖏᑦᑑᒍᓐᓇᕕᖃᕐᐳᑦ ᐱᓇᓱᑦᑎᖏᑦ, ᐊᑦᑕᓇᕐᑐᒨᕆᖁᓇᒋᑦ ᖃᖓᑦᑕᔫᒃᑯᑦ/ᑎᒻᒥᔫᒃᑯᑦ ᐊᐅᓚᔪᓂᒃ. ᖃᐅᔨᔭᒪᐅᒋᐊᓕᒃ ᐃᒥᐊᓗᓂᒃ ᐊᒻᒪᓘᓐᓃᑦ ᐋᖓᔮᓐᓇᑐᓂᒃ ᓇᑦᓴᓯᒋᐊᖃᕐᑐᖃᖕᖏᓚᕆᒻᒪᑦ ᐱᒍᒫᕐᓂᐊᑕᒥᓂᒃ ᖃᖓᑦᑕᔫᒥ/ᑎᒻᒥᔫᒥ.